Read bura-pabir Jikayeri 20 Bible Online

Jikayeri 20 - bura-pabir bible

Jikayeri 20

¹Akwa thliya na ntangkəma, antə shanga mjir Israila ku si akwa Mtakər Zin, ka fəli anda akwa Kadesh. Anda antə Maryamu ku mti, antə mdə ku harəmta ni tsu anda.

²Tsuwa ata vəi nda yimi aɗi tə ka mji sa wa. Antə da tsaɓəngkərdzi ata kəra Musa ka Haruna ka ləkwa thlentə hangkala ɗa.

³Antə da ləkwa jikamnyar aka Musa abbər, “Ai kuji ma yeru an mtəgəmtadzi ata kəma duku kəga maɗama' yeru na mta akəma MTHLAKU!

⁴Kamnyar mi tə gə səntə yeru akwa mtaku ngəni na kula su kamnyar ka yeru kurəmtadzi azi kəga mwaɓiyayeri ar yeru nə ri?

⁵Tsuwa kamnyar mi tə giri fwaɓəla yeru akwa Masar ka səntə yeru akwa vəi ngəni ɗimi kula su nə ri? Vəi ngəni aɗi vəi tə mda athləkəi mthli ata wa, wala nci kamnda, wala anap ata wa. Wala yimər sa ma aɗi wa!”

⁶Antə Musa ka Haruna ku təra kazhar dlamar mji ni ka mwari anyarmbwar Tentər Kəɓa ni, ka ndla ka kəma ɗa ata di. Təkəma təng parakər səliyir MTHLAKU si ata kəra ɗa.

⁷Antə MTHLAKU pəla aka Musa,

⁸“Kətə zwalər nga, giri ka Haruna na ɓzərma' nga, ka giri tsaptə mji ata kəma duku. Antə tsu ata nca ɗa, ka giri pəla aka pela ni abbər ka tsa puɓəla yimi na akwa tsa. Apani antə ga ata səɓəla ka yimi akwa pela ni ala ɗa, yimər sa na ata mzhi ɗa kəga mwaɓiyayeri arɗa.”

⁹Antə Musa ku mwari ka kətə zwal nda akəma MTHLAKU apatə MTHLAKU ku tsawa alari.

¹⁰Antə Musa ka Haruna ku tsaptə mji akəma pela ni. Aghəla nda antə Musa pəla aka shanga mji ni abbər, “Psi gir thləma giri, giri na mjir thlentə hangkal! Dwali ka yeru səɓəla ala giri ka yimi akwa pela ngəni ya?”

¹¹Antə Musa ku haptə tsiyari ka zwal ni, ka tsa pela ni ka suɗa. Antə yimi ku puɓəladzi hang ka duna, tə shanga mji kəga mwaɓiyayeri arɗa ku sa yimi ni.

¹²Amma MTHLAKU ku pəla aka Musa ka Haruna abbər, “Təng tə giri aɗi mbərsa ka iya natə har giri ata mzhi haptə thləmi na ɓɗakkarkara ata nca mjir Israila wa, to, aɗi giri an ata mwantə mji ngəni akwa tsəɗi natə I hara ala ɗa alkawalari ni wa.”

¹³Antə mdə ku kəga thləma yimi ngəni Meriba, kamnyar anda antə mjir Israila ku nggungguni aka MTHLAKU. Tsuwa tsu anda antə MTHLAKU ncantə kərni ala ɗa abbər tsa an ɓɗakkarkara.

¹⁴Tsu azi akwa Kadesh ni antə Musa ku thlentə mjir thlentə ka da mwari adzə kuthlir Edom, ka da pəla alari abbər, “Ndə ɓzərma' nga Israila nggwa, ga asəndə shanga bwani na ku wutə yeru,

¹⁵laku tə kəkayeri ar yeru ləghəi akwa Masar, ka hara məva hang anda. Tsuwa ga asəndə laku tə mjir Masar ni hara bwani ala yeru kəga kəkayeri ar yeru.

¹⁶Sakatə yeru ku tuwa aka MTHLAKU abbər ka tsa dlar yeru, antə tsa ku nggatə tuwar yeru, ka thlentə mdərthlentərni na ku fwaɓəla yeru akwa Masar. Antə kulini yeru azi akwa Kadesh, di na ata kəla tsəɗiyir nga.

¹⁷Antə yeru akwa kiɗa abbər ka gə dlar yeru ka yeru təramta akwa tsəɗiyir nga. Yeru aɗi ata təra akwa fakəu wa, wala fakər anap wa, wala sa yimi akwa jiɓər ngə wa. Yeru ata nu Lakur Kuthli daci, yeru aɗi ata pəramta abwa mazəm wala abwa matsəkar wa, har ka yeru ləɓəla akwa tsəɗiyir nga.”

¹⁸Amma kuthlir Edom shinau ala ɗa abbər, “Ga aɗi ata təramta akwa tsəɗiyirna wa! Ma ga ku ngkərta, yeru ata ləɓəla ka katsakar ata kəra giri.”

¹⁹Antə mjir thlenta ar Israila ni pəla, “Diya təng yeru ata nu laku na ol ni daci, tsuwa ma har mdə laga akwa nca yeru, wala mwaɓiyir yeru laga ku kar ka sa yimər nga, yeru ata ntəmtari. Ar yeru təng ka yeru təramta daci.”

²⁰Amma kuthlir Edom pəla, “Awa, giri aɗi ata təramta wa!” Antə mjir Edom səɓəla ka sojayeri hang na ka duna, abbər ka da dlər mjir Israila.

²¹Apani antə kuthlir Edom ku ngkatə lakur təramta akwa tsəɗiyirni aka mjir Israila. Antə mjir Israila ku shinardzi ka nu laku damwa ka təra.

²²Antə shanga mjir Israila ku thlatə kazhar Kadesh, ka təra mwari akwa Gar Hor,

²³na ata kəla ka tsəɗi Edom. Anda antə MTHLAKU pəla aka Musa ka Haruna abbər,

²⁴“Haruna ata mta ka tsa ra wutə kəkayeri arni. Tsa aɗi ata ləkwa tsəɗi natə I kətə alkawalər hamtari aka mjir Israila ni wa, kamnyar japwa giri ka tsa ku nggəlar nu tsawurna ata kəra yimər Meriba.

²⁵Antə kətə Haruna ka ɓzər ni Eleyazar, ka giri ləmta kəga da ata kəra Gar Hor.

²⁶Anda antə ga ata fəi ləptər pristkur na adzə Haruna, ka gə hadza aka ɓzərni Eleyazar. Kamnyar anda antə Haruna ata mta, ka tsa ra wutə kəkayeri arni.”

²⁷Antə Musa ku hara tsu apatə MTHLAKU ku tsawa. Da ku ndləɓəla Gar Hor ni tsu ata nca dlamar mji ni.

²⁸Antə Musa ku ntsui ləptər pristkur adzə Haruna ka hadza aka Eleyazar na ɓzər Haruna. Antə tsu anda ata kəra Gar Hor ni antə Haruna ku mti. Antə Musa ka Eleyazar ku səghəi ata kəra Gar ni.

²⁹Sakatə shanga mjir Israila wuta abbər Haruna ku mti, antə da ku tuwa ni har vir makkumari.