Read bura-pabir Jikayeri 12 Bible Online

Jikayeri 12 - bura-pabir bible

Jikayeri 12

¹Maryamu ka Haruna pəlangkər aka Musa ata kəra mwalarni na ngkwar mjir Kush tə tsa kəl ni, kamnyar tsa ku kəl ngkwar tsəɗi mjir Kush.

²Da pəla, “Tar Musa antə MTHLAKU gari ka tsa daci ya? Ar mwa tsa aɗi gari ka mwa wa ya?” Tsuwa MTHLAKU ku nggatə su tə da akwa pəlari.

³Tsuwa Musa an mdə na ka tərghəi kər swaiswai, təramta shanga mji na akwa duniya.

⁴Təkəma təng MTHLAKU pəla aka Musa, ka Haruna, ka Maryamu abbər, “Səɓəla giri, giri ngəni makər ni, ka giri si adzə Tentər Kəɓa.” Antə da na makər ni ku səɓəla.

⁵Antə MTHLAKU ku səghəi akwa dlamba ka thləthlata anyarmbwar Tent ni, ka kəga Haruna ka Maryamu. Antə japwa ɗa ku shahədzi kudzəhə ka nyarmbwa ni.

⁶Antə tsa pəla, “Psi gir thləma giri aka su tə I ata pəlari. “I an MTHLAKU. Ma naɓi aɗi akwa nca giri, I ana ncantə kərna alari akwa wulsu, kəi gari ka tsa akwa suni.

⁷Amma aɗi apani antə I ana hara aka buɗarna Musa wa, arni I ku hamta alari shanga mjirna.

⁸I ana gari ka tsa nca ka nca, aɗi akwa karapu wa, amma ata bəbal. Arni kam, tsa ana wutə dludzər MTHLAKU! Apani kamnyar mi tə giri aɗi akwa thlivər pəlangkər aka Musa na mafarna wa ri?”

⁹Antə ɗəffa MTHLAKU ku ɓzi ka duna ata kəra ɗa, tə tsa ku təra kazhar ɗa.

¹⁰Sakatə dlamba ni ku tərardzi kazhar kəra Tent ni, təng təkəma shilkər kəsəm dza hartə dza Maryamu, tə tsa ndzi mwapu shalaku apa mpur puwa. Sakatə Haruna shinardzi təbwar Maryamu, təng tsa wutə ni ka shilkər kəsəm dza.

¹¹Antə Haruna pəla aka Musa, “Mdərkəi, usa ga aɗiya ɗi yeru kamnyar bikər cakukur tə yeru hara ni wa.

¹²Ga aɗiya hir ka tsa ndzi apa ɓzəngkyar na səghəi mshi wa, na ka retar dzari hiɗahiɗari sakatə tsa səɓəla akwa kuta mama'ni wa.”

¹³Antə Musa ku tuwa aka MTHLAKU abbər, “I akwa kiɗə nga usa Hyel ka gə mbantə ni!”

¹⁴Amma MTHLAKU pəla aka Musa, “Ma abbər baba'ni an tiftə mtili ata kəmari, tsa aɗi ata hara vir murfa akwa sur səli ni wa ya? Apani ka mdə kəɓəla ni kazhar vəi fəli ni, ka tsa hara vir murfa ata hildi katagu. Aghəla nda mda ata mzhi jaktə ngka ka tsa avi.”

¹⁵Antə mdə ku kəɓəla Maryamu ka mwantə ni ata hildi, tə tsa hara vir murfa anda. Tsuwa mji ni aɗi thlatə ka təra wa, tar sakatə mdə ngka ka Maryamu.

¹⁶Aghəla nda antə mji ni ku thlatə kazhar Hazeroth, ka təra mwari akwa Mtakər Paran, ka fəli anda.