Read bura-pabir Amos 6 Bible Online

Amos 6 - bura-pabir bible

Amos 6

¹Sha ku wutə giri, giri na ka ɗəffa giri pəpəipəpəyari akwa Sihiyona ka giri na akwa ngga apa giri akwa ndzəndzi lapiya ata gar ar Samariya, giri na mji ol'olər tsəɗi Israila na ol'ola, tə mjir Israila ana si adzə giri kamnyar bara dlara!

²Mwar giri ahar Kalne, ka giri wuta, aghəla nda ka giri mwari ahar Hamath na ola, ka giri ləghəi ahar Gath ar Filistiya. Giri ku təramta kuthlikurayeri ndagə ya? Nənga tsəɗiyir giri olta arɗa ri?

³Sha ku wutə giri, giri na ana bara ka giri hwiyimta vir asar ni, amma ɗimikur tə giri akwa harari ni akwa jaktə shahə vir ni kudzəha.

⁴Sha ku wutə giri, giri na ana pəpəi ata dəkəlayeri tə mdə nam ka thlira ciwar, ka nggatə msərakur ndərardzi ata kujarar giri na ol'ola. Giri ana ɓɗə kum gam na thlata akwa ciɓər giri, ka kənayeri na ku ɓɗə kusar ka təksa.

⁵Giri ana hara ha ata mnya guləm, ka thli ha apa Dauda aka kəra giri.

⁶Giri ana sa yimər anap akwa ɗewayeri na ol'ola ka kəkərtə dza giri ka malayeri na ɓɗakta ta shang, amma ɗəffa giri aɗi ana ɓzi ata kəra laku tə nyarmbwar Yusuf hila akwa wa!

⁷Antə giri ata ndzi mji na ntangkəma tə mda ata fatari ka mwanta akwa mafakur, antə kucali ka laku tə giri ana mpəli dza giri kamnyar msərakur ni ata kura.

⁸MTHLAKU na olta shang ku kahyel ka kərni, tsa na MTHLAKU na ka Duna ta Shang pəla, I akwa cikə haptə kər tə Yakub kəgari, I ku nggəlar mbwayeri ar ɗuwardzi na ɓəɓal. I ata hamta bərni ni ka shanga su na akwa aka dawayeri ar giri.

⁹Antə wala ma mji shili kuma an ku mbili akwa kutakəi pal, da ata mta.

¹⁰Antə ma sakatə yangkura mdə na ku mtə ni ku ləmbwa kamnyar kəɓəla mshi ni ka tsa mbamta, tsa ata yu mdə na aghəli akwa kutambwa ni abbər, “Mshi damwa aɗi ambwa adzə ngə ya?” Ma mdə ni pəla, “Awa”, antə yangkurari ni ata pəla, “Təng ka ngəni! Mburu aɗiya jaktə kamnya thləma MTHLAKU wa ta su damwa asə wutə mburu.”

¹¹Kamnyar nggədza MTHLAKU ku hamta tsawa, mda ata jaɓumta mbwa na ola ka tsa ndzi bərbər, ka pukthləmta mbwa na raka ka tsa ndzi apa pənju.

¹²Takwayeri ana hwi ata pəla ya? Mda ana kukula ka thla ata manda ya? Amma giri ku shinantə jirkur ka gwar, ka namtə halər ɓɗakkur tə tsa ndzi ɗəɗahəu.

¹³Giri na ana kucali kamnyar ngkəi bərni Lodebar, ka pəla, “Ka duna yeru antə yeru ku səm Karnayim”,

¹⁴MTHLAKU Hyel na ka Duna ta Shang akwa pəla, “Israila, I ata vu ka tsəɗi laga thlatə ka mpa giri, antə da ata hara bwani ala giri, baɗita akwa nyarfur ləkwa Hamath ka mwanta akwa zərkər Araba.”