Read bura-pabir Amos 9 Bible Online

Amos 9 - bura-pabir bible

Amos 9

¹I wutə MTHLAKU athləthlata adzə bagaɗi. Antə tsa pəla, “Tsa kəra zhimbwalayeri ar mbwar vəngkər səli, har ka səla mbwa ni kənggərantədzi. Pukthləmta ɗa ka da pumtadzi ata kəra mji, mji na ku mbili I ata tsi ɗa ka katsakar. Mda aɗi akwa nca ɗa na ata hwi wa, mda aɗi akwa nca ɗa na ata msər wa.

²Wala ma da an la ku ka ləghəi akwa duniyar mji mtəmta, I ata haghəi tsi kəi ndəkərɓəla ɗa. Wala ma da an ləmta akwa vəi na amtazi, I ata ndəkərghəi ɗa.

³Wala ma da an hwi ka ra ɗuwardzi ata kəra Gar Karmel, I ata paktə ɗa anda kəi ngkəi ɗa. Wala ma da an ɗuwardzi ali akira manda tsu anda I ata tsawa aka pwapu ka tsa kal ɗa.

⁴Wala ma da an mwari akwa mafakur akwa tsiya dawayeri arɗa, I ata pungkər nci ata kəra ɗa, amma ncar ɗimikur aɗi ar ɓɗakkur wa.”

⁵MTHLAKU Hyel na ka Duna ta Shang, tsa na ana tsəkwar di ka tsa juwamtadzi, ka shanga mjir duniya ləkwa tuwa. Ɗəffa shanga mjir duniya ata thlata, ka mbwa, ka jaktə pwi apa Thlyagha Nayil.

⁶Tsa an ku həntə kəyirni amtazi, tsa nci səla vəi na amtazi ni ata kəra duniya. Tsa andər ndəkərtə yimi na akwa manda ka puɓəla ni ata di na ul'ulari. Thləmari an MTHLAKU.

⁷MTHLAKU akwa pəla, “Giri na mjir Israila, giri kalkal ali ka mjir Ithliyopiya. Apatə I fwaɓəla giri akwa tsəɗi Masar, antə I fwaɓəla mjir Filistiya akwa Kaftor, ka fwaɓəla mjir Siriya akwa tsəɗi Kir.

⁸I na MTHLAKU na olta shang akwa wul bikər kuthlikur ar Israila, Antə I ata shamta ni ata kəra duniya, amma I aɗi ata shamta kutakəyir Yakub karkar wa. I na MTHLAKU an pəla.

⁹Kamnyar I ata hamta tsawa, ka dawayeri ar giri kənggərantə kutakəyir Israila apatə mda ana kətərɓəla wuyaku kazhar pela, antə pela aɗi na ata tərkwa wuyaku ni wa.

¹⁰Shanga mjirna na ku hara biku ata sə mta akwa mpa, watau mji na ana pəla, Asar aɗi ata wutə yeru wa, su aɗi na ata shahədzi adzə yeru wa” ni.

¹¹Vir nda I ata jaktə həntə kəyir Dauda na ku ndlamtadzi ni. I ata hənɓəla vəyayeri na ku ntənta, kəi thlentə suayeri na ku ndlagamtadzi, kəi jaktə namtə ni apa na hwatu.

¹²Antə mjir Israila ata ndzi mthlakər shanga su na mbila akwa Edom, ka shanga tsəɗiyayeri na ku ndzi arna, I na MTHLAKU an pəla, tsuwa I ata nghyaɓəla su tə I pəla.

¹³MTHLAKU akwa pəla, “Saka ata sə si tə mdər thla mthli ata sə dlukəma akəla mdər thləkari ka mdər ntsar yimər anap dlukəma akəla mdər nci nfwari. Garayeri ata sə njinjə yimər anap na msəra, antə shanga ɗəɗəgəlayeri ata sə hwi yimər anap.

¹⁴I ata ngka ka mjirna akwa tsəɗiyir ɗa, kəi jaktə həntə bərniyayeri arɗa na ku ndla, ka da jaktə ndzəndzi akwa. Da ata sə ncimta fakər anap ka da sa yimari, da ata sə ncimta nfwayeri ka da səm yari.

¹⁵I ata nci mjir Israila akwa tsəɗiyir ɗa, tsuwa mda aɗi ata jaktə famta ɗa ka zhar tsəɗi tə I ku na ala ɗa ni wa. I na MTHLAKU na Hyelər giri an pəla.”