Read bura-pabir Jikayeri 21 Bible Online

Jikayeri 21 - bura-pabir bible

Jikayeri 21

¹Sakatə kuthlir Arad, na mdər Kanana na təbwar anəm, na ka ndzi akwa Negev, nggata abbər mjir Israila akwa si ata lakur Athlarim, antə tsa ləɓəla ka pwa ata kəra ɗa ka mpa, ka ngkəgəi mji laga akwa nca ɗa.

²Antə mjir Israila kətə alkawal aka MTHLAKU abbər, “Ma har gə hamta mji nayeri ni akwa tsiya yeru, yeru ata hamta ɗa kəga kauyayeri arɗa shang ala ga, yeru ata shamta ɗa karkar.”

³Tsuwa MTHLAKU ku nggata alkawalər mjir Israila ni, ka hamta ala ɗa mjir Kanana ni. Antə mjir Israila ku kurəmta ɗa karkar ka higəlantə bərniyayeri arɗa shang. Antə təng akwa saka nda mdə baɗitə kəga thləma vəi ni Horma, watau vəi tə mdə higəlanta.

⁴Antə mjir Israila ku thlatə kazhar Gar Hor, ka nu mnya Manda Duwathlu, kamnyar ta da akəɓa ka tsəɗi Edom. Amma ata laku ni, mji aɗi sə mzhi mbwi ɗəffa ɗa kəra wa.

⁵Mji ni baɗitə nggungguni ata kəra Hyel ka ata kəra Musa abbər, “Kamnyar mi tə giri fwaɓəla yeru akwa Masar ka səntə yeru ka yeru mta akwa mtaku ngəni ri? Nggədza susəma aɗi wa, yimi aɗi wa! Tsuwa yeru ku ghər ka səm manna ngəni kula dlar ni!”

⁶Antə MTHLAKU thlentə pwapwayeri na ka gwarər ɗa mwavər akwa nca mjir Israila. Antə pwapwayeri ni ku ɓɗəɓɗətə mji, tə mji hang akwa nca ɗa ku mtəgəi.

⁷Antə mji ni ku si adzə Musa ka pəla, “Yeru ku hara biku tə yeru ku nggungguni ata kəra MTHLAKU ka ata ga tsuwa. Usa, kiɗa ala yeru kəra MTHLAKU ka tsa famta ala yeru pwapwayeri ni.” Antə Musa ku hara adduwa kamnyar mji ni.

⁸Antə MTHLAKU pəla aka Musa ka tsa namtə pwapu laga ar əmza, ka tsa vətə ni ata udzəm ni. Antə kəlara mdə natə pwapu ku kal ni, ma tsa ku haptə ncari ka wul pwapu ni, tsa ata mbəi.

⁹Antə Musa ku namtə pwapu ar əmza, ka vəta ata kəra udzəm laga na saɓəl tə mdə nci. Antə kəlara sakatə pwapu laga ku kal mda, ma mdə ni ku haptə ncari ka wul pwapur əmzə ni, tsa ata mbəi.

¹⁰Antə mjir Israila ku thlatə ka ləkəma ka mwa, ka ra fəli ahar Oboth.

¹¹Antə da thlatə kazhar Oboth ka ləkəma ka mwa, ka ra fəli akwa fya ar Abarim, akwa mtaku na ata kəla tsəɗi Mowab, awul bwar səɓəlar pci.

¹²Thlatər ɗa kazhar vəi nda antə da mwa, ka ra fəli akwa Mular Zered.

¹³Thlatər ɗa kazhar vəi nda tsuwa antə da mwa, ka ra fəli aɓəla bwanda Thlyagha Arnon, akwa mtaku na kudzəhə ka tsəɗi mjir Amor. Kamnyar Thlyagha Arnon an kəla mjir Mowab ka mjir Amor.

¹⁴An su na hara tə mdə pəla akwa Kakaɗər Mpayeri ar MTHLAKU abbər, “Di Waheb na akwa Sufa, ka mularayeri ar Thlyagha Arnon,

¹⁵ka mularayeri na ləghəi na ləghəi tsək ka di Ar, na nu atar kəla tsəɗi Mowab.”

¹⁶Thlatər ɗa anda antə da ləkəma ka mwa har ka mzhitə Beyer, jiɓə natə MTHLAKU pəla aka Musa abbər, “Tsaptə mji ata vəi duku, antə I ata hamta ala ɗa yimi.”

¹⁷Antə mjir Israila ku hara ha ngəni, “Puɓəla yimi, jiɓa! Ka mdə fwalta ni akwa ha!

¹⁸Ka mdə hara ha ata kəra jiɓə ngəni, jiɓa natə mainayeri an lamta, jiɓa natə mji ol'ola an ntula ka zwalər kuthlikur arɗa, ka zwalər mwar ɗa.” Thlatər ɗa akwa mtaku ngəni antə da mwa ka mwari ahar Mattana.

¹⁹Thlatər ɗa ahar Mattana antə da mwa ka mwari ahar Nahaliyel. Thlatər ɗa kazhar Nahaliyel antə da mwa ka mwari ahar Bamoth.

²⁰Thlatər ɗa kazhar Bamoth antə da mwa ka mwari akwa mular laga akwa tsəɗi Mowab, vəi tə da ata mzhi wutə kəra Gar Pisga, na akwa wul mtakər wuyaku.

²¹Antə mjir Israila ku thlentə mjir thlenta aka Sihon na kuthlir mjir Amor ka da pəla alari abbər,

²²“Ka barkar nga! Dlar yeru bu ka yeru təramta akwa tsəɗiyir nga. Yeru aɗi ata təra akwa faku, wala akwa fakər anap wa. Tsuwa yeru aɗi ata sa yimər jiɓər ngə wa. Yeru ata nu Lakur Kuthli daci, har ka yeru ləɓəla akwa tsəɗiyir nga.”

²³Amma Sihon aɗi kələngkər aka mjir Israila ka da təramta akwa tsəɗiyirni wa. Antə tsa tsaptə shanga sojarni tə da ləɓəla akwa mtaku kamnyar mpa mjir Israila. Sakatə tsa wutə mjir Israila ni ahar Yahaz, antə tsa pwa ata kəra ɗa ka mpa.

²⁴Amma mjir Israila ku dlu ɗa ka mpa, ka kurəmta hang akwa nca ɗa ka katsakar, ka dlutsə tsəɗiyir ɗa baɗita akwa Thlyagha Arnon har ka vədza aka Thlyagha Yabbok. Amma da ɓəlta ata kəla tsəɗiyir mjir Ammon, kamnyar sojayeri ar Ammon na ata kəl ni ku təra kərathla mjir Israila.

²⁵Antə mjir Israila ku dlutsə shanga kauyayeri na ar mjir Amor, ka ndzəndzi akwa, ka paktə ka bərni Heshbon ka shanga kauyayeri na akirari.

²⁶Kamnyar Heshbon an di kuthlikur ar Sihon na kuthlir mjir Amor. Tsuwa kuthli ngəni an mpa ka kuthlir Mowab na waci, har ka dlutsə shanga tsəɗiyirni har ka vədza aka Thlyagha Arnon.

²⁷An su na hara tə mjir thla ha ana pəla, “Sər giri ahar Heshbon, ka mdə jaktə hənɓəla ni! Ndzi ka mdə nci bərni Kuthli Sihon!

²⁸Kamnyar waci u'u ku səɓəla akwa Heshbon kyanggyara u'u ku səɓəla akwa bərni Kuthli Sihon. Tsa səməmnya Ar na akwa Mowab ka kurəmta mjir kuthlikur na akwa tsəɗi Arnon.”

²⁹“Sha ku wutə giri, giri na mjir Mowab! Giri aɗi kəra ya, mjir haptu Kemosh! Tsa vu tə maɗashilərni hwi tə mpika ɗa, ka maɗa'ni na mwanki tə mdə fata akwa mpa, ata tsiya Sihon na kuthlir mjir Amor.”

³⁰“Nggədza kulini mdə ku shamta mjir nyarmbwar Amor, baɗita ahar Heshbon ka ləhar Dibon, u'ur yeru ku mbagamta ɗa, baɗita ahar Nofa har ka ləhar Medeba.”

³¹Apani antə mjir Israila ku ndzəndzi akwa tsəɗiyir mjir Amor.

³²Antə Musa ku thlentə mjir wul ashira tsəɗi ka da ra pakɓəla laku na kasəla ta shang ar dlərəmta tsəɗi Yazer. Aghəla nda antə mjir Israila ku mwari ka səm bərni Yazer ka kauyayeri na akirari, ka kədləɓəla mjir Amor na anda.

³³Aghəla nda antə mjir Israila ngka ka ləmta atar lakur ləhar Bashan. Amma Og na kuthlir Bashan ku ləɓəla ka shanga sojayeri arni, ka pwa ata kəra ɗa ka mpa ahar Edrai.

³⁴Antə MTHLAKU pəla aka Musa, “Ga aɗiya athlivər ni wa, kamnyar I ku kurtə hamta ni akwa tsiya ga, purəm kəga sojayeri arni kəga tsəɗiyirni. Hara alari su tə gə hara aka Sihon na kuthlir mjir Amor, na hara kuthlikur ahar Heshbon.”

³⁵Apani antə da ku tsi Kuthli Og, kəga maɗashilərni, ka shanga sojayeri arni, mda aɗi na msərəmta wa. Antə mjir Israila ku dlutsə tsəɗi ni, ka ndzi mthlakari.