Read bura-pabir Yowel 2 Bible Online

Yowel 2 - bura-pabir bible

Yowel 2

¹Mbur giri təmbəl akwa Sihiyona, tsa giri ləlu ata kəra garərna na ɓɗakkarkara! Ka shanga mji na akwa tsəɗi ni thlivəra, kamnyar vir tə MTHLAKU ata si ni ku hara kudzəha.

²Tsa ata ndzi vir na mənggəl thlərətu ka damitədzi, vir tə dlamba ata hartə kutahyel ka kuthlu pələku! Vir nda dlamar sojayeri na ka duna ata sə səɓəla, ka hartə kəra garayeri ka ndzi lutu apa bəri ntsəkwa. Mda aɗi ɗar wutə jili sojayeri na ka duna apani təng tə Hyel vəi mdə wa, tsuwa mda aɗi ata jaktə wutə jiliyir ɗa kəra wa.

³Da ana ɓɗəmnya su na ka thlali mirakəu apa u'u bwakəma ɗa an apa Gadina ar Eden, amma bwahila ɗa apa mtakər hamada na kula ampani. Su aɗi na ata msərəmta ɗa wa.

⁴Da dludzi ka takwayeri antə da ana pu galapu apa takur mpa.

⁵Kuraka səla ɗa na akwa fəlfəla ata kəra garayeri, ana tuwa apa kuraka wagənayeri ar mpa na akwa kəɓa ka nvwa ɗa, apa kuraka kusar na akwa ndəkəla akwa u'ur mtakəu, da akwa layi apa dlamar sojayeri na ku ɗəmhədzi ka duna.

⁶Wutər ɗa təkəma ata thlivərantə mda, tə shanga mji ata hərtə kəma ɗa.

⁷Dza ɗa ana thlata apa sojayeri, ka ndlə katangga apa sojayeri. Da ana pu səla ɗa ata kəma duku akwa layi, kula pəramta abwa damwa.

⁸Da aɗi ana ləkwa lakur nvwa ɗa wa, kəlara mda akwa nu lakurni shini, Da ana təramta akwa nca dawayeri arɗa, tsuwa su aɗi na ata mzhi ngkatə ɗa wa.

⁹Da ana hwi kara pungkərdzi aka bərni da ana hwi ata kəra katanggayeri. Da ata ndlətə ka ləvəi akwa kəyayeri, da ana ləmbwa ata windauwayeri apa həla.

¹⁰Ma da akwa mwa duniya ana kənggəra, tsuwa vəi na amtazi ana kənggəra. Pci ka thliya ku palidzi ka hara kuthlu, antə sasəlkayeri ku zhar ta mbəla.

¹¹Ka kuraku na ola antə MTHLAKU ana hamta tsawa arni, aka dlamar sojayeri arni na ka duna na ana kələngkər alari. Kamnyar virər MTHLAKU ni an ola tsa an vir na mwavər ka duna. Wan ata mzhi nggitə səktari ri?

¹²MTHLAKU akwa pəla, “Wala kulini, ngka giri adzə ra ka ɗəffa giri shang, ka asham, ka tuwa, ka jikatuwa.

¹³Ɗəffa giri antə giri ata kəlarari paksaku, aɗi ləptər giri antə giri ata thləhumtari wa.” Ngka giri adzə MTHLAKU na Hyelər giri, kamnyar tsa ana hara ɓɗakkur, ka kətadzə mda, tsuwa ɗəffari aɗi ana ɓzə taktar wa. Tsa ka hirkur na ana palidzə wa hang, parang ɗəmhəɗəmhari kamnyar yafitə mda.

¹⁴Wan asəndə wala MTHLAKU na Hyelər giri ata pali dzamərni, ka hamta ala giri barka ar sur fakə hang, har ka giri mzhi hamta saɗaka ar mpwa ka ar sur sa ri?

¹⁵Mbur giri təmbəl akwa Sihiyona hamta giri tsawa abbər ka mji kəl asham, ka giri kəga tsaptədzi na ola!

¹⁶Tsaptə giri ɗa ata kəma duku, kəcimta ɗa kamnyar da ata tsaptədzi ni akəma Hyel! Tsaptə giri mji ol'ola, maɗangkyar, ka maɗangkyar na tsu ata uwa! Ka sala mwala səɓəla kazhar kutambwarni, ka mwala na haɗa kəldzi zhar kutambwarni, ka da si.

¹⁷Ka pristayeri na akwa kəthlər aka MTHLAKU na akwa daɓwa galahəu ka bagaɗi ni tuwa. Ka da pəla, “Kətadzə mjir ngə, MTHLAKU. Ga aɗiya hir ka mjir nga ndzi sur nggənggəl wa, wala ka da ndzi sur kyartəkur akwa nca mji wa, ta mji asə nggamnya ɗa abbər, ‘Ama Hyelər giri nə ri?’ ”

¹⁸Antə hangkala MTHLAKU ku nutə tsəɗiyirni, tə tsa ku kətadzə mjirni.

¹⁹Tə MTHLAKU shinau ka pəla aka mjirni, “Kulini I ata thlenta ala giri mthli, yimər anap ka mal na ata mzhi giri. Giri aɗi ata jaktə ndzi sur nggənggəla ata nca mjir duniya kəra wa.

²⁰I ata kədləmta dawayeri ar giri na thlata akwa yala ni, kəi kədlu bwadukwa ɗa akwa mtakə na kula ampani. I ata putə mji na akəma ɗa akwa pwar ɗa ata Manda Una kəi putə mji na akwa nu ɗa abwahili ata Manda Meditereniya. Antə shiwur mshiyir ɗa ata sə thlatə ka nghyantə tsəɗi. I ata shamta ɗa kamnyar suayeri tə da hara ala giri.

²¹Gə na di, ga aɗiya thlivər wa, kara hara kucali ka ɗəffu mwapu, kamnyar suayeri na ol'ola tə I, na MTHLAKU, ku hara ala ga.

²²Giri na mwaɓi mtakəu, giri aɗiya thlivər wa, Kamnyar kusar vəi ɓəla na akwa mtakəu ku hara ciɓakciɓakku, tsuwa nfwayeri ni akwa ya, nfur kamnda ka ar anap akwa ya hang.

²³Giri na mjir Sihiyona, hara gir kucali, kucali giri, kamnyar su tə MTHLAKU na Hyelər giri ku hara ala giri. Tsa ku tər yimi na ntangkəma ala giri apatə giri ata turari, yimi na ntangkəma ka yimi na akwa tsikərari apa na hwatu.

²⁴Lali ar dəkə mthli ata nghyi ka mthli gəlamayeri ata sə nghyi ka yimər anap kəga mal zaitun har ka pumtadzi.

²⁵I ata ntəmta ala giri shanga su tə giri ku hara asarari, akwa məva tə ntsəkwa ɓɗəmnya sur fakər giri, məva tə I thlentə ntsəkwayeri ata saka zumzum, apa dlamar sojayeri arna ka da dlərəmta giri.

²⁶Kulini giri ata wutə susəma hang, ka giri səma ka ndla, ka giri fwal thləma MTHLAKU na Hyelər giri, na ku hara surndatayeri kamnyar giri. Antə mjirna aɗi ata jaktə ləkwa sur səli kəra wa.

²⁷Antə giri na mjir Israila ata sənda abbər I akwa nca giri, ka abbər I an MTHLAKU na Hyelər giri, tsuwa damwa aɗi wa, Mjir na aɗi ata jaktə ləkwa sur səli kəra wa.

²⁸Aghəla tə su nayeri ni ku hara ka təramta, I ata puɓəla mambələrna ata kəra shanga mda. Antə maɗa' giri shili ka mwanki ata sə hara naɓikur, tsuwa maɗashilər giri na kusta ata sə wul su, ka mji shilər giri hara suniyayeri.

²⁹Jiri, saka nda I ata puɓəla mambələrna, ba ata kəra mafayeri arna shili ka mwanki.

³⁰I ata ncantə surndatayeri akwa vəyayeri na amtazi ka akwa duniya, Giri ata sə wutə mamshi, ka u'u, ka ɗer na ata thlatə ka ləmta.

³¹Pci ata sə shinantədzi ka ndzi kuthlu, ka thliya ngka mamza apa mamshi, akəmata vir Mthlaku ni asi vir na ata thlivərantə mdə ni.

³²Saka nda kəlara mdə na ku hara adduwa, akwa thləma MTHLAKU ata wutə mbantədzi. Kamnyar ata Gar Sihiyona, ka tsuwa akwa Urushalima antə mda ata wutə mbantədzi, tsu apatə I na MTHLAKU ku pəla, ‘Akwa nca mji na mbil ka mpika, mji aɗi tə I na MTHLAKU akwa kəgari.’ ”