Read bura-pabir Jikayeri 17 Bible Online

Jikayeri 17 - bura-pabir bible

Jikayeri 17

¹Antə MTHLAKU pəla aka Musa abbər,

²“Pəla aka mjir Israila ka mji na ol'ola akwa nyarmbwayeri arɗa ka da səntə zwalayeri kumnya suɗa, kəlara nyarmbwa pal zwal pal. Ka gə rəbutə thləma waskəi ata zwalərni.

³Ka gə rəbutə thləma Haruna ata zwalər mjir nyarmbwar Lawi. Kamnyar mda ata vəi zwal pal kamnyar kəlara nyarmbwa pal.

⁴Ka gə pwi zwalayeri ni akwa Tentər Kəɓa, akəma Akwati Alkawal, akwa vəi tə I ana kəɓa ka gə ni.

⁵Ma mdə natə zwalərni ku ɗəɗa, tsa an mdə natə I ku carɓəla. Akwa laku ngəni antə I ata hara ka nggungguni tə mjir Israila akwa hara ata kəra giri ni kura.”

⁶Musa ku gari aka mjir Israila, antə shanga mji na ol'olər ɗa ku hamta alari zwal pal pal kumnya suɗa, kəlara olər nyarmbwa pal hamta zwal pal. Antə zwalər Haruna ni akwa nca zwalayeri ni tsuwa.

⁷Antə Musa ku pwi shanga zwalayeri ni akəma MTHLAKU akwa Tentər vəngkər səli.

⁸Səɓəla ɗəpari sakatə Musa ləkwa Tent ni, təng tsa wutə zwalər Haruna na akwa nyarmbwar Lawi ni ku ɗəɗa, ka pukdla, ka ya almon, har ka ng'ha.

⁹Antə Musa fwaɓəla shanga zwalayeri na akəma MTHLAKU ni, ka ncanta aka shanga mjir Israila. Antə da ku wulhə ɗa, tə waskəi ku kətə zwalərni.

¹⁰Antə MTHLAKU pəla aka Musa abbər, “Ngka ka zwalər Haruna ni, ka gə vəi ni akəma Akwati Alkawal ni, ka tsa ndzi seɗa aka mjir Israila na akwa haptə hangkala mdə ni, abbər ma da aɗi zhar nggungguni ata kəri ni wa da ata mta.”

¹¹Antə Musa ku hara suayeri ni kalkal apatə MTHLAKU ku tsawa alari.

¹²Antə mjir Israila pəla aka Musa abbər, “Ai ma ku ndzi apani, sha ku wutə yeru! Ma apani yeru aɗi ya! An shar yeru ja!

¹³Ma ku ndzi abbər kəlara mdə na ku mwari adzə Tentər vəngkər səli aka MTHLAKU ni, tsa ata mta, to, ai mdə ku kuri ka yeru!”