Read bura-pabir Jona 3 Bible Online

Jona 3 - bura-pabir bible

Jona 3

¹Aghəla nda antə MTHLAKU ku jaktə gari aka Jona abbər,

²“Thlatə kara mwari ahar Nineva bərni na ola kara psəmnya ala ɗa labar natə I hamta ala ga.”

³Antə Jona ku kələngkər aka ndərər MTHLAKU, ka təra mwari ahar Nineva. Nineva an bərni na ol ka duna, mda ata hara vir makər akwabə tsa dlarhə kutari.

⁴Aghəla tə Jona ku ləkwa bərni ni ka mwa mnyar vir pal, antə tsa baɗitə tsaktə mji abbər, “Azi ka vir nfwarkumari mda ata shamta Nineva!”

⁵Antə mjir Nineva ku hamta jiri aka Hyel. Antə da ɗəmha abbər ka kəlara mda kəl asham, antə shanga mji, ola ka ntsaha, ku hatə dasa kamnyar ncanta abbər ɗəffa ɗa ku ɓzi antə da ku tubi.

⁶Sakatə labar ni ku mzhitə kuthlir Nineva, antə tsa thlatə kazhar dəkəl kuthlikurərni, ka ntsui ləptər kuthlikur, ka hatə dasa, ka ndzəndzi ata di akwa bərbər.

⁷Antə tsa thlentə kuraku ka mdə psəmnya akwa shanga Nineva abbər, “Ngəni an tsawu na ku thlata akəla kuthli ka kwakunayeri arni abbər, mda, wala mwaɓi, wala thla, wala təma, aɗiya hamnya su wa. Da aɗiya səm susəm wala sa yimi wa,

⁸amma ka shanga mji hatə dasa, ka putə dasa ata mwaɓiyayeri arɗa. Ka kəlara mda haptə kurakari ka tsa kiɗə Hyelərni ka jirkur. Tsuwa ka waskəi zhar surhararni na ɗimi, ka shanga su na ata ɓzamtə ɗəffa mda wala dəkəi mda.

⁹Mburu asəndə wa, nuhum Hyel ambwi ɗəffari, ka tsa pali su tə tsa ɗəmha, ka zhar kurəmta mburu.”

¹⁰Antə sakatə Hyel wutə su tə da hara, ka apatə da ku zhar surharar ɗa na ɗimi, antə tsa ku kətadzə ɗa. Tsa aɗi shamta ɗa apatə tsa ɗəmhə ni kəra wa.