Read bura-pabir Jikayeri 13 Bible Online

Jikayeri 13 - bura-pabir bible

Jikayeri 13

¹Antə MTHLAKU ku jaktə gari aka Musa abbər,

²“Thlentə mji ka da ra wul ashira tsəɗi Kanana, natə I akwa na aka mjir Israila ni. Akwa kəlara nyarmbwar mjir kəkar ɗa, ga ata carɓəla mdə pal akwa nca mji na ol'olər ɗa ka gə thlenta.”

³Antə tsu anda akwa Mtakər Paran ni Musa ku carɓəla mji na ol'olər mjir Israila ka thlentə ɗa ahar Kanana, tsu apatə MTHLAKU ku tsawa.

⁴Nggədza thləma ɗa, akwa nyarmbwar Ruben, Shammuwa na ɓzər Zakkur,

⁵akwa nyarmbwar Simeyon, Shafat na ɓzər Hori,

⁶akwa nyarmbwar Yahuda, Kaleb na ɓzər Yefunne,

⁷akwa nyarmbwar Issakar, Igal na ɓzər Yusuf,

⁸akwa nyarmbwar Ifrayim, Hosheya na ɓzər Nun,

⁹akwa nyarmbwar Benjamin, Palti na ɓzər Rafu,

¹⁰akwa nyarmbwar Zebulun, Gaddiyel na ɓzər Sodi,

¹¹akwa nyarmbwar Manasse, watau pal akwa nca nyarmbwar Yusuf, Gaddi na ɓzər Susi,

¹²akwa nyarmbwar Dan, Ammiyel na ɓzər Gemalli,

¹³akwa nyarmbwar Asher, Sethur na ɓzər Mikayel,

¹⁴akwa nyarmbwar Naftali, Nabi na ɓzər Vofsi,

¹⁵akwa nyarmbwar Gad, Geyuwel na ɓzər Maki.

¹⁶Nayeri ni an thləma mji tə Musa ku thlentə ɗa ka da ra wul ashira tsəɗi ni. Amma Musa ku pali thləm aka Hosheya na ɓzər Nun, tə thləmari ku ndzi Joshuwa.

¹⁷Antə Musa thlentə ɗa ka da ra wul ashira tsəɗi Kanana, ka pəla ala ɗa, “Ma giri ku thlata azi, ka giri nu təbwar Negev təbwar yala, ka giri ndləɓəla ka mwari akwa bwar garayeri na akwa tsəɗi ni.

¹⁸Ka giri wulɓəla laku tə tsəɗi ni akwa, ka laku tə mji ni akwa, wala da hang wala da raka, ka wala da mji na ka duna, wala da kula duna.

¹⁹Ka giri wulɓəla laku tə tsəɗi ni akwa, wala tsa tsəɗi na ɓɗaku wala tsa aɗi ɓɗaku wa. Tsuwa ka giri wulɓəla jili bərni tə da akwa, wala da an bərniyayeri na akwa katangga, wala kula katangga.

²⁰Ka giri wulɓəla laku tə həyir di ni akwa, wala tsa həi na ata ya su, wala tsa aɗi ata ya su wa, wala tsa ka kuɓər nfwa, wala aɗi wa. Ka giri hara apatə duna giri amzha, kamnyar ka giri wuta abbər giri ku si ka yar nfwayeri laga ar tsəɗiyir ɗa ni ka mburu wuta.” Nggədza akwa saka ngəni antə yar nfur anap akwa baɗitə ng'ha.

²¹Antə da ku təra ra wul ashira tsəɗi ni, baɗita akwa Mtakər Zin har ka mwanta adzə Rehob, kudzəhə ka Lebo Hamath təbwar yala.

²²Antə da ndləɓəla atar Negev har ka si ahar Hebron, vəi tə mjir nyarmbwar Anak andzəndzi akwa, watau Ahiman, Sheshai ka Talmai. Da an nyarmbwar mji na gurjam gurjam. Mdə nthlə di Hebron ni məva murfa akəmata mda anthlə Zowan na akwa tsəɗi Masar.

²³Sakatə da mzhitə Mular Eshkol, antə da nthləi tsiya nfur anap laga na ka yar anap ni ata gwandzal pal. Gwandzal ngəni an kəgəɓu ka duna har tə sai ka mji suɗa an kəta ata zwal akwa daɓwa ɗa. Tsuwa da ku ɗəmtsa yar rumman ka kamnda ka si kəgari.

²⁴Antə mdə ku kəga thləma vəi ndaga Mular Eshkol, watau gwandzal anap, kamnyar gwandzal anap na ola tə mjir Israila na ra wul ashir nthləi anda ni.

²⁵Aghəla tə da hara vir nfwarkumari akwa wul ashira tsəɗi ni antə da ngka

²⁶adzə Musa ka Haruna, ka shanga mjir Israila, akwa Mtakər Paran akwa Kadesh. Antə da ngkərɓəla shanga suayeri tə da wuta, ka ncanta ala ɗa jili yar nfur mjir tsəɗi nda.

²⁷Da pəla aka Musa, “Yeru ku mwari akwa tsəɗi tə ga ku thlentə yeru akwa ni, ka wulɓəla shanga su na aɗi. Jiri, tsəɗi ni an tsəɗi na ɓɗaku, na ata ya su. Nggədza jili yar nfur tsəɗi ni tə yeru si kəgari.

²⁸Amma mjir tsəɗi ni da mji na ɓəɓal ka duna, ka bərniyayeri arɗa ol'ola tə mdə kalakta akwa katangga. Tsuwa yeru ku wutə mjir nyarmbwar mji na gurjam gurjam ni, watau mjir nyarmbwar Anak ni anda.

²⁹Tsuwa mjir Amalek an akwa ndzi akwa Negev. Antə Mjir Hitti, ka mjir Yebusi, ka mjir Amor shang akwa ndzi akwa tsəɗi garayeri. Mjir Kanana tsuwa akwa ndzi kudzəhə ka Manda Meditereniya, ata mnya Thlyagha Jodan.”

³⁰Antə mji baɗitə nggungguni ata kəra Musa, amma Kaleb ku vu tə da ku ndzi ɗiɗi, ka pəla, “Mbura təra ka mburu ra pungkərdzi ala ɗa ka mpa, ka mburu dlutsə tsəɗi ni, kamnyar mburu ata mzhi dlərəmta ɗa.”

³¹Amma mji tə da mwari ata kəma duku kəga tsa ni shinau alari ka pəla, “Ama ja! Mburu aɗi ata mzhi dlər ɗa wa, kamnyar da ku təramta mburu ka duna!”

³²Antə da ku ndəkəmta ndərayeri na ɗimi aka mjir Israila ata kəra tsəɗi tə da ra wul ashirari ni. Da pəla, “Tsəɗi natə yeru mwari akwa kamnyar wul ashirari ni, ma mdə na ku ləkwa, ata ndzi mwavər alari ka tsa mzhi səɓəla ka mpika, kamnyar shanga mji tə yeru wuta anda ni an mji na gurjam gurjam.

³³Har ma yeru ku wutə gurjamayeri na akwa nyarmbwar Anak anda. Təng yeru akwa wul kər yeru apa hawayeri an adzə ɗa daci, tsuwa apani antə da akwa wul yeru.”