Read bura-pabir Jikayeri 16 Bible Online

Jikayeri 16 - bura-pabir bible

Jikayeri 16

¹Vir laga Kora na ɓzər Izhar, na ɓzər Kohath, na akwa nyarmbwar Lawi, ka Dathlan ka Abiram na maɗa' Eliyab, ka On na ɓzər Peleth na akwa nyarmbwar Ruben, paktə mnya ka nggəlar olkurər Musa ata kəra ɗa.

²Da paktə mnya ka mjir Israila laga aru suɗa ka ntəfkumari, mji na ol'olər Israila natə thləma ɗa ku tuwa, mji tə mdə carɓəla akwa tsaptədzi na ola, antə da nggəlar kələngkər aka Musa na olər ɗa.

³Da tsaptədzi ka paktə mnya ɗa ata kəra Musa ka Haruna, ka pəla ala ɗa abbər, “Giri ku təra ciju kamta! Kamnyar ai shanga mji na tsaptədzi azi ni, shanga ɗa ɓɗakkarkara, tsuwa MTHLAKU ata ndzi adzə ɗa. Kaha, kamnyar mi tə giri akwa namtə kər giri apa giri təramta mambila mjir MTHLAKU nə ri?”

⁴Sakatə Musa nggatə su ngəni, antə tsa ndla ka kəmari ata di.

⁵Antə tsa pəla aka Kora, ka shanga mjirni abbər, “Ɗəpə ɗəɗəpa, MTHLAKU ata ncaɓəla ala mburu mdə na arni, natə mdə ku namtə ni kəcəkəcari, ka vu ni ka tsa mzhi mwari adzə ni kudzəha. Mdə natə tsa ku carɓəla, antə tsa ata zhar ni ka tsa si adzə ni kudzəha.

⁶Antə gə na Kora ka mjir nga, nggədza su tə giri ata harari. Ma ɗəpa ka giri fatə tasayeri ar mba tulari ɗuza.

⁷Ka giri pu u'u akwa kuta ɗa, ka pungkər tulari ɗuza akəma MTHLAKU. Apani antə mburu ata wutə mdə tə MTHLAKU ku carɓəla, tsa an mdə tə Hyel ku namtə ka tsa ndzi kəcəkəcari arni. Giri na mjir Lawi, giri ku təra ciju kamta!”

⁸Antə Musa ləkəma ka pəla aka Kora abbər, “Kulini psi giri thləma giri, giri na mjir Lawi!

⁹Apa daraja tə MTHLAKU na giri atar carɓəla giri akwa nca mambila mjir Israila ni ku hara raka ala giri kamtə ya? Nənga giri akwa wula apa daraja na raka tə MTHLAKU zhar giri ka giri si kudzəhə ka tsa kamnyar ka giri hara alari kəthlər akwa Tentərni nə ri? Nənga giri akwa wula apa tsa su na raka ri tə MTHLAKU zhar kəthlər arni akwa tsiya giri ata vəya mambila shanga mji?

¹⁰MTHLAKU ku kələngkər ala gə ka gə si kudzəhə ka tsa, shanga maɗa'ma nga na mjir Lawi. Amma ba kulini aɗi mzhi ngə wa, har ga akwa bara kəthlər ar pristkur!

¹¹Antə sakatə ga ka mjir nga akwa nggungguni ata kəra Haruna ni, giri akwa nggungguni ata kəra MTHLAKU! Kamnyar Haruna ni mə laga ri tə har giri ata nggungguni ata kərari ni?”

¹²Antə Musa ku thlentə ka mdə kəga alari Dathlan ka Abiram na maɗa' Eliyab. Amma da pəla, “Yeru aɗi ata mwar wa!

¹³Aɗi mzhi apani wa ya, tə gə fwaɓəla yeru akwa tsəɗi na ɓɗaku, na ata ya su, kamnyar ka gə kurəmta yeru akwa mtaku ni? Ngəni tsuwa ga akwa bara ka gə hara kuthlikur ata kəra yeru ya?

¹⁴Nggədza ma, ga aɗi səntə yeru akwa tsəɗi na ɓɗaku, na ata ya su jiri wa, wala na ala yeru fakəu ka fakayeri ar anap ka da ndzi ar yeru wa. Gə namtə yeru apa yeru mdlyang ya? Yeru aɗi ata mwari ja wa!”

¹⁵Antə ɗəffa Musa ku ɓzi ka duna, tə tsa pəla aka MTHLAKU, “Ga aɗiya dlu sur hamta ar mji ngəni wa. I aɗi ɗar ɓzamtə su aka wala pal akwa nca ɗa wa, zhar ka mdə pəla abbər I ku dlutsə wala an kwara akəla ɗa wa!”

¹⁶Antə Musa pəla aka Kora abbər, “Ɗəpə ka giri ka mjir nga, si akəma Tentər vəngkər səli aka MTHLAKU, antə ta gə ya, ta da ya, ta Haruna ya, shang ka giri wutədzi anda.

¹⁷Ka kəlara mda akwa nca giri na aru suɗa ka ntəfkumari ni, kətə hahəi mba tulari ɗuza arni, ka tsa pu tulari ɗuza ni akwa kutari, ka tsa hamta ni aka MTHLAKU. Antə wala giri ka Haruna, ka waskəi kətə tasarni ar mba tulari ɗuza.”

¹⁸Antə waskəi ku kətə tasarni ar mba tulari ɗuza, ka pu u'u, ka pungkər tulari ɗuza ni ata kər, ka thləthlata anyarmbwar Tentər Kəɓa ata kəma duku kəga Musa ka Haruna.

¹⁹Akəmata nda, Kora ku kurtə thlentə hangkala shanga mji ata kəra Musa ka Haruna, antə shanga ɗa ku si ka tsaptədzi abwakəma nyarmbwar Tent ni. Antə parakər səliyir MTHLAKU ku kəlardzi aka shanga mji.

²⁰Antə MTHLAKU pəla aka Musa ka Haruna abbər,

²¹“Shaɓəla girdzi kazhar mji ngəni, kəi kurəmta ɗa ata kəma duku azi akwa məcikər nca.”

²²Amma Musa ka Haruna ku ndla ka kəma ɗa ata di ka pəla, “Hyel, ga an Hyel, akəla ga antə mpika shanga su na ka mpika wutədzi. Ma mdə duku an ɓzamtə ɗəffa ga, ɗəffa ga ata ɓza ata kəra shanga mji ya?”

²³Antə MTHLAKU pəla aka Musa abbər,

²⁴“Pəla aka mji ka da sharardzi ciju ta tentər Kora, ka Dathlan, ka na ar Abiram.”

²⁵Antə Musa ku thlata akwa mwari adzə Dathlan ka Abiram, antə mji ol'olər Israila ku nutə ni.

²⁶Antə Musa pəla aka mji ni abbər, “Shaɓəla girdzi kazhar tentayeri ar mji ngəni kəmanggar ni, tsuwa giri aɗiya tsəkwar wala su pal akwa nca suayeri arɗa wa, ta mda asə kurəmta giri kamnyar shanga bikayeri arɗa.”

²⁷Antə mji ni ku sharardzi kazhar tentayeri ar Kora, ka Dathlan ka na ar Abiram. Antə Dathlan ka Abiram ku səɓəla ka thləthlatə kəga mwankir ɗa, ka maɗankyarər ɗa, kəga maɗankyar na raka raka, anyarmbwar tentayeri arɗa.

²⁸Antə Musa pəla aka mji ni, “Akwa laku ngəni antə giri ata sənda abbər MTHLAKU an thlentə ra, kəi hara suayeri ngəni, aɗi I an dzamtə ka kəri abbər kəi hara ɗa wa.

²⁹Ma mji nayeri ni ku mti akwa laku tə mji ana mta akwa, wala ma su na ana wutə mji na ndzangari an wutə ɗa, to, aɗi MTHLAKU an thlentə ra wa.

³⁰Amma ma MTHLAKU ku hara su laga bilən, har tə di ku kəlar mnyari ka ndasəmnya ɗa ka shanga kariyir ɗa, tə da ku ləghəi akwa kula ka mpika, antə giri ata sənda abbər mji nayeri ni ku rutə MTHLAKU.”

³¹Antə təkəma Musa akwa kuri gari ni, təng vəi tə Dathlan ka Abiram thləthlata ata ni ntaudzi.

³²Antə di ku kəlar mnyari ka ndasəmnya ɗa kəga mjir kutakəyir ɗa, ata kəma duku ka Kora ka mjirni shang, ka shanga kariyayeri arɗa.

³³Apani antə da, ka shanga kariyir ɗa, ku ləghəi ka mpika akwa kula. Antə di ku harəngkərdzi ata kəra ɗa shang. Antə da ku sha akwa nca mji na tsaptədzi ni.

³⁴Antə shanga mjir Israila na anda ku putə hwi sakatə da nggatə ɗa akwa tuwa ka kuraku. Da pəla, “Mbura hwi diya ta di ni asə ndasəmnya mburu tsuwa!”

³⁵Antə u'u ku thlata akəla MTHLAKU ka səghəi ka mbamta mji ngəni aru suɗa ka ntəfkumari na akwa hamta tulari ɗuzə ni.

³⁶Antə MTHLAKU pəla aka Musa

³⁷ka tsa pəla aka Eleyazar na ɓzər Haruna na prist, ka tsa famta tasayeri ar mba tulari ɗuza ni kazhar vəi tə u'u mbamta mji ata ni, kamnyar tə tasayeri ni ku ndzi ɓɗakkarkara. Aghəla nda antə tsa mwari ciju kazhar vəi tə mji ata, ka puɓəla vinar u'u ni kazhar tasar mba tulari ni, ka titiləmta da ciju ciju.

³⁸Ka mdə famta tasar mba tulari ɗuza ar mji na mtə kamnyar bikər ɗa ni, ka mdə tasəmta ɗa, ka ɓdləɓəla sur hartə kəra bagaɗi kəgari. Kamnyar təng tə mdə ku hara kəthlər ka da akwa hamta saɗaka aka MTHLAKU, da ku kurtə ndzi ɓɗakkarkara. Apani antə mji na mtə ni ata ndzi apa sur tsaktə aka mambila mjir Israila.

³⁹Antə Eleyazar na prist ku fatə tasayeri ar əmza natə mji na ku kurəmtadzi ni si ka hamta. Antə mdə ku namtə ɗa tə da ndzi sur hartə kəra bagaɗi ni.

⁴⁰Antə ngəni ku ndzi apa sur tsaktə aka mjir Israila abbər ma mdə natə tsa aɗi prist wa, mdə na aɗi akwa nyarmbwar Haruna wa, to, tsa aɗiya shahədzi adzə bagaɗi abbər tsa ata mba tulari ɗuza akəma MTHLAKU wa. Kəlara mdə na aɗi prist wa amma tsa ku shahədzi adzə bagaɗi ni abbər tsa ata mba tulari ɗuza, to, su na wutə Kora an ata wutə ni. Mda hara apani ni, kamnyar an su tə MTHLAKU pəla aka Eleyazar atar Musa.

⁴¹Səɓəla ɗəpari antə shanga mjir Israila ku nggungguni ata kəra Musa ka Haruna abbər, “Giri an kurəmta mjir MTHLAKU ni.”

⁴²Amma sakatə mji ni ku tsaptədzi ka da nggəlar Musa ka Haruna, antə Musa ka Haruna ku shinar kəma ɗa dwaɗu ka Tentər Kəɓa ni. Antə dlamba ku hartə Tent ni, tə parakər səliyir MTHLAKU tsuwa ku wutədzi.

⁴³Antə Musa ka Haruna ku təra ka mwari akəma Tentər Kəɓa ni.

⁴⁴Antə MTHLAKU ku pəla aka Musa abbər,

⁴⁵“Shaɓəla girdzi ciju kazhar mji ngəni kamnyar kəi kurəmta ɗa shang ata kəma duku tsu azi təkəma.” Antə da ku ndla ka kəma ɗa ata di.

⁴⁶Antə Musa pəla aka Haruna abbər, “Kətə tasar ngə ni, ka gə pu hakthlir u'u akwa, ka gə pungkər tulari ɗuza ata kəra hakthlir u'u ni. Ka gə mwari adzə mji ni təkəma, ka gə hara su tə mdə thlamta kamnyar kələmta watsəɓər biku kəgari. Mwa taktar! Kamnyar ɗəffa MTHLAKU ku kurtə thlata, tsuwa shilku na mwavər ni ku baɗita.”

⁴⁷Antə Haruna ku kətə tasar mba tulari ɗuzə ni, ka hara tsu apatə Musa ku pəla alari, ka hwi təra mwari akwa nca mji na tsaptədzi ni, ka wutə shilku na mwavər ni ku kurtə baɗita. Antə tsa pungkər tulari ɗuza ni ata kəra hakthlir u'u ni, ka haratə suayeri tə mdə thlamta abbər ka mdə hara kamnyar kələmta bikər mji ni.

⁴⁸Antə tsa thləthlata akwa daɓwa mji na mtəmtari ka mji na ka mpikə ni, antə shilkə ni ku thləthlata.

⁴⁹Amma wala apani shilku na mwavər ni ku kurtə tsəgəi mji dəpu kumnya nfwar ka aru murfa, mda aɗi jikau mji shili na mta akwa sakar mtər Kora wa.

⁵⁰Aghəla tə shilkə ni ku thləthlata, antə Haruna ku ngka adzə Musa anyarmbwar Tentər Kəɓa.