Read bura-pabir Jikayeri 1 Bible Online

Jikayeri 1 - bura-pabir bible

Jikayeri 1

¹Akwa vir na ntang ar thliya na suɗa akwa məva na suɗkur aghəla tə mjir Israila ku səɓəla akwa tsəɗi Masar, antə MTHLAKU ku gari aka Musa akwa Tentər Kəɓa akwa Mtakər Sinai. Tsa pəla,

²“Ga ka Haruna, ka giri jikatə mjir Israila ata nyarmbwa ata nyarmbwa, ka kutakəi kutakəi. Ka giri rəbutə thləma kəlara mdə sal

³na ka məvari sərkumari har ka ləmta, shanga mji shili na ata mzhi ləkwa soja. Ka giri jikatə ɗa zara zara.

⁴Ka giri kətə mda pal na ola akwa kutakəyir kəlara nyarmbwa kamnyar ka tsa dlar giri akwa jika ni.

⁵Nayeri ni an thləma mji na ata dlar gir akwa kəthlər ni. Akwa nyarmbwar Ruben, Elizur ɓzər Shedeyur.

⁶Akwa nyarmbwar Simeyon, Shelumiyel ɓzər Zurishaddai.

⁷Akwa nyarmbwar Yahuda, Nashon ɓzər Amminadab.

⁸Akwa nyarmbwar Issakar, Nethlanel ɓzər Zuwar.

⁹Akwa nyarmbwar Zebulun, Eliyab ɓzər Helon.

¹⁰Akwa nyarmbwar Ifrayim, Elishama ɓzər Ammihud. Akwa nyarmbwar Manasse, Gamaliyel ɓzər Pedazur.

¹¹Akwa nyarmbwar Benjamin, Abidan ɓzər Gideyoni.

¹²Akwa nyarmbwar Dan, Ahiyezer ɓzər Ammishaddai.

¹³Akwa nyarmbwar Asher, Pagiyel ɓzər Okran.

¹⁴Akwa nyarmbwar Gad, Eliyasaf ɓzər Deyuwel.

¹⁵Akwa nyarmbwar Naftali, Ahira ɓzər Enan.”

¹⁶Nayeri ni an mji tə mdə carɓəla akwa nca mjir Israila, mji na ol'ola akwa kutakəyayeri ka nyarmbwayeri ar kəkar ɗa.

¹⁷Antə Musa ka Haruna ku fatə mji ngəni tə mdə hamta thləma ɗa ni,

¹⁸antə da tsaptə shanga mji ata vəi duku akwa vir na ntangkəma ar thliya na suɗa. Antə mdə rəbutə thləma shanga mji shili natə məva ɗa ku mwantə sərkumari har ka ləmta. Mdə rəbutə thləma shanga mji kutakəi kutakəi ata nyarmbwa ata nyarmbwa ar kəkar ɗa,

¹⁹kalkal apatə MTHLAKU ku tsawa aka Musa. Apani antə Musa ku jikatə ɗa akwa Mtakər Sinai.

²⁰Nggədza hangkur mji na akwa nyarmbwar Ruben na yarakəmar Israila. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

²¹Hangkur mji tə mdə jikata akwa nyarmbwar Ruben an dəpu nfwarkumari ka ngkwa ka aru ntəfu.

²²Nggədza hangkur mji na akwa nyarmbwar Simeyon. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

²³Hangkur mji tə mdə jikata akwa nyarmbwar Simeyon an dəpu ntəfkumari ka əmdla ka aru makər.

²⁴Nggədza hangkur mji na akwa nyarmbwar Gad. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

²⁵Mji tə mdə jikata akwa nyarmbwar Gad an mji dəpu nfwarkumari ka ntəfu, ka aru ngkwa ka ntəfkumari.

²⁶Nggədza hangkur mji na akwa nyarmbwar Yahuda. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

²⁷Mji tə mdə jikata akwa nyarmbwar Yahuda an mji dəpu murfəkumari ka nfwar ka aru ngkwa.

²⁸Nggədza hangkur mji na akwa nyarmbwar Issakar. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

²⁹Mji na akwa nyarmbwar Issakar an mji dəpu ntəfkumari ka nfwar ka aru nfwar.

³⁰Nggədza hangkur mji na akwa nyarmbwar Zebulun. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

³¹Mji na akwa nyarmbwar Zebulun an mji dəpu ntəfkumari ka murfa ka aru nfwar

³²Nggədza hangkur mji na akwa nyarmbwar Ifrayim. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

³³Mji na akwa nyarmbwar Ifrayim an mji dəpu nfwarkumari ka aru ntəfu.

³⁴Nggədza hangkur mji na akwa nyarmbwar Manasse. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

³⁵Mji na akwa nyarmbwar Manasse an mji dəpu makkumari ka suɗa ka aru suɗa.

³⁶Nggədza hangkur mji na akwa nyarmbwar Benjamin. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

³⁷Mji na akwa nyarmbwar Benjamin an mji dəpu makkumari ka ntəfu ka aru nfwar.

³⁸Nggədza hangkur mji na akwa nyarmbwar Dan. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

³⁹Hangkur mji na akwa nyarmbwar Dan an mji dəpu ngkwakumari ka suɗa ka aru murfa.

⁴⁰Nggədza hangkur mji na akwa nyarmbwar Asher. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

⁴¹Mji na akwa nyarmbwar Asher an mji dəpu nfwarkumari ka ntang ka aru ntəfu.

⁴²Nggədza hangkur mji na akwa nyarmbwar Naftali. Shanga mji shili natə məva ɗa ku mwantə sərkumari ka ləmta, watau mji na ku mzhi ləkwa soja, mdə ku rəbutə thləma ɗa, ka kutakəyir ɗa, ka nyarmbwar ɗa, ka kəkar ɗa.

⁴³Mji na akwa nyarmbwar Naftali an mji dəpu ntəfkumari ka makər ka aru nfwar.

⁴⁴Nayeri ni an mji shili natə Musa ka Haruna ku jikatə ɗa ka dlarər mji ol'olər Israila na kumnya suɗa, waskəi akwa wakiltə nyarmbwar kəkarni.

⁴⁵Apani antə shanga mjir Israila natə məva ɗa ku mwantə sərkumari ka ləmta, watau shanga mji na ku mzhi ləkwa soja, mdə ku jikatə ɗa atar nyarmbwar kəkayeri arɗa.

⁴⁶Antə hangkur shanga mji tə mdə ku jikatə ɗa an dəpu aru ngkwa ka makər, ka aru ntəfu ka ntəfkumari.

⁴⁷Amma mda aɗi jikatə nyarmbwar mjir Lawi atar kəkar ɗa ata kəma duku kəga mambila nyarmbwayeri ni wa.

⁴⁸MTHLAKU ku kurtə pəla aka Musa abbər,

⁴⁹“Ma sakatə ga ata jika mjir Israila, ga aɗiya paktə jika ɗa ata kəma duku kəga mjir nyarmbwar Lawi wa.

⁵⁰Amma ka gə pwi mjir Lawi ka da wul Tentər Seɗar Alkawal ka shanga kariyayeri na akwa. Mjir Lawi ni ata ndzi mjir kəl Tent ni ka shanga kariyayeri na akwa. Tsuwa da ata wulwul ni akwa kəlara vəi tə mdə ku fəli akwa, tsuwa da ata kalaktə ni.

⁵¹Kəlara sakatə giri ku thlata akwa vəi fəliyir giri, mjir Lawi an ata mpəli Tent ni. Tsuwa ma sakatə mda ata nci ni akwa vəi fəli damwa, mjir Lawi an ata nciyari. Antə ma mdə damwa zum ku si kudzəhə ka tent ni mda ata tsi ni.

⁵²Akwa sakar nthlə vəi fəli ni, mambila nyarmbwayeri ar Israila ata latə tentər ɗa zara zara, waskəi akwa nyarmbwar ɗa, akira alamər nyarmbwar ɗa.

⁵³Amma mjir Lawi ata latə tentər ɗa ka da kalaktə Tentər Seɗar alkawal kəgari, kamnyar ta mdə laga asə si kudzəhə ka Tent ni, ka ɗəffi sə mbwa ata mjir Israila. Mjir Lawi an mji na ata wul kəra Tentər Seɗar Alkawal ar MTHLAKU.”

⁵⁴Antə mjir Israila ku hara shanga su kalkal apatə MTHLAKU ku tsawa aka Musa.