Read bura-pabir Amos 5 Bible Online

Amos 5 - bura-pabir bible

Amos 5

¹Psi gir thləm, giri na mjir Israila, aka su tə I akwa pəlari akwa tuwarna ata kəra giri!

²Israila an ɓzərngkwa na ku ndla, tsa aɗi ata thlatə kəra wa! Mdə ku təra kazhar ni ata di akwa tsəɗiyirni, kula mdə na ata dlar akwa thlentə ni.

³Kamnyar MTHLAKU na olta shang ku pəla, “Bərni na ku thlentə sojayeri dəpu pal, mji aru pal daci an ata sə ngka ka mpika. Bərni na ku thlentə sojayeri aru pal, mji kuma daci an ata sə ngka ka mpika, aka kutakəyir Israila.”

⁴Kamnyar MTHLAKU akwa pəla aka mjir Israila, Bara gir ra antə giri ata ndzi ka mpika.

⁵Amma giri aɗiya bara ra atar haptu na akwa Bethlel wa, wala atar mwari ahar Gigal wa, wala tsaɓəla ka mwari ahar Beyersheba wa, Kamnyar jiri, mda ata fatə mjir Gilgal ka mwanta akwa tsəɗi damwa apa mafa, tsuwa Bethlel ata sə ndzi su gapani.

⁶Bara gir MTHLAKU antə giri ata ndzi ka mpika, ta tsa asə lətə kəra mjir Israila apa u'ur mtakəu. U'u ni ata mbamta mjir Bethlel, kula mdə wutə mjir mzhi tsiyari.

⁷Sha ku wutə giri! Giri na ana ndwaləmta jirkur, ka ntsarəmta jirkur ata di!

⁸Tsa an namtə sasəlkayeri na tsaptsaɓari ar Mambəlkulci ka Dzardzar, ka shinantə kuthlu na pələku ka ɗəɗəpa, ka shinantə pci ka viri. Tsa andər kətsə yimər manda, ka puɓəla ata kəra di na ul'ulari. Thləmari an MTHLAKU!

⁹Tsa andər hukthləmta mdər duna, ka huzamta bərniyayeri na akwa katangga.

¹⁰Giri na mjir Israila, Giri ku nggəlar mdə na ana mpar ɗimikur, ka mdər pəla jirkur ata bəbal, akwa vəi tsaptədzi na akwa nyarfur kutadi.

¹¹Giri akwa ləkwa kucira mjir bwani, ka ntsəngkər ala ɗa ka da na giri mthli. Giri ku həntə mbwayeri ɓɗakɓɗaku, ka pelayeri natə mdə marmara, amma giri aɗi ata ndzi akwa da wa. Giri ku ncimta fakayeri ar anap ɓɗakɓɗaku, amma giri aɗi ata sə sa yimər ɗa wa.

¹²Kamnyar I asəndə hangkur bikayeri ar giri, ka olkurər bikayeri ni. Giri ana hara bwani aka mji na pwa, giri ana dlu sur dzəɓə mnya. Giri ana ngkatə ta mda ahara shariyar jirkur aka mjir tursu akwa nyarfur kutadi.

¹³Antə akwa jili saka ngəni, mji na ɗəɗu ana ngkahə mnya ɗa, kamnyar tsa an saka na ɗimi.

¹⁴Bara hara ɓɗakkur, aɗi ɗimikur wa, kamnyar ka giri ndzi ka mpika. Antə MTHLAKU Hyel na ka Duna ta Shang, ata ndzi adzə giri apatə giri ku pəla.

¹⁵Nggəlar giri ɗimikur, ka giri hir ɓɗakkur, ka giri nci shariyar jirkur akwa tsaptədzi tə giri ana hara akwa nyarfur kutadi ni. Nuhum MTHLAKU Hyel na ka Duna ta Shang, asə kətadzə nyarmbwar Yusuf na ku mbili.

¹⁶Antə MTHLAKU na ka Duna ta Shang, natə tsa an mthlaku akwa pəla, “Mji ata sə tuwa akwa shanga lakur kutadi, ka mji tuwa bwani akwa shanga vəi tsaptədzi na akwa kutadi. Mda ata sə kəga mjir tsuhwa ka da tuwa, ka kiɗə mji na masəkur tuwa ka da jikatuwa.

¹⁷Giri ata sə tuwa ba akwa fakayeri ar anap, kamnyar I ata ləkwa nca giri kəi ɗi giri. I na MTHLAKU an pəla.

¹⁸Sha ku wutə giri! Giri na ana bara wutə virər MTHLAKU! Kamnyar mə tə giri ana bara wutə virər MTHLAKU ri? Ai tsa vir kuthlu, aɗi parakə wa!

¹⁹Ata ndzi apa mdə na hwiyimta tsəngi ka kəɓa ka mwaɓi na mwavər ta tsəngi ni. Wala apa mdə na hwi ləmbwa, ka pudzə tsiyari aka banggwa, antə pwapu kal ni.

²⁰Virər MTHLAKU an vir kuthlu, aɗi parakə wa, Tsa ata ndzi vir kuthlu na pələku, kula parakəu zhar ka mbəla.”

²¹MTHLAKU akwa pəla, “I ku nggəlar susəmər kucali ar giri, tsuwa I aɗi ana nggatə msərakur tsaptədzər giri wa.

²²Wala ma giri an ata hamta ali saɗaka mbamba, ka sur hamta ar mthli, I aɗi ata dluwari wa. Tsuwa I aɗi ata dlu mwaɓi na təksətəksari, tə giri hamta ali abbər saɗakar jakə mwardzi wa.

²³Təra giri ka kurakər hayeri ar giri, I aɗi ata ngga kuraka guləmər giri wa.

²⁴Amma ka mdə hara shariyar jirkur akwa kəlara bwa apa yimər zərkəu, ka jirkur ndzi apa thlyagha na ana shiwu wa.

²⁵Giri na mjir Israila, giri ku hamta ali mwaɓiyayeri tə giri tsəgəi, ka saɗakayeri sakatə giri akwa mtakəu məva nfwarkumari nda ya?

²⁶Amma giri ku kətə dludzər haptayeri, natə giri nama aka kəra giri, abbər ka haptu Sakkuth ndzi kuthlir giri, ka Kaiwan na haptu sasəlka.

²⁷Antə apani I ata famta giri, kəi mwantə giri abwanda Damaska. I na MTHLAKU an pəla, natə thləmi an Hyel na ka Duna ta Shang.”