Read bura-pabir Jikayeri 15 Bible Online

Jikayeri 15 - bura-pabir bible

Jikayeri 15

¹Antə MTHLAKU pəla aka Musa

²ka tsa pəla aka mjir Israila abbər, “Ma sakatə giri ku ləkwa tsəɗi tə I akwa hamta ala giri ni ka ndzəndzi akwa,

³ka giri nu suayeri ngəni. Ma giri ata hamta saɗaka mbamba aka MTHLAKU, wala saɗaka tə mda ana hamta ata u'u kamnyar hamta shiwur na msəra aka MTHLAKU, ka giri hara ka mwaɓi tə giri kəɓəla akwa ciɓər thla, wala ar kwi, wala təma. Ma an saɗaka mbamba, wala ar nghyaɓəla alkawal tə giri kəta, wala saɗakar hirər ɗəffu, wala ar sakar kucali tə mdə thlamta,

⁴kəlara mdə na ata hamta saɗaka aka MTHLAKU, ka tsa səntə saɗakar mpu na liktikti tasa pal hərhərari ka mal zaitun kwalɓa pal.

⁵Tsuwa ma saɗaka mbamba tə mda ata harari ka ɓzər gam, ka mdə paktə ka saɗakar yimər anap kwalɓa pal kamnyar saɗakar sur sa.”

⁶“Ma saɗaka mbamba tə mda ata harari ka gam, ka mdə paktə ka saɗakar mpu na liktikti tasa suɗa hərhərari ka mal zaitun kwalɓa pal ka reta,

⁷ata kəma duku ka yimər anap kwalɓa pal ka reta, kamnyar saɗakar sur sa. Antə saɗaka ngəni ata hamta shiwur na msəra aka MTHLAKU.”

⁸“Ma sakatə giri ata hamta saɗakar gyal ar giri aka MTHLAKU apa saɗaka mbamba, wala saɗaka laga, wala saɗakar nghyaɓəla alkawal, wala saɗakar jakə mwardzi,

⁹ka mdə paktə gyal ni ka saɗakar mpu na liktikti tasa makər tə mdə hərtə ka mal zaitun kwalɓa suɗa.

¹⁰Tsuwa giri ata hamta yimər anap kwalɓa suɗa kamnyar saɗakar sur sa. Antə saɗaka tə mdə hamta ata u'u ni ata ndzi sur shiwura na msəra aka MTHLAKU.”

¹¹“Apani antə mda ata hara ka kəlara gyal, wala gam, wala ka kəlara ɓzər təma, wala ɓzər nciwu natə mda ata hamtari.

¹²Kalkal ka hangkur su tə mdə thlamta abbər tsa ata hamtari, antə tsa ata hara ka kəlara pal akwa nca ɗa.

¹³Shanga maɗa' tsəɗi Israila ata nu suayeri ngəni akwa lakwari, akwa sakatə tsa akwa hamta saɗaka ata u'u, antə saɗaka ni ata hamta shiwur na msəra aka MTHLAKU.

¹⁴Tsuwa ma mətəpi na ka ndzi akwa nca giri, wala na ata ɗarndzi raka, wala na si ka ndzi, ma tsa ata bara ka tsa hamta saɗaka ata u'u, saɗaka na ata shiwur msəra aka MTHLAKU, antə tar ka tsa nu suayeri ni kalkal apatə giri ana hara.

¹⁵Antə shanga mji ata nu jili tsawa duku, wala tsa mdər tsəɗi wala tsa an mətəpi na akwa nca giri. Antə tsawu ngəni ata ndzi ala giri ba saka madi akwa shanga zamanayeri ar giri. Kamnyar giri, ka mətəpi na ka ndzi akwa nca giri, shanga giri an su duku akəma MTHLAKU.

¹⁶Tsawu duku, tsuwa surthlipə duku an aɗi aka mdər tsəɗi, ka aka mətəpi na ka ndzi akwa nca giri.”

¹⁷Antə MTHLAKU pəla aka Musa

¹⁸ka tsa pəla aka mjir Israila abbər, “Ma sakatə giri ku ləkwa tsəɗi tə I akwa mwantə giri akwa ni,

¹⁹ma sakatə giri ata bara səm susəma ar sur faku, ka giri kəɓəla bwa laga akwa susəm ni, ka giri hamta ni apa saɗaka aka MTHLAKU.

²⁰Mpur mthli tə giri hadli ntangkəma, antə giri ata ɓwatə kek kəgari, ka giri hamta ni saɗaka aka MTHLAKU. Giri ata hamta ni tsu apatə mda ana hamta saɗakar mthli tə mdə dəka ata lali.

²¹Giri ata ləkəma ka hamta mpur mthlir giri aka MTHLAKU akwa shanga zamanayeri ar giri, mpur mthli natə giri hadli ntangkəma.”

²²“Amma ma su laga ku hara tə mdə laga aɗi mzhi ɓəlatə shanga tsawayeri tə MTHLAKU pəla aka Musa ni wa, tə tsa ku ɓəli

²³wala an pal akwa nca tsawayeri tə MTHLAKU hamta ala giri atar Musa, akwa shanga zamanayeri ar giri,

²⁴ma mdə ku nggaɓəla abbər jiri tsa aɗi hara dzakdzakku wa, tsuwa kula səndər mji, to ka shanga mji hamta ɓzər gyal pal saɗaka mbamba, antə saɗaka ni ata hamta shiwur na msəra aka MTHLAKU. Mda ata hamtari ata kəma duku ka saɗakar mpur mthli, ka saɗakar sur sa, kalkal apatə mdə ku thlamta. Tsuwa mda ata hamta nciwa pal kamnyar saɗakar kəcimta biku.

²⁵Antə prist ata hamta saɗakar kələmta watsəɓər biku kamnyar shanga mjir Israila, antə mda ata yafitə ɗa. Kamnyar da aɗi hara dzakdzakku wa, tsuwa da ku səntə saɗakar ɗa, saɗaka tə mdə hamta ata u'u aka MTHLAKU, ka saɗakar kəcimta biku kamnyar vəi shar ɗa.

²⁶Antə mda ata tifəmta bikər shanga mjir Israila ka mətəpi na ka ndzi akwa nca ɗa, kamnyar shanga mji ku kar ka hara biku ngəni.”

²⁷“Ma mdə duku an kar ka hara biku ni, tar ka tsa hamta malgum na ka məva pal, kamnyar saɗakar kəcimta biku.

²⁸Antə prist ata hamta saɗakar kələmta watsəɓər biku aka MTHLAKU kamnyar mdə na hara biku karkar ni, antə mda ata tifəmta alari.

²⁹Tsawu jili duku antə shanga mji na hara biku na karkara ata nuwari, wala tsa an mdər Israila, wala tsa an mətəpi na ka ndzi akwa nca giri.

³⁰Amma kəlara mdə na ku hara biku dzakdzakku, wala tsa an mdər Israila, wala tsa an mətəpi, tsa ku hara biku aka MTHLAKU. Antə mda ata kədləɓəla ni kazhar mjirni.

³¹Kamnyar tə tsa ku rutə ndərər MTHLAKU, ka ɓəli tsawurni, antə mda ata kədləɓəla ni kazhar mjirni. Antə watsəɓər bikərni ata ndzi ata kərari.”

³²Sakatə mjir Israila akwa mtaku, antə da ku wutə mdə laga akwa mbwa udzəm Vir Ghərəmtaghəra na ar sati.

³³Antə mji na wutə ni akwa mbwa udzəm ni ngkəi ni ka səntə ni aka Musa, ka Haruna, ka shanga mji na anda.

³⁴Antə da ku hartə ni akwa mbwa laga, kamnyar mda aɗi nggaɓəla su tə mda ata hara alari katagu wa.

³⁵Antə MTHLAKU pəla aka Musa, “Ka mdə tsi mdə ni, ka shanga mji ndzəndzəhtə ni ka pela aɓəla ata hildi.”

³⁶Antə shanga mji ku kəɓəla ni ka mwantə ni ata hildi, ka ndzəndzəhtə ni ka pela har tə tsa ku mti, tsu apatə MTHLAKU ku tsawa aka Musa.

³⁷Antə MTHLAKU pəla aka Musa,

³⁸ka tsa pəla aka mjir Israila abbər, “Ka giri putə bugzər ata mnya ləptayeri ar giri akwa shanga zamanayeri ar giri. Giri ata ndəli bugzərayeri ni ata tengayerari ka puwar lipəla.

³⁹Antə bugzərayeri ni ata ndzi ala giri apa sur ɗangta. Kəlara sakatə giri ku wutə ɗa, giri ata ɗangtə shanga tsawayeri ar MTHLAKU, ka giri ɓəlatə ɗa. Atar apani antə giri aɗi ata zhar ra ka nu su tə ɗəffa giri hir wa, wala su tə nca giri mwaɓtə wa, kamnyar an su tə hangkala giri nuta.

⁴⁰Apani antə giri ata ləkəma ka ɗangtə tsawayeri arna ka giri ɓəlatə ɗa, tsuwa ka giri hamta kəra giri swakti ali, I na Hyelər giri.

⁴¹I an MTHLAKU na Hyelər giri, na fwaɓəla giri akwa tsəɗi Masar, kamnyar kəi ndzi Hyelər giri. I an MTHLAKU na Hyelər giri.”