Read bura-pabir Yowel 1 Bible Online

Yowel 1 - bura-pabir bible

Yowel 1

¹Ngəni an ndər natə MTHLAKU ku pəla aka Yowel na ɓzər Pethluwel.

²Səntə gir hangkala giri, giri na ol'ola psi giri thləma giri, shanga giri na akwa tsəɗi ni. Su apani ku ɗar hara akwa sakar giri, wala akwa sakar kəkayeri ar giri ya?

³Ngkər giri aka maɗa' giri ata kər, ka maɗa' giri sə pəla aka maɗa' ɗa ka maɗa' ɗa tsuwa sə pəla aka zaman na ata nu ɗa.

⁴Su natə ntsəkwa ku ɓɗə ka təra kazhari, antə bəri ntsəkwa ku si ka ɓɗəmnya. Su natə bəri ntsəkwa ku ɓɗə ka təra kazhari, antə jaɓa ku si ka ɓɗəmnya. Su natə jaɓa ku ɓɗə ka təra kazhari, antə ntsəkwa damwa na ɗimi ku si ka ɓɗəmnya.

⁵Thlata ata heni, giri na wikəwikari, ka giri tuwa, ka shanga giri tuwa, giri na ana sa yimər anap, kamnyar ntsəkwa ku higəlantə yar anapər giri, antə giri aɗi ata ɗar yimər anap na nənəm kəra wa.

⁶Kamnyar mji hang ku si ka pudzi akwa tsəɗiyirna, mji na ka duna na ajikatədzi wa. Thlira ɗa apa thlira tsəngi, thlira ɗa saɓəl saɓəl apa thlira mwala tsəngi.

⁷Da ku higəlantə fakər anapər yeru, ka ɓɗəgəmnya kamndayeri ar yeru. Da ku tsəpwamta nfwayeri ni, ka zhar gangari pau mwapu.

⁸Tuwa giri apa ɓzərngkwa na mbwatə zhaɓər tuwa, na akwa tuwa mtər ɓzərdakwiyir ni tə tsa akwa bara kəlari.

⁹Tuwa giri kamnyar saɗakar mthli wala ar sur sa aɗi akwa mbwar vəngkər səli aka MTHLAKU wa. Pristayeri ma akwa tuwa, da na ana kəthlər aka MTHLAKU.

¹⁰Fakayeri ku higəlantədzi karkar, antə di akwa ula, kamnyar tə mthli ku hilantədzi ɗimi ɗimi, tsuwa yimər anap ku samnyadzi, wala mal zaitun ma aɗi kəra wa.

¹¹Ka ɗəffa giri ɓza, giri na mjir tsuhwa! Tuwa giri, giri na akwa wul fakər anap! Tuwa giri kamnyar alkama ka barli, kamnyar sur fakə ni ku hilantədzi ɗimi ɗimi.

¹²Nfwayeri ar anap ka kamnda ku ugələmtadzi, nfwayeri ar rumman, ka gwariva, ka appəl, shanga nfur səma na akwa mtakəu ku ugələmtadzi, antə jiri mji aɗi akwa kucali kəra wa.

¹³Hatə giri ləptər tuwa, giri na pristayeri, tuwa giri, giri na ana hara kəthlər ata bagaɗi! Ləmbwa giri, ka giri pi ka ləptər tuwa ni ata dza giri, giri na ana kəthlər aka Hyelərna! Kamnyar mthli wala yimər anap aɗi tə mdə hamta akwa mbwar Hyelər giri wa.

¹⁴Tsawa gir aka mji ka mdə kəl asham, kəga gir tsaptədzi na ola. Tsaptə giri mji ol'ola ka shanga mjir tsəɗi ni akwa mbwar vəngkər səli aka MTHLAKU na Hyelər giri, ka giri tuwa alari.

¹⁵Vir nda ata ndzi vir na mwavər! Kamnyar vir tə MTHLAKU ata si ni abaka hara, vir tə Tsa na ka Duna ta Shang ni ata sə sənta asar!

¹⁶Nca yeru akwa wul sakatə sur fakər yeru akwa hil ni, kucali aɗi akwa mbwar vəngkər səli aka Hyelər yeru wa.

¹⁷Hwulfayeri ku mtəgəi akwa həi na ul'ula, mthli aɗi mbili akwa bi wa. Biyayeri ku ndlagamtadzi kamnyar mthli aɗi akwa kəra wa.

¹⁸Thlayeri ar yeru ku ləkwa kadlə kula kər, akwa nggyinggya kamnyar kusar aɗi ala ɗa wa, ciɓayeri ar təma akwa ɗar bwani.

¹⁹MTHLAKU, I ku səntə tuwarna akəma ga, kamnyar u'u ku mbamta kusar vəi ɓəla, ka shanga nfwayeri na akwa mtakəu.

²⁰Wala mwaɓiyayeri ar mtakəu akwa tuwa ala ga, kamnyar yimər zərkayeri ku shiwi, tsuwa u'u ku mbamta kusar vəi ɓəla.