Read bura-pabir Jikayeri 18 Bible Online

Jikayeri 18 - bura-pabir bible

Jikayeri 18

¹Antə MTHLAKU pəla aka Haruna abbər, “Ga, ka maɗashilər nga, ka mjir kutakəyir baba' nga, an ata kətə watsəɓər biku tə mdə hara akwa Tentər vəngkər səli ni. Amma ga kəga maɗashilər nga an ata kətə watsəɓər biku na ku tsəkwar kəthlər ar pristkur.

²Ka gə səntə maɗama' nga na akwa nyarmbwar Lawi, ka da dlar nga. Da ata hara kəthlər ata kəma duku ka ga sakatə ga kəga maɗashilər nga akwa hara kəthlər akwa Tentər Seɗa.

³Da ata dlar giri, ka da hara shanga kəthlərayeri na akwa Tent ni. Amma da aɗiya shahədzi adzə kariyayeri natə mdə pwi akwa Vəi na Ɓɗakkarkar ni wa, wala adzə bagaɗi wa. Kamnyar ma da ku tsəkwari, ta gə ya, ta da ya, shanga giri ata mta.

⁴Da ata paktə kər ka ga, kamnyar hara shanga kəthlərayeri na akwa Tentər Kəɓa ni. Amma mdə damwa aɗiya shahədzi kudzəhə ka hara kəthlər ni kəga giri wa.

⁵Ga, ka maɗashilər nga daci, an ata hara kəthlərayeri na akwa Vəi na Ɓɗakkarkara ka ata bagaɗi saɗaka ni, ta I asə jaktə pumta ɗəffə bwarbwarkur arna ata kəra mjir Israila.

⁶Tsuwa, I ka kəri an carɓəla maɗama' nga na mjir Lawi akwa nca mjir Israila, ka da ndzi apa cauta ala giri. Tsuwa I ku namtə ɗa tə da ndzi arna, kamnyar ka da mzhi hara kəthlər ali akwa Tentər Kəɓa.

⁷Amma ar nga ka maɗashilər nga, giri shigiri an ata hara kəthlər ar pristkur ali, kəthlərayeri na ata bagaɗi saɗaka, ka na ata kəmar lapəli, akwa Vəi na Ɓɗakkarkar ni. I akwa hamta ala giri kəthlər ar pristkur ni cauta. Antə kəlara mdə na ku hadzə tsiyari aka kəthlər ni, ma tsa aɗi akwa nyarmbwar Lawi wa, mda ata tsi ni.”

⁸Antə MTHLAKU pəla aka Haruna, “Nggədza I ku na gə kəthlər ar wul shanga sur hamta tə mdə sənta ali. Akwa shanga sur hamta na ɓɗakkarkara tə mjir Israila ku sənta, antə I kəɓəla ala giri nəɓwar giri, ga ka maɗashilər nga.

⁹Antə akwa nca sur hamta na ɓɗakkarkara na mbila akwa sur saɗakayeri tə mdə hamta ali tsuwa, giri ata wutə nəɓwar giri, wala akwa nca saɗakar mthli, wala saɗakar kəcimta biku, wala akwa nca saɗakar ntəmta su tə mdə ɓzamta. Sur hamta nayeri ni an ɓɗakkarkara, antə da ata ndzi ar giri, ga ka maɗashilər nga.

¹⁰Giri ata səm ni akwa Vəi na Ɓɗakkarkara, tsuwa kəlara mdə sal ata mzhi səmari. Antə tar ka gə kətə ni abbər tsa su na ɓɗakkarkara.”

¹¹“Ngəni ma tsu ar nga. Bwa tə mdə kəɓəla akwa sur hamta ar haptə natə mjir Israila hamta ali, I ku hamta ni ka tsa ndzi ar giri ba saka madi, ala gə ka maɗa' nga shili ka mwanki. Antə kəlara mdə na kəcəkəcari akwa kutakəyir nga ata mzhi səmari.”

¹²“Tsuwa I akwa hamta ala giri shanga su na ɓɗakta shang natə mjir Israila hamta ali, apa mal zaitun, ka yimər anap, ka mthli na baɗitə ng'hə ntangkəma.

¹³Shanga yar sur fakər ɗa na ku ng'hə ntangkəma akwa tsəɗi ɗa tə da ana sənta aka MTHLAKU ata ndzi ala ga. Antə kəlara mdə na kəcəkəcari akwa kutakəyir nga ata mzhi səmari.”

¹⁴“Kəlara su tə mdə ku hamta ali akwa Israila ata ndzi ar nga.”

¹⁵“Shanga yarakəma ar mda wala ar mwaɓi natə mjir Israila hamta ali ata ndzi ar nga. Amma tsuwa kəlara yarakəmar mda wala mwaɓi na dlimbur, ka gə palɓəla ni.

¹⁶Ga ata palɓəla ɗa akwa sakatə da ku hara thliya pal ka yar da, kəlara ɓzəngkyar pal ata kəra shekel ntəfu, ata sur ngkər su tə mda ana kəthlər kəgari akwa Vəi na Ɓɗakkarkara ni.

¹⁷Amma yarakəma ar thla, wala təma, wala kwi, mda aɗi ata pəliyari wa, kamnyar mdə ku hamta ɗa ali. Antə ga ata pshitə mamshir ɗa ata bagaɗi, ka gə mbamta malkumər saɗaka tə mdə hamta ata u'u ni, antə tsa ata hamta shiwur na msəra aka MTHLAKU.

¹⁸Amma kumər ɗa ata ndzi ar nga, tsu apatə kərathlu ka kiɗə na abwa mazəm ar saɗakar haptə ni an ar nga.”

¹⁹“Akwa kuta shanga saɗakayeri na ɓɗakkarkara tə mjir Israila ku hamta ali, I ku hamta ala giri nəɓwar giri, ga ka maɗa' nga shili ka mwanki. Antə ngəni ata ndzi nəɓwar giri ba saka madi. Antə alkawalər una ngəni ata ndzi ba saka madi akəma MTHLAKU kamnyar nyarmbwar nga, kamnyar una an seɗar alkawalər Hyelər giri.”

²⁰Antə MTHLAKU pəla aka Haruna, “Su aɗi tə ga ata fa kifari akwa tsəɗiyir mjir Israila wa, tsuwa su aɗi tə da ata kəɓəla ala ga akwa shanga su tə da kəgari wa. I an nəɓwar nga ka kifər nga akwa nca mjir Israila.”

²¹Antə MTHLAKU jaktə pəla, “Ar mjir Lawi, I ku hamta kəlara zaka natə mjir Israila sənta ali ka tsa ndzi kifər ɗa. Ngəni an nəɓwar ɗa akwa kəthlər ni, watau kəthlər tə da akwa hara ali akwa Tentər Kəɓa ni.

²²Antə baɗitə kulini har ka ləkəma, mambila mjir Israila aɗiya mwari adzə Tent ni wa, ta da asə pwasta ala ɗa biku ka mta.

²³Mjir Lawi shiɗa an ata hara kəthlər akwa Tent ni. Tsuwa da ata kətə watsəɓər bikər kəlara su tə da hara akwa vəi ni. Ngəni ata ndzi tsawu na ba saka madi akwa shanga zamanayeri ar giri. Tsuwa mjir Lawi aɗi ata wutə kifa akwa nca mjir Israila wa,

²⁴kamnyar I ku hamta ala ɗa bwar ɗa akwa kuta zaka natə mdə hamta ali. An su na hara tə I pəla ala ɗa abbər da aɗi ata wutə kifa akwa nca mjir Israila wa.”

²⁵Antə MTHLAKU pəla aka Musa

²⁶ka tsa pəla aka mjir Lawi abbər, “Ma sakatə giri ku dlu zaka akəla mjir Israila, natə I ku na ala giri ka tsa ndzi nəɓwar giri akwa kifə ni, giri ata kəɓəla su laga akwa, ka giri hamta aka MTHLAKU.

²⁷Sur hamta ngəni antə mda ata kətə ni apa sur hamta ar faku, watau sur hamta ar mthli bilən, ka na ar yimər anap na bilən tə mdə haɗa thlatə kəgari akwa dlərari.

²⁸Apani antə giri ata kəɓəla su akwa kuta zaka tə giri dlu akəla mjir Israila ni, ka giri hamta aka MTHLAKU. Antə sur hamta ngəni tə giri hamta aka MTHLAKU ni, giri ata hamtari aka Haruna na prist.

²⁹Akwa kuta shanga sur hamta natə mdə na ala giri ni, giri ata kəɓəla bwa laga rakər su ka giri hamta aka MTHLAKU, bwa na ɓɗakta shang ka tsuwa na ɓɗakkarkara, antə giri ata hamtari.

³⁰Aghəla tə giri ku carɓəla bwa na ɓɗakta shang akwa nca ɗa, antə mda ata zhar mambilari ni aka mjir Lawi, tsu apatə mdər tsuhwa ana səm mambila mthli ka yimər anap aghəla tə tsa ku kəɓəla zaka.

³¹Antə giri kəga mjir kutakəyir giri ata mzhi səmari akwa kəlara vəi, kamnyar ngəni an watsəɓər kəthlərər giri tə giri ana hara akwa Tent ni.

³²Aɗi ata ndzi biku ala giri sakatə giri ku səm wa, ma har giri ku kəɓəla bwa na ɓɗakta shang ka hamta. Antə giri aɗiya rutə sur hamta na ɓɗakkarkara na ar mjir Israila, abbər giri ata səm su na ku ndzi ar MTHLAKU wa. Kamnyar ma giri ku hara, mda ata tsi giri.”