Read bura-pabir Jikayeri 10 Bible Online

Jikayeri 10 - bura-pabir bible

Jikayeri 10

¹Antə MTHLAKU pəla aka Musa abbər,

²“Namtə təmbələr mbura suɗa ka adzərfa, ka gə hara kəthlər ka da kamnyar kəga mji ka da tsaptədzi, wala tsuwa kamnyar psəmnya ka mji thlatə kazhar vəi fəli.

³Antə ma sakatə mdə ku mbur təmbəlayeri ni japu, shanga mji ata tsaptədzi ata kəma duku adzə nga anyarmbwar Tentər Kəɓa.

⁴Amma ma təmbəl duku daci antə mdə ku mbura, tar mji na ol'ola, watau mji natə da an kəra nyarmbwar mjir Israila an ata tsaptədzi akəma ga.

⁵Ma sakatə mdə ku mbur təmbəl ar psəmnya su, ka nyarmbwayeri na pwi tentayeri arɗa təbwar raghəi ni thlatə ka da baɗitə mwa.

⁶Ma sakatə mdə ku jaktə mbur təmbəl ar psəmnya su na suɗkur, ka nyarmbwayeri na fəli təbwar anəm thlatə ka da baɗitə mwa. Kəlara sakatə da ata thlatə ka baɗitə mwa, mda ata mbur təmbələr psəmnyari.

⁷Amma ma mda ata kəga mji ka da tsaptədzi ata kəma duku, mda ata mbur təmbəl ni ka kuraku damwa zum.

⁸Maɗashilər Haruna na pristayeri ni an ata mbur təmbəlayeri ni. Ngəni ata ndzi su tə giri ata ləkəma ka harari akwa shanga zamanayeri ar giri.”

⁹“Antə ma sakatə giri ku ləkwa tsəɗiyir giri, tə ma giri ata ləɓəla kamnyar ra mpa dawar giri na akwa hara bwani ala giri, mda ata mbur təmbəlayeri ar psəmnya su, kamnyar ka MTHLAKU na Hyelər giri ɗangtə giri, ka tsa mbuli giri akwa tsiya dawayeri ar giri.

¹⁰Tsuwa mda ata mbur təmbəlayeri akwa virayeri ar kucali, ka akwa virayeri tə mdə thlamta kamnyar susəmər kucali, ka akwa vir kucali ar Thliya Bilən. Mda ata mbur təmbəl akwa sakatə giri akwa hamta saɗaka mbamba ka saɗakar jakə mwardzi ar giri. Mbur təmbəl nayeri ni an ata hara ka Hyelər giri ɗangtə alkawal tə tsa hara ala giri. I an MTHLAKU na Hyelər giri.”

¹¹Akwa məva na suɗkur, thliya na suɗa ka virari sərkumari, aghəla tə mjir Israila ku səɓəla akwa Masar, antə dlamba na ata kəra Tentər vəngkər səli ni ku haptədzi.

¹²Antə mjir Israila ku baɗitə ɗuwa kazhar Mtakər Sinai. Antə da ləkəma ka nu dlamba ni har tə dlamba ni mzhitə Mtakər Paran ka thləthlata anda.

¹³Ngəni an thlatər ɗa na ntangkəma kalkal apatə MTHLAKU ku tsawa aka Musa.

¹⁴Alam ar mjir nyarmbwar Yahuda an baɗitə thlatə ntangkəma ka ləkwa təra, antə zarayeri ar mjir Yahuda baɗitə ləɓəla ata ata akwa nu ɗa. Antə Nashon na ɓzər Amminadab an akwa pwar ɗa.

¹⁵Mdə na akwa pwar mjir nyarmbwar Issakar an Nethlanel na ɓzər Zuwar.

¹⁶Mdə na akwa pwar mjir nyarmbwar Zebulun an Eliyab na ɓzər Helon.

¹⁷Sakatə mdə ku fəi Tent ni, antə mjir nyarmbwar Gershon ka Merari, natə da an mjir kəl Tent ni ku thlatə ka psi laku.

¹⁸Aghəla ɗa alam ar mjir nyarmbwar Ruben an thlatə ka ləkwa təra, antə zarayeri ar mjir Ruben baɗitə ləɓəla ata ata akwa nu ɗa. Antə Elizur na ɓzər Shedeyur an akwa pwar ɗa.

¹⁹Mdə na akwa pwar mjir nyarmbwar Simeyon an Shelumiyel na ɓzər Zurishaddai.

²⁰Mdə na akwa pwar mjir nyarmbwar Gad an Eliyasaf na ɓzər Deyuwel.

²¹Aghəla nda antə mjir Kohath na akwa nyarmbwar Lawi, ku thlata akwa kəl suayeri na ɓɗakkarkara akwa nu ɗa. Antə akwabə da amzhətə vəi fəli na akəma, mdə ku kurtə nci Tent ni.

²²Aghəla nda antə alam ar mjir nyarmbwar Ifrayim ku thlatə ka ləkwa təra, antə zarayeri ar mjir Ifrayim baɗitə ləɓəla ata ata akwa nu ɗa. Antə Elishama na ɓzər Ammihud an akwa pwar ɗa.

²³Mdə na akwa pwar mjir nyarmbwar Manasse an Gamaliyel na ɓzər Pedazur.

²⁴Mdə na akwa pwar mjir nyarmbwar Benjamin an Abidan na ɓzər Gideyoni.

²⁵Akwa tsikərari, alam ar mjir nyarmbwar Dan an thlatə ka ləkwa təra, antə zarayeri ar mjir Dan baɗitə ləɓəla ata ata akwa nu ɗa. Da an hartə bwahila shanga mambila nyarmbwayeri ni. Mdə na akwa pwar ɗa an Ahiyezer na ɓzər Ammishaddai.

²⁶Mdə na akwa pwar mjir nyarmbwar Asher an Pagiyel na ɓzər Okran.

²⁷Tsuwa mdə na akwa pwar mjir nyarmbwar Naftali an Ahira na ɓzər Enan.

²⁸Akwa laku ngəni antə mjir Israila ku ɗuwa ata zara ata zara, sakatə da thlatə kazhar vəi fəliyir ɗa ka təra.

²⁹Antə Musa pəla aka Hobab na ɓzər Reyuwel mdər Midiyan, na baba' mwalar Musa abbər, “Kulini yeru akwa ɗəmhədzər thlatə kazhar vəi ngəni, ka yeru təra mwari akwa vəi tə MTHLAKU ku hara alkawalari abbər tsa ata hamta ala yeru. Antə asər ka mburu təra, yeru ata hara ɓɗakkur ala ga, kamnyar MTHLAKU ku kətə alkawal ar hara ɓɗakkur aka Israila.”

³⁰Antə Hobab shinau alari abbər, “Awa, I ata ngka akwa tsəɗiyirna adzə mjirna.”

³¹Antə Musa pəla alari, “Usa, ga aɗiya zhar yeru shiyeru wa, kamnyar ar nga ga asəndə vəi tə kalkal ka mburu fəli ata akwa mtaku ni, antə ga an ata nca ala yeru laku.

³²Tsuwa ma ga ku nu yeru, tə mburu təra ata kəma duku, kəlara jili ɓɗakkur tə MTHLAKU ku hara ala yeru, yeru ata hara ala ga.”

³³Antə mjir Israila ku thlatə ka təra kazhar gar ar MTHLAKU, watau Sinai, ka mwa ar vir makər. Antə sakatə da akwa mwa ni Akwati Alkawal ar MTHLAKU akwa mwa akəma ɗa kamnyar paka ala ɗa vəi tə da ata ghərəmtaghəra ata.

³⁴Kəlara sakatə da ku zhar vəi fəliyir ɗa təpci, dlambar MTHLAKU ana ndzi ata kəra ɗa, kamnyar hamta ala ɗa ləmbəku.

³⁵Kəlara sakatə Akwati Alkawal ni ku thlatə ka baɗitə mwa, Musa ata pəla, “Thlata, MTHLAKU! Ka gə titiləmta dawayeri ar nga, ka mji na nggəlar nca ga hwi kazhar kəma ga.”

³⁶Tsuwa kəlara sakatə Akwati ni ku thləthlata, Musa ata pəla, “Ngka, MTHLAKU, adzə mjir Israila na dlama dlama!”