Read bura-pabir Jikayeri 2 Bible Online

Jikayeri 2 - bura-pabir bible

Jikayeri 2

¹MTHLAKU ku pəla aka Musa ka Haruna abbər,

²“Kəlara sakatə mjir Israila ku si akwa vəi tə da ata fəli ata, ka waskəi ndzəndzi akwa zarar durər ɗa, akira alam ar nyarmbwar ɗa. Shanga tentayeri ar mjir Israila ata kalaktə Tentər Kəɓa ka kəma ɗa awul Tent ni.”

³Mji na ata nci tentər ɗa abwar raghəi təbwar səɓəlar pci an mjir nyarmbwar Yahuda. Antə da ata ndzəndzi zara zara akira alamər mjir Yahuda. Tsuwa mdə na ola ata kəra ɗa akwa nyarmbwar Yahuda ni an Nashon na ɓzər Amminadab.

⁴Hangkur mji na akwa zararni an mji dəpu murfəkumari ka nfwar ka aru ngkwa.

⁵Mji na ata nci tentər ɗa təkəma aghəla mjir nyarmbwar Yahuda an mjir nyarmbwar Issakar. Tsuwa mdə na ola ata kəra ɗa akwa nyarmbwar Issakar an Nathlanel na ɓzər Zuwar.

⁶Hangkur mji na akwa zararni an mji dəpu ntəfkumari ka nfwar ka aru nfwar.

⁷Mji na ata nci tentər ɗa təkəma aghəla mjir nyarmbwar Issakar an mjir nyarmbwar Zebulun. Tsuwa mdə na ola ata kəra ɗa akwa nyarmbwar Zebulun an Eliyab na ɓzər Helon.

⁸Hangkur mji na akwa zararni an mji dəpu ntəfkumari ka murfa ka aru nfwar.

⁹Hangkur shanga mji na akwa vəi fəli ar nyarmbwar Yahuda ni an mji dəpu aru ka nciskumari ka ngkwa ka aru nfwar. Antə kəlara sakatə mjir Israila ata thlatə kazhar vəi fəliyir ɗa, nyarmbwar Yahuda ngəni an ata baɗitə thlatə ntangkəma.

¹⁰Mji na ata nci tentər ɗa təbwar anəm an mjir nyarmbwar Ruben, akira alamər nyarmbwar ɗa. Antə da ata ndzəndzi zara zara. Tsuwa mdə na ata pwar mjir nyarmbwar Ruben an Elizur na ɓzər Shedeyur.

¹¹Hangkur mji na akwa zararni an mji dəpu nfwarkumari ka ngkwa ka aru ntəfu.

¹²Mji na ata nci tentər ɗa təkəma aghəla mjir nyarmbwar Ruben an mjir nyarmbwar Simeyon. Tsuwa mdə na ola ata kəra ɗa akwa nyarmbwar ɗa an Shelumiyel na ɓzər Zurishaddai.

¹³Hangkur mji na akirari an mji dəpu ntəfkumari ka əmdla ka aru makər.

¹⁴Mji na ata nci tentər ɗa təkəma aghəla mjir nyarmbwar Simeyon an mjir nyarmbwar Gad. Tsuwa mdə na ola ata kəra ɗa akwa nyarmbwar ɗa an Eliyasaf na ɓzər Deyuwel.

¹⁵Hangkur mji na akwa zararni an mji dəpu nfwarkumari ka ntəfu ka aru ngkwa ka ntəfkumari.

¹⁶Hangkur shanga mji na akwa vəi fəli ar nyarmbwar Ruben an mji dəpu aru ka ntəfkumari ka ntang ka aru nfwar ka ntəfkumari. Antə kəlara sakatə mjir Israila ata thlatə kazhar vəi fəliyir ɗa, nyarmbwar Ruben ngəni an ata thlatə na suɗkur.

¹⁷Aghəla nyarmbwa ngəni, nyarmbwa na ata thlata an nyarmbwar mjir Lawi na ata thlata akwa ɗəffa vəi fəli ni ka Tentər Kəɓa ni akwa tsiya ɗa. Antə shanga nyarmbwayeri ni ata mwa ata ata apatə mdə ku tsawa ala ɗa ka da ndzəndzi akwa vəi fəli ni, kəlara nyarmbwa akira alamərni.

¹⁸Mji na ata nci tentər ɗa təbwar ramta an mjir nyarmbwar Ifrayim akira alamər nyarmbwar ɗa. Antə da ata ndzəndzi zara zara. Tsuwa mdə na ola ata kəra ɗa akwa nyarmbwar Ifrayim ni an Elishama na ɓzər Ammihud.

¹⁹Hangkur mji na akwa zararni an mji dəpu nfwarkumari ka aru ntəfu.

²⁰Mji na ata nci tentər ɗa təkəma aghəla mjir nyarmbwar Ifrayim an mjir nyarmbwar Manasse. Tsuwa mdə na ola ata kəra ɗa akwa nyarmbwar ɗa an Gamaliyel na ɓzər Pedazur.

²¹Hangkur mji na akwa zararni an mji dəpu makkumari ka suɗa ka aru suɗa.

²²Mji na ata nci tentər ɗa təkəma aghəla mjir nyarmbwar Manasse an mjir nyarmbwar Benjamin. Tsuwa mdə na ola ata kəra ɗa akwa nyarmbwar ɗa an Abidan na ɓzər Gideyoni.

²³Hangkur mji na akwa zararni an mji dəpu makkumari ka ntəfu ka aru nfwar.

²⁴Hangkur shanga mji na akwa vəi fəli ar nyarmbwar Ifrayim an mji dəpu aru ka ncisu ka aru pal. Antə kəlara sakatə mjir Israila ata thlatə kazhar vəi fəliyir ɗa, nyarmbwa ngəni an ata thlatə na makərkur.

²⁵Mji na ata nci tentər ɗa təbwar yala an mjir nyarmbwar Dan akira alamər nyarmbwar ɗa. Antə da ata ndzəndzi zara zara. Tsuwa mdə na ola ata kəra ɗa akwa nyarmbwar Dan ni an Ahiyezer na ɓzər Ammishaddai.

²⁶Hangkur mji na akwa zararni an mji dəpu ngkwakumari ka suɗa ka aru murfa.

²⁷Mji na ata nci tentər ɗa təkəma aghəla mjir nyarmbwar Dan an mjir nyarmbwar Asher. Tsuwa mdə na ola ata kəra ɗa akwa nyarmbwar ɗa an Pagiyel na ɓzər Okran.

²⁸Hangkur mji na akwa zararni an mji dəpu nfwarkumari ka ntang ka aru ntəfu.

²⁹Mji na ata nci tentər ɗa təkəma aghəla mjir nyarmbwar Asher an mjir nyarmbwar Naftali.Tsuwa mdə na ola ata kəra ɗa akwa nyarmbwar ɗa an Ahira na ɓzər Enan.

³⁰Hangkur mji na akwa zararni an mji dəpu ntəfkumari ka makər ka aru nfwar.

³¹Hangkur shanga mji na akwa vəi fəli ar nyarmbwar Dan an mji dəpu aru ka ntəfkumari ka murfa ka aru ngkwa. Antə kəlara sakatə mjir Israila ata thlatə kazhar vəi fəliyir ɗa, nyarmbwa ngəni an ata thlatə ka alamər ɗa aghəl ta shang.

³²Hangkur shanga mjir Israila na akwa vəi fəli ni apatə mdə jikatə ɗa zara zara an mji dəpu aru ngkwa ka makər, ka aru ntəfu ka ntəfkumari.

³³Mda aɗi jikau mjir Lawi ata kəma duku kəga mambila mjir Israila wa, kalkal apatə MTHLAKU ku tsawa aka Musa.

³⁴Antə mjir Israila ku hara shanga su kalkal apatə MTHLAKU ku tsawa aka Musa. Apani antə da ana ncigəi tentayeri arɗa akira alamayeri arɗa, tsuwa apani antə da ana thlata, kəlara kutakəi akwa nyarmbwar kəkar ɗa.