Read bura-pabir Yowel 3 Bible Online

Yowel 3 - bura-pabir bible

Yowel 3

¹MTHLAKU akwa pəla, “Akwa virayeri nda ka saka na ndaga, I ata ngka ka gənar Yahuda ka Urushalima ala ɗa.

²I ata tsaptə shanga mjir duniya, kəi pughəi ɗa akwa Mular ar Shariyar MTHLAKU. Anda antə I ata hara ala ɗa shariya ata kəra shanga su tə da ku hara aka mjirna, kamnyar da ku titiləmta mjir Israila akwa tsəɗiyayeri na aɓəla, ka ndəndəkəi tsəɗiyirna.

³Da ku ndzəl su ata kəra mjirna, da ku ɗələmta maɗangkyar shili ka da ntəmta karwayeri, ka maɗangkwi ka da wutə sur mas yimər anap.

⁴“Man su tə giri akwa bara hara ali ri, giri na mjir Taya, ka Sidon, ka shanga tsəɗiyir Filistiya? Giri akwa bara ntəmta su laga ata kəri ya? Ma giri akwa bara ntə dawa ata kəri, I ata ntəmta suari ata kəra giri tsu kulini!

⁵Giri ku famnya adzərfarna ka dinarna, tsuwa giri ku tsarɓəla vəi ɗuwar gənarna ka mwanta akwa haptayeri ar giri.

⁶Giri ku fatə mjir Yahuda ka Urushalima ka mwantə ɗa ciju akwa kəla tsəɗi, ka ɗələmta ɗa aka mjir Helleni.

⁷Kulini I ata ra fatə ɗa akwa vəi tə giri ku ɗələmta ɗa akwa ni, kəi ntəmta ɗimikur tə giri hara ala ɗa ata kəra giri.

⁸I ata vu ka mdə ɗələmta maɗa' giri shili ka mwanki aka mjir Yahuda. Antə tsuwa da ata ɗələmta ɗa ciju aka mjir Sabiya. I na MTHLAKU an pəla.”

⁹Ka giri psəmnya labar ngəni aka dawar mjir Israila: Ka giri pəla, “Ɗəmhə girdzi kamnyar mpa! Mbwantə giri ɗəffa sojayeri na katsala, ka giri shahə sojayeri ni kudzəha ka da ləɓəla kamnyar mpa!

¹⁰Ɓdləmnya giri garma giri ka da ndzi katsakarayeri, ka ingdlayeri ar pa kəra nfur pukdla ka da ndzi mwasu. Wala mji na hava ka da mzhi pəla, ‘I ma, I katsalar mpa.’

¹¹Hangkər giri ka giri si, shanga giri tsəɗiyayeri na kalaktə mjirna, ka giri tsaptədzi akwa mular ni.” Gə na MTHLAKU tsuwa, ka gə səghəi ka sojayeri ar nga ka da tsaptədzi akwa mular ni.

¹²Ka tsəɗiyayeri ɗəmhədzi, ka da si akwa mular shariya ar MTHLAKU. Kamnyar anda antə I, na MTHLAKU, ata ndzəndzi kəi hara shariya aka shanga mji na kalaktə mjirna.

¹³Da kəmanggar ka duna. Antə ka giri fatə ingdlar giri, ka giri thlagamta ɗa apa mthli na ku ng'həi. Asər giri ka giri ntsəntsarəmta ɗa apa yar anap, har tar ma vəi dlər yimər anap ku nghyi ka gəlamayeri nghyi ka pumtadzi.

¹⁴Mji dəpu ka dəpungkər an tsaptədzi akwa Mular Shariya ni. Kamnyar tə virər MTHLAKU ni abaka si, akwa Mular ar Shariya ni.

¹⁵Pci ka thliya akwa ndzi kuthlu, sasəlkayeri ku zhar ta mbəla.

¹⁶MTHLAKU ata haptə kurakari ata Gar Sihiyona, tsa akwa gari ka kuraku apa dlərər hyel akwa Urushalima, duniya ka vəi na amtazi ku kənggərantədzi. Amma MTHLAKU an vəi ɗuwardzər mjirni, vəi ɗuwardzi na ka duna ar mjir Israila.

¹⁷Antə giri ata sə sənda abbər I an MTHLAKU na Hyelər giri, na ka ndzi akwa Sihiyona gar na ɓɗakkarkara. Tsuwa Urushalima ata ndzi bərni na ɓɗakkarkara, antə durayeri damwa aɗi ata jaktə təramta akwa wa.

¹⁸“Akwa saka ndaga, fakər anap an ata sə hartə kəra garayeri, antə thla an ata hartə kəra ɗəɗəgəlayeri, shanga zərkayeri ar Yahuda ata nghyi ka yimi. Gular yimi ata ntula akwa kəi MTHLAKU, ka yimi hwi səɓəla ka ləɓantə Mular Akashiya.

¹⁹Masar ata ndzi mtakə na aptsantə su wa, Edom ata ndzi mtakə na kula mda akwa, kamnyar tə da ku dlər tsəɗiyir Yahuda ka kurəmta mjirni na kula biku.

²⁰Amma Yahuda ata ndzi vəi ndzəndziyir mji ba saka madi, ka Urushalima akwa shanga zamanayeri na ata sə si.

²¹I ata ntə dawa ar mjirni tə mdə kurəmta, I aɗi ata yafitə ɗa wa, I na MTHLAKU ata ləkəma ka ndzəndzi akwa Sihiyona.”