Read bura-pabir Hoseya 9 Bible Online

Hoseya 9 - bura-pabir bible

Hoseya 9

¹Mjir Israila, zhar giri hara kucali apatə mji damwa ana hara ni. Giri akwa hara karwakur, kamnyar giri ku zhar nu Hyelər giri ka nu haptayeri, ka hamta ala ɗa saɗakayeri ata lali dəkə mthli!

²Antə kulini giri aɗi ata wutə mthli wala yimər anap na ata mzhi giri wa.

³Apani giri aɗi ata jaktə ndzi akwa tsəɗi tə MTHLAKU hamta ala giri ni wa. Bwadukwa giri ata ngka ahar Masar, ka bwadukwa giri mwari ahar Assiriya, vəi tə giri ata səm susəma na adiya.

⁴Akwa tsəɗiyayeri ndaga giri aɗi ata mzhi hamta yimər anap wala saɗakayeri aka MTHLAKU wa. Da ata ndzi adiya apa susəmər vəi tuwa, antə kəlara mdə na ku səma tsa ata ndzi dlimbur. Giri ata sə səmari kamnyar məi na akwa kətə giri. Mda aɗi ata mwantari akwa mbwar vəngkər səli aka MTHLAKU wa.

⁵Antə ma vir tə mda ata hara kucali aka MTHLAKU ni ku si, su aɗi tə giri ata mzhi harari wa.

⁶Ma sakatə asar ni ku si giri ata titiləmtadzi. Antə wala ma giri an msərəmta asar ni, mjir Masar ata ngkəi giri. Da ata tsaptə giri ka da harəmta giri ahar Memfis! Antə kusar kəga mtəhəra ata ptsa ka hartə gənar adzərfa ar giri ka fyayeri ar giri.

⁷Saka ku hara tə mda ata ɗi mjir Israila, sakar ntə dawa ku hara. Antə aɗi ata fəi wa da ata nggatari aka dza ɗa. Ai giri an pəla abbər, “Naɓi ngəni caku!” Ka abbər, “Mdə ngəni tə Hyel an akwa kəthlər ka tsa ni, tsa ka cicu!” Giri akwa pəla su nayeri ni kamnyar giri aɗi akwa hir ra wa, kamnyar tə bikər giri ku hara hang kamta.

⁸Hyel ku thlentə ra kəi ndzi naɓi na ata tsaktə mjirni, Israila. Amma giri akwa ngga ali dərku akwa kəlara laku tə I nuwa. Antə wala akwa mbwar vəngkər səli aka Hyel mji aɗi akwa hir ra wa.

⁹Da ku təra ciju akwa hara dlərpəkur apatə mjir Gibeya ku hara waci. Hyel aɗi ata fwari suayeri na ɗimi ɗimi tə da hara ni wa, antə tsa ata ɗi ɗa.

¹⁰MTHLAKU akwa pəla, “Israila, akwa sakatə I paktə giri ntangkəma, giri ndzi ali apa nfur anap akwa mtakəu. Sakatə I wutə kəkayeri ar giri ntangkəma, da ndzi ali apa yarakəmar kamnda akwa sakarni. Amma aghəla nda raka antə da zhar ra ka mwari ata Gar Peyor, ka vəngkər səli aka sur səli ngəni haptu Baal ni. Antə da ku ndzi sur cika tsu apa haptu tə da hir ni.

¹¹Darajar Israila ata fəl ping ka təra apa ɗika, kamnyar mwanki aɗi ata ya wa, da aɗi ata ndzi ka hur wa, wala jaktə kətə hur wa.

¹²Wala ma da an yaɓəla maɗangkyar ka kəlanta, I ata vu ka shanga ɗa mta, wala duku aɗi ata mbil ka mpikə wa. Ma sakatə I ku zhar mji ngəni antə su na mwavər ata wutə ɗa.”

¹³MTHLAKU, sakatə I wutə mjir Israila, I kəta abbər da ata ndzi apa kuɓər nfur dipənau na akwa kəla akwa vəi kuɓa. Amma kulini da akwa səɓəla ka mjir ɗa ka mdə kurəmta ɗa.

¹⁴Antə MTHLAKU, I akwa kiɗə su pal akəla ga, tə ka gə hara aka mji ngəni. Ka gə vu ka hur təri adzə ɗa, ka uwa ɗa ndzi kula yimi akwa.

¹⁵MTHLAKU akwa pəla, “Da baɗitə ɗimikur ni akwa Gilgal. Anda antə I baɗitə nggəlar ɗa. Antə kamnyar ɗimikur natə da hara, I ata kədləɓəla ɗa kazhar tsəɗiyirna. I aɗi ata hir ɗa kəra wa. Shanga mji ol'ola arɗa ku nggəlar ta kələngkər ali.

¹⁶Mjir Israila ku ndzi apa nfwa natə nggilangari ku uli, tə tsa aɗi ata ya munya wa. Apani mjir Israila aɗi ata ya maɗangkyar wa. Wala ma da an ya maɗangkyar, ka hir ɗa ka duna, I ata tsəgəi ɗa.”

¹⁷Hyelərna ata nggəlar mjirni, kamnyar da aɗi psi thləm alari wa. Da ata ndzi mji kadləkadla akwa nca durayeri.