Read bura-pabir Jona 4 Bible Online

Jona 4 - bura-pabir bible

Jona 4

¹Amma su ngəni aɗi kəskəra Jona wa, antə ɗəffari ku ɓzi.

²Antə tsa hara adduwa aka MTHLAKU abbər, “MTHLAKU, I aɗi pəla abbər an su tə ga ata sə harari wa ya təng akəmata I zhar tsəɗiyir na? Ai an su na hara tə I bara hwi təkəma kəi ləhar Tarshish ni. Kamnyar I ku sənda abbər gə Hyel na hir hara ɓɗakkur ka hir kətadzə mda. Ɗəffa ga aɗi ana ɓzə taktar wa, nghyinghyari ka hirkur na ana palidzi wa, tsuwa tədəku gə ɗəmhəɗəmhari kamnyar ngka tsiya ga ata kəra ɗi mda.

³Akwa saka ngəni MTHLAKU, I akwa kiɗə nga kara dlu mpikəi, kamnyar kuji kəi mta ta I andzi ka mpika.”

⁴Antə MTHLAKU yu Jona abbər, “Gə wuta abbər kalkal ka ɗəffa ga ɓza ata kəra su ngəni ya?”

⁵Aghəla nda antə Jona ku ləɓəla kazhar bərni ni, ka mwari abwar raghəi ka bərni ni, ka ndzəndzi. Anda antə tsa latə səvar ni ka ndzəndzi akwa shanggurari, akwa səka ka tsa wutə su na ata hara aka bərni ni.

⁶Antə MTHLAKU na Hyel vu tə nfu laga ku ptsi ka kəla ata kəra Jona, ka hara shanggur ata kəra Jona, kamnyar ka tsa nggatə msərakurari. Antə Jona ku nggatə msərakur nfu ni ka duna.

⁷Amma səɓəla ɗəpari sakatə viri akwa kura antə Hyel thlentə kulamnya ka tsa ɓɗəmnya nfu ni, antə nfu ni ku ula.

⁸Sakatə pci ku hara ola, antə Hyel vu tə shambar na bwarbwar ku thlatə təbwar raghəi, tə pci ni ku mba kəra Jona ka duna, har tsa abaka thləvamtadzi. Antə tsa bara abbər kuji ka tsa mta, tə tsa pəla, “Kuji kəi mta ta I andzi ka mpika.”

⁹Amma Hyel pəla aka Jona, “Gə wuta abbər kalkal ka ɗəffa gə ɓza ata kəra nfu ni ya?” Antə Jona shinau abbər, “Kalkal ka ɗəffi ɓza, har ma ka ɗəffi ɓzə na ata mzhi vu ra kəi mta.”

¹⁰Antə MTHLAKU pəla alari, “Ga akwa kətadzə nfwa natə ga aɗi ghəra ata kər wa, tsuwa aɗi gan kəlantə ni wa, nfu na kəla akwa vir pal, ka mtə səɓəla ɗəpari!

¹¹Azha aɗi kalkal kəi kətadzə Nineva, bərni na ol wa ya? Bərni natə hangkur maɗangkyar na kula biku ku təramta dəpu aru pal ka sərkumari, zhar ka mwaɓiyayeri na akwa!”