Read bura-pabir Jikayeri 14 Bible Online

Jikayeri 14 - bura-pabir bible

Jikayeri 14

¹Aghəla tə shanga mjir Israila ku nggatə labar akəla mji kumnya suɗa na ra wul ashira tsəɗi Kanana ni, antə vir nda da pi pari akwa tuwa ka kuraku.

²Antə shanga mjir Israila na tsaptədzi ni ləkwa nggungguni aka Musa ka Haruna, da pəla, “Ai kuji ma mburu an mtəmtadzi tsu akwa Masar! Ai ma mburu an mta akwa mtaku ni ma ku təramta ala mburu!

³Kamnyar mi tə MTHLAKU səntə mburu akwa tsəɗi ngəni, ka mji kurəmta mburu ka katsakar ri? Tsuwa ka mji fatə mwankir mburu kəga maɗankyar mburu na raka raka akwa mpa! Aɗi kuji ka mburu jaktə ngka akwa Masar wa maɗa'a?”

⁴Antə da pəla aka nvwa ɗa, “Sər giri abwani ka mburu carɓəla mdə na ata pwar mburu ka mburu ngka akwa Masar!”

⁵Antə Musa ka Haruna ku pəpəyimta ka kəma ɗa ata di akəma dlamar mjir Israila na tsaptədzi.

⁶Antə Joshuwa na ɓzər Nun ka Kaleb na ɓzər Yefunne, na akwa nca mji na mwari akwa wul ashira tsəɗi ni, kukwahəmta ləptər ɗa kamnyar ɗəffa ɗa na ɓza.

⁷Antə da pəla aka shanga mjir Israila na tsaptədzi ni abbər, “Tsəɗi tə yeru dlarha akwa wul ashirari ni, tsa an tsəɗi na ɓɗaku ka duna.

⁸Ma abbər MTHLAKU an akwa nggatə msərakur mburu, tsa ata mwantə mburu akwa tsəɗi ni, ka hamta ala mburu tsəɗi ngəni na ɓɗaku, na ata ya su ni.

⁹Su duku na aɗi, an giri aɗiya hara kər ɓəɓalkur aka MTHLAKU wa, tsuwa giri aɗiya thlivər mjir tsəɗi ngənda wa. Kamnyar mburu ata səməmnya ɗa kasəla. Kamnyar MTHLAKU adzə mburu, tsuwa tsa ku kurtə nggyari haptayeri na ana wul kəra ɗa ni. Antə giri aɗiya thlivər ɗa wa.”

¹⁰Antə shanga mji na tsaptədzi ni baɗitə gari abbər ka da ndzəndzəh ɗa ka pela. Təng təkəma kula səndər ɗa parakər səliyir MTHLAKU kəlardzi aka mjir Israila ata kəra Tentər Kəɓa ni.

¹¹Antə MTHLAKU pəla aka Musa, “Nawa antə mji ngəni ata sə zhar rutə ra nə ri? Nawa antə da ata sə mbərsa ka iya ri, ata kəra surndatayeri tə I harata akəma ɗa ni?

¹²I ata nggəlar ɗa, kəi tsa ɗa ka nggawakur na mwavər. Amma ar nga I ata hara ka mji laga thlata akwa nyarmbwar nga, mji na ata sə təramta ɗa ka olkur japu ka kuthlikur.”

¹³Amma Musa pəla aka MTHLAKU, “Gə ka kəra ga an səɓəla ka mji ngəni akwa Masar ka dunar kuthlikur nga. Ai ma har mjir Masar nggatə labar ngəni,

¹⁴da ata pəla aka mjir tsəɗi Kanana. Kamnyar mjir Kanana ni ku kurtə nggata abbər yeru an mjir nga, har ga ku ncantə kər nga ala yeru nca ka nca. Da ku nggata abbər dlambar nga ku thləthlata abwa kəra yeru, ka nggatə laku tə ga akwa pwar yeru ka dlambar ləmbəku təpci, ka pwar yeru ka dlambar u'u aviri

¹⁵Antə kulini ma ga ku kurəmta yeru, mjir duniya na ku nggatə labar ata kəra ga ata pəla,

¹⁶‘Ai kamnyar MTHLAKU aɗi mzhi mwantə mjirni ni akwa tsəɗi tə tsa hara ala ɗa alkawalari wa, an su na hara tə tsa kurəmta ɗa akwa mtaku ni.’

¹⁷Antə MTHLAKU, I akwa kiɗə nga abbər ka gə ncantə dunar kuthlikur nga na ol ni ata bəbal apatə ga ku kətə alkawalari. Kamnyar gə pəla,

¹⁸“Gə na MTHLAKU aɗi ana huvər kəl ɗəffu wa, gə hir mji ka duna ka hirkur na ana palidzi wa, tsuwa ga ana yafitə biku ka kər ɓəɓalkur. Amma ga aɗi ana zhar ɗi mdər biku wa, ga ana ɗi maɗankyar kamnyar bikər mjir yar ɗa, ba akwa zaman na makərkur ka na nfwarkur.”

¹⁹“Antə I akwa kiɗə kəra ga, abbər kamnyar hirkur nga na ana palidzə wa, ka gə tifəmta bikər mji nayeri ni ala ɗa, apatə ga ana tifəmta ala ɗa bikər ɗa təng tə da akwa Masar har ba kulini.”

²⁰Antə MTHLAKU pəla aka Musa, “I ku yafitə ɗa apatə ga ku kiɗa.

²¹Amma wala apani, apatə I aɗi, ka apatə səliyirna ku nghyantə shanga duniya,

²²mda aɗi wala pal akwa nca mji ngəni na ata ləkwa tsəɗi tə I kətə alkawalər hamta ala ɗa ni wa. Kamnyar wala tə da ku wutə səliyirna ka surndatayeri natə I harata akwa tsəɗi Masar ka akwa mtaku, da ku nggəlar ta kələngkər ali ka ləkəma akwa ngkərtə ra har ka kuma.

²³Antə mda aɗi akwa nca ɗa wala duku na ata wutə tsəɗi natə I kahyel ar hamtari aka kəkayeri arɗa ni wa. Kəlara mdə na ku rutə ra tsa aɗi ata ləkwa tsəɗi ni wa.

²⁴Amma I ata səntə Kaleb na mafarna akwa tsəɗi tə tsa mwari ka wulɓəla ashirari ni, tsa ka mjir nyarmbwarni ka da ndzi mthlakari, kamnyar arni halərni zum ka mambila mji, tsuwa tsa ku nu ra ka ɗəffari duku.

²⁵Antə kulini, təng tə mjir Amalek ka mjir Kanana akwa ndzəndzi akwa mularayeri ni, ma ɗəpa ka giri ngka, ka giri mwari akwa mtaku təbwar Manda Duwathlu.”

²⁶Antə MTHLAKU pəla aka Musa ka Haruna abbər,

²⁷“Nawa antə mji ngəni kəmanggar ni ata sə zhar nggungguni ata kəri nə ri? Nggungguniyir mjir Israila ni ku mzhi ra apani!

²⁸Antə ka giri pəla ala ɗa abbər, ‘I na MTHLAKU ku kahyel abbər apatə I aɗi, su tə giri pəla ali antə I ata harari ala giri.

²⁹Giri ata kurəmtadzi pal pal akwa mtaku ngəni. Akwa nca mji tə mdə jikatə ni, shanga giri na ku mwantə məva sərkumari ka ləmta, giri na ku nggungguni ata kəri ni,

³⁰mda aɗi wala duku na ata ləkwa tsəɗi natə I kahyel abbər tsa ata ndzi vəi ndzəndziyir giri ni wa, tar Kaleb na ɓzər Yefunne ka Joshuwa na ɓzər Nun.

³¹Amma maɗankyar giri na raka raka, natə giri pəla mda ata sə fatə ɗa akwa mpa ni, da antə I ata sə mwantə ɗa akwa tsəɗi tə giri akwa rutari ni.

³²Amma ar giri, giri ata mtəgəmtadzi, ka mshiyir giri ndəktə kuta mtaku ni leɓleɓu.

³³Tsuwa maɗa' giri ata kəɗar kadla akwa mtaku ni har məva nfwarkumari, ka da ɗar bwani kamnyar ndzi kula jirkur tə giri hara, har tar ma mdə na aghəlta shang akwa nca giri ku mti tsu akwa mtaku ni.

³⁴Giri ata ɗar bwani kamnyar bikər giri har məva nfwarkumari, kalkal ka hangkur vir tə giri kəta akwa wul ashira tsəɗi ni, watau mda ata kətə kəlara vir pal ata kəra məva pal. Apani antə giri ata səndə mwavərkur su na akwa ɓzamtə ɗəffi.

³⁵I na MTHLAKU an pəla. Antə jiri I ata haratari ata kəra giri, shanga giri na kəmanggar, na ku paktə mnya giri ata kəri. Akwa mtaku ngəni antə giri ata kura karkar, shanga giri ata mtəgəmtadzi.’ ”

³⁶Antə mji natə Musa thlentə ɗa ka da ra wul ashira tsəɗi nda, mji na ngka ka vu tə mji baɗitə nggungguni ata kəra MTHLAKU kamnyar labar na ɗimi tə da hamta ata kəra tsəɗi ni,

³⁷da antə MTHLAKU vu tə shilku laga na mwavər ku ngkəgəi ɗa, ka kurəmta ɗa ni.

³⁸Akwa nca mji na ku mwari akwa wul ashira tsəɗi ni, təng Joshuwa na ɓzər Nun ka Kaleb na ɓzər Yefunne an mbiləmta ka mpika.

³⁹Sakatə Musa pəla aka shanga mjir Israila su tə MTHLAKU pəla, antə ɗəffa mji ni ku ɓzi ka duna.

⁴⁰Səɓəla ɗəpari antə da dli thlatə ɗəɗəpə mbing ka baɗitə ndləɓəla akwa bwar garayeri ar tsəɗi Kanana, akwa pəla, “Nggədza mburu azi, ɗəmhəɗəmhari kamnyar mwari akwa vəi tə MTHLAKU hara alkawalər hamta ala mburu ni. Mburu ku kələngkər abbər mburu ku hara biku.”

⁴¹Amma Musa pəla, “Man hara tə giri akwa nggəlar kələngkər aka tsawur MTHLAKU nə ri? Su ngəni aɗi ata hara wa!

⁴²Giri aɗiya mwar wa, kamnyar MTHLAKU aɗi ata vəi duku kəga giri kulini wa. Antə dawayeri ar giri ata nggyari giri.

⁴³Kamnyar mjir Amalek ka mjir Kanana an ata dlu giri ka mpa, antə da ata kurəmta giri ka katsakar. Kamnyar giri ku shinardzi kazhar nu MTHLAKU, antə apani tsuwa tsa aɗi ata vəi duku ka giri wa.”

⁴⁴Amma wala apani tsu da hara nggyarɗəkur, ka ləkwa ndləɓəla akwa bwar garayeri na akwa tsəɗi nda, wala tə Akwati Alkawal ar MTHLAKU, wala Musa aɗi thlatə kazhar vəi fəliyir ɗa ka pwa akəma ɗa wa.

⁴⁵Apani antə mjir Amalek ka mjir Kanana na akwa ndzəndzi akwa garayeri ar tsəɗi nda, ku səghəi ka nggyari ɗa akwa mpa ka kədləmta ɗa har ka pudza aka Horma.