Read bura-pabir Amos 1 Bible Online

Amos 1 - bura-pabir bible

Amos 1

¹Nayeri ni an ndərər Amos, pal akwa nca mjir ɓəla na ahar Tekowa. Hyel ncanta alari ndər ngəni ata kəra Israila akwa sakar Uzziya na kuthlir Yahuda, ka sakar Yerobowam, ɓzər Yowash na kuthlir Israila, ka məva suɗa akəmata di akənggərantədzi.

²Amos pəla, “MTHLAKU ku haptə kurakari akwa Sihiyona, ka pəla su ka kuraku apa tsəngi akwa Urushalima. Vəiɓəlayeri na ka kusar mirakəu akwa ugəla, kəra Gar Karmel tsuwa akwa tətəɓwa.”

³Ngəni an su tə MTHLAKU pəla, “Mjir Damaska ku hara biku, ka jaktə hara biku ata kəra biku. I aɗi ata shari ɗya tə I ɗəmhə kamnyar ɗa ni wa, kamnyar da ku dəkə mjir Gileyad ka liyar dəkə mthli na ka mnyari hang.

⁴Apani I ata thlentə u'u ata kəra kəyir Hazayel, antə tsa ata mbamta mbwar ɗuwardzər Kuthli Benhadad.

⁵I ata ɓəgələmta nyarfur Damaska, kəi thlagamta wulya mjirni na akwa Mular ar ɗimikur, I ata tsi kuthlir Bethleden ka mjir Siriya ngka akwa mafakur ahar Kir”, I na MTHLAKU an pəla.

⁶Ngəni an su tə MTHLAKU pəla, “Mjir Gaza ku hara biku, ka jaktə hara biku ata kəra biku. I aɗi ata shari ɗya tə I ɗəmhə kamnyar ɗa ni wa, Kamnyar da ku tsartə mjirna shang ka mwantə ɗa akwa mafakur ka ɗələmta ɗa apa mafa akwa tsəɗi Edom.

⁷Apani I ata thlentə u'u ata kəra katangga ar Gaza antə tsa ata mbamta mbwar ɗuwardzərni.

⁸I ata kurəmta mjir Ashdod, ata kəma duku ka kuthlir mjir Ashkelon. I ata ɗi mjir bərni Ekron, kəi shamta mambila mjir Filistiya.” I na MTHLAKU an pəla.

⁹Ngəni an su tə MTHLAKU pəla, “Mjir Taya ku hara biku, ka jaktə hara biku ata kəra biku. I aɗi ata shari ɗya tə I ɗəmhə kamnyar ɗa ni wa. Kamnyar da ku tsartə mjirna shanga ka mwantə ɗa akwa mafakur, ka ɗələmta ɗa apa mafa akwa tsəɗi Edom. Da aɗi kəsi alkawal ar ɓzərmakur wa.

¹⁰Apani I ata thlentə u'u ata kəra katangga ar Taya, antə tsa ata mbamta vəi ɗuwardzi arni.”

¹¹Ngəni an su tə MTHLAKU pəla, “Mjir Edom ku hara biku, ka jaktə hara biku ata kəra biku. I aɗi ata shari ɗya tə I ɗəmhə kamnyar ɗa ni wa. Kamnyar da ku kədlə maɗama' ɗa na mjir Israila ka katsakar, kula kətadzə ɗa. Tsuwa ɗəffa ɗa ku ləkəma ka mbwa ɗəffa ɗa aɗi ana pwi wa.

¹²Apani I ata thlentə u'u ata kəra Teman, antə tsa ata mbamta bərniyayeri na ka duna ahar Bozra.”

¹³Ngəni an su tə MTHLAKU pəla, “Mjir Ammon ku hara biku, ka jaktə hara biku ata kəra biku. I aɗi ata shari ɗya tə I ɗəmhə kamnyar ɗa ni wa. Kamnyar da ku thləhumta kuta mwanki na ka hur akwa Gileyad, kamnyar ka da jakə olkurər tsəɗi arɗa.

¹⁴Apani I ata hatə u'u ata katangga ar Rabba, antə tsa ata mbamta vəi ɗuwardzərni na ka duna. Mji ata sə tuwa ka kuraku akwa vir mpa nda, mpa ni ata sə ndzi mwavər ka higəlantə su apa kəwal.

¹⁵Antə mda ata sə mwantə kuthlir ɗa akwa mafakur, tsa kəga kwakunayeri arni ata kəma duku. I na MTHLAKU an pəla.”