Read bura-pabir Jikayeri 11 Bible Online

Jikayeri 11 - bura-pabir bible

Jikayeri 11

¹Təng vir laga mji ləkwa nggungguni ata kəra bwaniyir ɗa, antə nggungguni ni ku ləkwa thləma MTHLAKU. Sakatə MTHLAKU ku nggatə ɗa antə hangkalari ku thlatə ka duna ata kəra ɗa. Antə u'ur MTHLAKU ku səɓəla ka ləkwa mba akwa nca ɗa har ka mbamta bwa laga akwa vəi fəliyir ɗa ni.

²Antə mji ni ku mwantə tuwar ɗa aka Musa kamnyar ka tsa dlar ɗa. Antə Musa ku hara adduwa aka MTHLAKU, antə u'u ni ku mti.

³Antə mdə ku kəga thləma vəi nda Tabera, kamnyar anda antə u'ur MTHLAKU ku səɓəla ka mba akwa nca ɗa.

⁴Vir laga mətəpiyayeri na hir haptə hangkala mda ka na ana ɗa, na akwa mwa kəga mjir Israila, ku baɗitə nggukə kum. Antə mji ngəni ku baɗitə nggungguni har tə wala mjir Israila ka kərɗa ku ləkwa tuwa akwa pəla, “Wan ana mburu kum ka mburu ɓɗə ri?

⁵Ai, mburu ana ɗangtə kəlfa tə mburu ana wuta akwa Masar ka ɓɗə gapani. Tsuwa mburu ana ɗangtə suayeri apa lala, ka hwamdla, ka antəm thlali, ka antəm, ka kanggəlma.

⁶Amma kulini su aɗi na msəra aka mnya mburu wa! Kamnyar su damwa aɗi tə mburu asəm kəra wa, tar manna ngəni daci antə nca mburu akwa wutari.”

⁷Manna ni miɗiɗi apa munya meyeli ka kalar ni apa dəmwar nfwa.

⁸Antə mji ana ləɓəla ka da tsapta, ka da hadli ata bur, wala ka da dəkəi akwa njir. Aghəla nda da ata tiyari akwa tughum, wala namtə kek kəgari. Tsuwa msərakurərni an apa jili kek natə mdə ɓwa ka mal.

⁹Akwa kəlara sakatə kəlangkəu ku təri aviri akwa vəi fəliyir ɗa, manna ni ata səghəi ata kəma duku ka tsa.

¹⁰Vir laga təng Musa nggatə mji akwa tuwa ka kuraku akwa kutakəyayeri arɗa, waskəi anyarmbwar tentərni. Antə hangkala MTHLAKU ku thlatə mwavər ka duna, har tə Musa ku damitədzi.

¹¹Antə Musa pəla aka MTHLAKU abbər, “Kamnyar mi tə gə səntə bwani ngəni ata kəra mafar nga nə ri? Kamnyar mi tə I aɗi akwa wutə mdəkur ata nca gə wa ri? Kamnyar mi tə gə pu mji ngəni akwa tsi abbər kəi ni wul kəra ɗa shang ri?

¹²I an kəl hurər ɗa ya? Nənga I an ya ɗa ri? Kamnyar mi tə ga ata pəla ali kəi fatə mji ngəni apatə mdər wul ɓzər ana kətə ɓzəngkyar na tsu ata uwa akwa kərathlari, har kəi mwantə ɗa akwa tsəɗi tə gə kətə alkawalər hamtari aka kəkayeri arɗa ri?

¹³Ama antə I ata mzhi wutə kum aka shanga mji nayeri nə ri? Kamnyar da akwa tuwa ali abbər kəi na ɗa kum ka da ɓɗa!

¹⁴I amzhi kuri wujir shanga mji ngəni I shira wa, su tə da akwa turari ni ku təra duni.

¹⁵Ma an su tə ga ata hara ali, tsuwa ma I ku wutə mdəkur ata nca ga, I akwa kiɗə kəra ga abbər ka gə tsi ra ndzang kulini, kəi msər ta bwani ngəni.”

¹⁶Antə MTHLAKU pəla aka Musa, “Tsapta ali mji murfəkumari akwa nca mji na ol'ola akwa Israila, mji tə ga ku sənda abbər da an ol'ola ata kəra mji, natə mji ana na ɗa olkur. Pəla ala ɗa ka da si adzə ra akwa Tentər Kəɓa ka da thləthlata ata vəi duku ka ga.

¹⁷Antə I ata səghəi kəi gari ka ga anda. Akwa kuta dunar mambəl natə I na ala ga, antə I ata kətsə bwadukwari kəi hamta ala ɗa. Antə da ata dlar nga akwa kuri wujirayeri ar mji ni, tə apani ga aɗi ata ndzi shinga ata kəra damitədzər ɗa kəra wa.”

¹⁸“Ka gə pəla aka mji ni ka da kəcimta kər ɗa, kamnyar ɗəpa da ata wutə kum tə ka da ɓɗa. Kamnyar MTHLAKU ata hamta ala ɗa kum, təng tə da ku nggungguni, tsuwa tsa ku nggatə ɗa akwa pəla abbər, ‘Wan ana mbur kum ka mburu ɓɗə ri? Kuji ma mburu an tsu akwa Masar, ata təramta ala mburu.’ Antə apani MTHLAKU ata na ala ɗa kum tə ka da ɓɗa.

¹⁹Da aɗi ata ɓɗə kum ni ar vir duku, wala suɗa, wala ntəfu, wala kuma, wala sərkumari daci wa.

²⁰Amma har da ata hara thliya pal swakti akwa ɓɗari, har tar ma məyari ku ləɓəla akwa kuta ɗa, har ka da nggəlar wulari. Ngəni ata hara kamnyar tə da ku nggəlar MTHLAKU na akwa nca ɗa, ka tuwa alari abbər, ‘Amma shang kamnyar mi tə mburu təra kazhar Masar ri?’ ”

²¹Amma Musa pəla aka MTHLAKU abbər, “Ai mji na adzə ra ku mwantə dəpu aru ngkwa. Antə gə pəla ar nga ga ata na ala ɗa kum ka da ɓɗa har ar thliya pal swakti!

²²Ai wala ma mda an ata tsi shanga bəri thla, ka na ar kwi ka təma, aɗi ata mzhi ɗa wa. Tsuwa wala ma mda an ata ngkaɓəla shanga kəlfayeri na akwa manda ka tsapta ala ɗa, aɗi ata mzhi ɗa wa.”

²³Antə MTHLAKU shinau aka Musa abbər, “Dunar tsiya MTHLAKU ku kətə ya? Kulini ga ata wutari, wala su tə I pəla ni ata hara jiri, wala aɗi ata hara wa!”

²⁴Antə Musa ləɓəla ka pəla aka mji su tə MTHLAKU pəla. Antə tsa tsaptə mji ol'ola murfəkumari, ka pəla ala ɗa ka da thləthlatə ka kalaktə Tent ni.

²⁵Antə MTHLAKU ku səghəi akwa dlamba ka gari ka tsa. Antə akwa kuta dunar mambəl tə tsa hamta aka Musa ni, MTHLAKU ku kətsə bwaduku, ka hamta aka mji ol'ola na murfəkumari ni. Sakatə mambəl ni ku si ata kəra ɗa, antə da baɗitə hara naɓikur, amma aghəla nda da aɗi jaktə hara naɓikur kəra wa.

²⁶Mji ol'ola laga aɗi suɗa na ku mbili aghəli akwa vəi fəli ni. Da akwa nca mji na ol'ola murfəkumari tə mdə carɓəla ni, amma arɗa da aɗi mwari adzə Tent ni katagu wa. Thləma mdə pal Eldad, ka na palari Medad. Amma wala apani mambələr Hyel ni ku səghəi ata kəra ɗa, antə da ku hara naɓikur akwa vəi fəliyir ɗa ni.

²⁷Antə ɓzərdakwi laga ku ləɓəla ka huva ka ra pəla aka Musa abbər, “Diya Eldad ka Medad avi akwa hara naɓikur anda akwa vəi fəli ni.”

²⁸Antə Joshuwa na ɓzər Nun, natə tsa an mdər dlar Musa təng akwa sakar dakwikur arni, ku pəla aka Musa, “Mdərkəi, ngkatə ɗa!”

²⁹Amma Musa shinau abbər, “Ga akwa səlka ata vəyi kamnyar olkur tə I kəgari ya? Ai I bara ma abbər ka MTHLAKU pungkər mambələrni ata kəra shanga mjirni!”

³⁰Aghəla nda antə Musa kəga mji ol'olər Israila ku ngka avi akwa vəi fəliyir ɗa.

³¹Antə MTHLAKU vu tə shambar laga ku fatsə takulashayeri na ata mnya manda, ka si ka pumta ɗa tə da kalaktə vəi fəliyir mjir Israila ni. Kəlara bwar vəi fəli ni tə gə pəla ga ata baɗitə mwa ka mzhitə vəi tə takulashayeri ni ata, ga ata mwa mnyar pci pal. Tsuwa takulashayeri ku tsaɓəngkərdzi ata kəra nvwa ɗa har tə nalkurər ɗa ata di ni ku mwantə dzar tsi suɗa.

³²Antə mji ni ku dli ləɓəla, ka ɓukci, ka pi, ka jaktə ɓukci akwa tsaptə takulashayeri ni. Mda aɗi akwa nca ɗa na tsaptə takulashayeri raka ta thlambəl na ol'ola kuma wa. Antə da titili ɗa aɓəla akwa shanga vəi na kalaktə vəi fəliyir ɗa ni ka da ula.

³³Amma sakatə kum ni tsu akwa mnya ɗa, akəmata da ndasi, təng ɗəffa MTHLAKU ku thlata ata kəra mji ni, antə tsa ku tsa ɗa ka shilku na mwavər.

³⁴Apani antə mda ana kəga thləma vəi nda Kibroth Hattaava, watau “Kulər Mjir Ngguka.” Kamnyar anda antə da harəmta mjir nggukə ni.

³⁵Antə mji ni ku thlatə kazhar Kibroth Hattaava, ka təra mwari ahar Hazeroth, ka fəli anda.