Read bura-pabir Jikayeri 19 Bible Online

Jikayeri 19 - bura-pabir bible

Jikayeri 19

¹Antə MTHLAKU pəla aka Musa ka Haruna abbər,

²“Nggədza tsawa damwa natə I na MTHLAKU ku hamta. Pəla aka mjir Israila ka da sənta ala gə mbəkəl thla mamza na kula nangka kula manjivar, tsuwa natə mda aɗi ɗar mbwau alari udzəm ndəkər garma wa,

³ka mdə hamta ni aka Eleyazar na prist. Antə mda ata kətə ni ka mwantə ni aɓəla ata hildi, ka thlamta wulyari tsu ata ncari.

⁴Antə Eleyazar na prist ata kətsə mamshari ata kulengari, ka tsa pshitə bwa kəma Tentər Kəɓa ni ka murfa kəgari.

⁵Aghəla nda antə mda ata mbamta mbəkəl thla ni tuktukku ata ncari, mda ata mbamta kəsəmari, ka kumari, ka mamshari, kəga civari.

⁶Antə prist ni ata səntə udzəm seda, ka udzəm Izob, ka puwa mamza, ka pu ɗa akwa u'u na akwa mbamta mbəkəl thla ni.

⁷Aghəla nda antə prist ata kəcimta ləptərni ka pərəmtapəra ka yimi. Aghəla nda antə tsa ata mzhi ngka akwa vəi fəliyir ɗa. Amma vir nda prist ni ata ndzi dlimbur har tahaku.

⁸Mdə na ku mbamta mbəkəl thla ni tsuwa, ata kəcimta kari ləptərni, ka tsa pəra ka yimi, ka ndzi tsu dlimbur har tahaku.

⁹Antə mdə na kəcəkəcari an ata tsaptə pənjuwur mbəkəl thla ni, ka tsa ra puyari akwa vəi na kəcəkəcari aɓəla ata hildi. Anda antə mda ata pwi pənju ni, kamnyar ka shanga mjir Israila hara kəthlər kəgari akwa nam yimər kəcə dlimburkur. Ngəni an su tə ka mdə hara kamnyar kəcimta biku.

¹⁰Antə mdə na fatə pənjuwur mbəkəl thla ni tsuwa, ata kəcimta ləptərni, ka ndzi dlimbur har tahaku.” “Ngəni an su tə ka mjir Israila kəga mətəpiyayeri na akwa nca giri ata harari ba saka madi.”

¹¹“Kəlara mdə na ku tsəkwar mshiyir mda tsa ata ndzi dlimbur har vir murfa.

¹²Akwa vir na makərkur ka na murfəkur, antə tsa ata kəcimta kərni ka yimər kəcimta biku, ka ndzi kəcəkəcari. Amma ma tsa aɗi kəcimta kərni akwa vir na makərkur ka murfəkur ni wa, tsa aɗi ata ndzi mdə na kəcəkəcari wa.

¹³Kəlara mdə na ku tsəkwar mshi, watau dza mdə na ku mti, amma tsa aɗi kəcimta kərni wa, tsa ku namtə Tentər vəngkər səli aka MTHLAKU ni dlimbur. Antə mda ata kədləɓəla mdə ngəni akwa nca mjir Israila, kamnyar mda aɗi pshingkər alari yimər kəcimtadzi ni wa, antə tsa ku ndzi dlimbur. Tsuwa watsəɓər dlimburkur arni ata ndzi ata kərari.”

¹⁴“Nggədza su tə ka mdə hara kəlara sakatə mdə ku mti akwa tent. Kəlara mdə na ambwa sakatə mdə ni mta, tsa ata ndzi dlimbur har vir murfa.

¹⁵Tsuwa kəlara tughum na bwang, natə mda aɗi hartə mnyari wa, tsa ata ndzi dlimbur.

¹⁶Kəlara mdə na akwa bəbal ni, na ku tsəkwar dza mdə natə mdə tsi ka katsakar, wala mdə na mtə ndzang, wala mdə na ku tsəkwar ɗethlər mdə ni, wala kulərni, mdari ata ndzi dlimbur har vir murfa.”

¹⁷“Ma mda ata bara kəcimta mdə na dlimbur, ka mdə kətsə pənjuwur mbəkəl thla tə mdə mbamta ni, ka mdə hara su tə mdə thlamta kamnyar kəcə biku. Mda ata pu pənju ni akwa tughum, ka mdə pungkər yimi na ata hwi.

¹⁸Antə mdə na kəcəkəcari an ata kətə tsiya izob, ka tsa nciu akwa yimi ni, ka tsa pshitə dza tent ni, ka shanga kariyayeri na akwa kutari, ka pshita ata kəra mji na anda tsuwa. Tsu apani antə mda ata harari ka mdə na ku tsəkwar ɗethlər mda, wala mdə tə mdə tsi ni, wala mshi, wala kula.

¹⁹Akwa vir na makərkur ka na murfəkur tsuwa, antə mdə na kəcəkəcari ni ata pshingkər yimi aka mdə na dlimbur ni. Apani antə mda ata kəcimta mdə ni akwa vir na murfəkur. Aghəla nda antə mdə ni ata kəcimta ləptərni, ka tsa pərəmtapəra ka yimi ni. Antə tsu tahaku nda tsa ata ndzi kəcəkəcari.”

²⁰“Tsuwa kəlara mdə na dlimbur, na ku nggəlar ta kəcimta kərni ka yimər kəca ngəni, tsa ata ndzi dlimbur. Antə mda ata kədləɓəla ni akwa nca mji, kamnyar tsa ku diɓərantə Vəi na Ɓɗakkarkara na ar MTHLAKU. Antə tsa ata ndzi dlimbur, təng tə mda aɗi pshingkər alari yimər kəcimtadzi wa.

²¹Antə ngəni ku ndzi su tə da ata ləkəma ka harari har ba saka madi. Mdə na pshingkər yimər kəcimtadzi aka mdə ni, tsa ma tar ka tsa kəcimta ləptərni. Aghəla nda kəlara mdə na ku tsəkwar yimər kəcimtadzi ni, tsa ata ndzi dlimbur tar tahaku.

²²Tsuwa kəlara su tə mdə na dlimbur ku tsəkwari, suari ata ndzi dlimbur. Tsuwa kəlara mdə na ku tsəkwar su tə mdə na dlimbur ni ku tsəkwari ni, tsa ata ndzi dlimbur har tahaku.”