Read bura-pabir Jikayeri 22 Bible Online

Jikayeri 22 - bura-pabir bible

Jikayeri 22

¹Antə mjir Israila ləkəma ka mwa, ka fəli akwa bəbalayeri na akwa Mowab təbwar raghəi ka Thlyagha Jodan, akwa wuldzi ka Yariko.

²Antə Balak na ɓzər Zippor ku wutə shanga su tə mjir Israila hara aka mjir Amor.

³Antə tsa ka mjir Mowab ku thlivər ka duna kamnyar hangkur mjir Israila. Antə thlivər na ola ku ngkəi shanga mjir Mowab.

⁴Antə mjir Mowab pəla aka mji ol'olər Midiyan abbər, “Wul jili mji ngəni dlama dlama ni, kula shamta saka da ata ngyarəmnya shanga su na akwa tsəɗi mburu apa su tə gyal ana hara aka kusar akwa vəi ɓəla.” Ata saka nda, Balak na ɓzər Zippor an kuthlir Mowab.

⁵Antə tsa thlentə mjir thlenta aka Balaam na ɓzər Beyor ahar Pethlor na ata mnya Thlyagha Yufiretis, akwa tsəɗiyir mjir Amaw. Balak pəla ala ɗa ka da pəla aka Balaam abbər, “Nggədza mji laga thlata ahar Masar, ka titiləmtadzi bamama ata kəra duniya, tsuwa nggədza ɗa azi andzəndzi kudzəhə ka iya.

⁶Antə I akwa kiɗə nga ka gə si usa, ka gə shuwumta ɗa ali, kamnyar I amzhi nggyari ɗa wa. Antə ma ga ku shuwumta ɗa, nuhum I ata mzhi nggyari ɗa kəi kədləmta ɗa kazhar tsəɗi ni. Kamnyar I ku sənda abbər kəlara mdə tə ga ku vədza alari barka, tsa ata ndzi ka barka, tsuwa kəlara mdə tə ga ku shuwumta ni tsa ata ndzi shushuwari.”

⁷Antə mji ol'olər Mowab ka Midiyan ku kətə kwabar hakdzi, ka mwari adzə Balaam, ka jikata alari su tə Kuthli Balak pəla.

⁸Antə Balaam pəla ala ɗa abbər, “Ashina ni giri ata pi azi, antə ma ɗəpa I ata pəla ala giri su tə MTHLAKU ku pəla ali.” Antə mji ol'olər Mowab ni ku ndzəndzi anda adzə Balaam.

⁹Antə Hyel ku si adzə Balaam, ka pəla alari, “Mji madi an si adzə ngə nə ri?”

¹⁰Antə Balaam shinau aka Hyel abbər, “Ai, Kuthli Balak na ɓzər Zippor na akwa Mowab an thlentə ɗa adzə ra ka ndər abbər,

¹¹‘Nggədza mji laga ku səɓəla akwa Masar, ka titiləmtadzi bamama ata kəra duniya. Antə sər, kara shuwumta ɗa ali. Nuhum I amzhi dlər ɗa kəi kədləmta ɗa.’ ”

¹²Antə Hyel pəla aka Balaam abbər, “Ga aɗiya təra ka mji ngəni wa. Tsuwa ga aɗiya shuwumta mji ndaga wa, kamnyar da an mji na ka barka.”

¹³Səɓəla ɗəpari ɗəɗəpa antə Balaam pəla aka mji ol'ol ni abbər, “Ngka giri ka giri ləha, kamnyar MTHLAKU aɗi hir kəi nu giri wa.”

¹⁴Apani antə mji ol'olər Mowab ni ngka ka pəla aka Balak abbər, “Balaam aɗi hir nu yeru wa.”

¹⁵Antə Balak jaktə thlentə mji ol'ola, natə hangkurər ɗa ka darajar ɗa japu ku təramta ar mji na ntangkəma ni.

¹⁶Antə da mwari adzə Balaam ka pəla alari, “Kuthli Balak na ɓzər Zippor pəla nggwa, ga aɗiya hir ka su laga ngkatə nga mwari adzə ni wa!

¹⁷Kamnyar tsa ata haptə səliyir nga, tsuwa kəlara su tə gə pəla alari ka tsa hara tsa ata harari. Mwari bu nggwa usa, ka gə shuwumta alari mji ngəni ni!”

¹⁸Amma Balaam shinau aka mjir thlentər Balak abbər, “Wala ma Balak an ata hamta ali kəyirni nghyinghyari ka adzərfa ka dinar, I aɗi ata hara su wala raka na ata ɓəli tsawur MTHLAKU na Hyelərna wa.

¹⁹Amma I akwa kiɗə giri abbər ashina ni ka giri pi tsu apatə mji na ndaga hara. Antə ma ɗəpa I ata nggaɓəla, nuhum MTHLAKU ka su damwa tə tsa ata pəla ali.”

²⁰Antə Hyel ku si adzə Balaam aviri ka pəla, “Təng tə ku ndzi mji ngəni si dzaku kamnyar kəga nga, thlatə ka giri təra kəga da, amma tar su tə I pəla ala gə daci antə ga ata harari.”

²¹Kurər virari ɗəɗəpa antə Balaam putə libaru ata kwararni, ka ləta, ka təra kəga mji ol'olər tsəɗi Mowab.

²²Amma ɗəffa Hyel ku ɓzi ka duna kamnyar tə Balaam ku mwari. Antə mdərthlentər MTHLAKU ku thləthlata akwa laku, ka ngkata alari lakur təramta. Balaam akwa mwari ata kwararni ka buɗayeri arni suɗa adzə ni.

²³Sakatə kwara ni wutə mdərthlentər MTHLAKU ni athləthlatə ka katsakar akwa tsiyari natə mdə ntsuɓəla kazhar kəyari, antə kwara ni pəra kazhar laku ka tərkwa mtaku. Antə Balaam tsa kwara ni abbər ka kwara ni jaktə ngka akwa laku.

²⁴Aghəla nda antə mdərthlentər MTHLAKU ni ku ləkəma raka ka jaktə thləthlata akwa vəi tə laku ni cinggəthlu, akwa daɓwa banggwar pelayeri laga suɗa abwani ka abwanda, akwa daɓwa fakayeri ar anap.

²⁵Sakatə kwara ni wutə mdərthlentər MTHLAKU ni, antə tsa shahədzi adzə banggwar pela ni har ka ngyingyihə səla Balaam adzə pela ni. Antə Balaam jaktə tsa kwara ni ka damwa.

²⁶Antə mdərthlentərhyel ar MTHLAKU jaktə ləkəma ka thləthlata akwa vəi na cinggəthlu ka duna, natə har vəi shinardzi wala raka aɗi təbwa mazəm wala təbwa matsəkar wa.

²⁷Sakatə kwara ni ku wutə mdərthlentərhyel ar MTHLAKU, antə tsa pəpəi ata di ka Balaam. Antə ɗəffa Balaam ɓzi ka duna, tə tsa tsa kwara ni ka zwal.

²⁸Antə MTHLAKU kəlar mnya kwara ni, tə kwara ni ndəra ka pəla aka Balaam abbər, “Man su tə I hara ala gə tə gə tsa ra har ka makər nə ri?”

²⁹Antə Balaam pəla aka kwara ni, “Kamnyar ga ku namtə ra apa I kəgaɓu. Ma abbər I an ka katsakar akwa tsi, sakani I ku tsi nga!”

³⁰Amma kwara ni pəla aka Balaam, “Aɗi I an kwarar ngə wa ya? Aɗi I antə ga ana fəla akwa shanga virayeri ar mpika ga har ka vədza aka vir na ashina wa ya? I ku ɗar hara ala gə su apani ya?” Antə Balaam pəla, “Awa.”

³¹Antə MTHLAKU kəlar nca Balaam tə tsa wutə mdərthlentər MTHLAKU athləthlata akwa laku ka katsakar ntsuntswari akwa tsiyari. Antə Balaam zuzuri ka murkəmari ata di.

³²Antə mdərthlentər MTHLAKU pəla alari abbər, “Kamnyar mi tə gə tsa kwarar ngə har ka makər nə ri? I an səɓəla kamnyar kəi ngkatə nga, kamnyar ga akwa nu laku na aɗi kalkal akəmi wa.

³³Sakatə kwara ni wutə ra antə tsa pəra kazhar laku har ka makər. Ma abbər tsa an aɗi pəramta ali wa, sakani I ku tsi nga, ka zhar ni ka mpika.”

³⁴Antə Balaam pəla aka mdərthlentər MTHLAKU, “I ku hara biku, kamnyar I aɗi sənda abbər ga athləthlata akwa laku kamnyar ka gə ngkatə ra wa. Antə kulini ma gə wuta abbər aɗi kalkal kəi ləkəma wa, to I ata ngka avi.”

³⁵Antə mdərthlentər MTHLAKU ni pəla aka Balaam, “Mwar giri, kəga mji ni, amma tar su tə I pəla ala gə daci antə ga ata pəlari.” Apani antə Balaam ku təra kəga mji ol'olər Balak.

³⁶Sakatə Kuthli Balak ku nggata abbər Balaam akwa si, antə tsa ləɓəla ka ra thlakəmari ahar Ar, di laga na ata mnya Thlyagha Arnon, ata kəla tsəɗi Mowab.

³⁷Antə Balak pəla alari, “I aɗi thlenta akwa saka na təramta abbər ka gə si wa ya? Man hara tə ga aɗi si wa tar kulini nə ri? Nənga I aɗi mzhi kəi haptə səliyir ngə wa ri?”

³⁸Antə Balaam shinau aka Kuthli Balak abbər, “To, ai, nggədza ra ku si kulini. Amma arna I ka dunar pəla su laga ya? Tar su tə Hyel pəla ali antə I ata pəlari daci.”

³⁹Antə Balaam ku təra ka Kuthli Balak ka mwari ahar Kiriyath Huzoth.

⁴⁰Anda antə Kuthli Balak ku hara saɗaka ka thlayeri kəga təmayeri, ka hamta kumər ɗa aka Balaam ka mji ol'ola na adzə ni ni.

⁴¹Səɓəla ɗəpari ɗəɗəpa antə Balak kətə Balaam ka mwantə ni ata Bamoth Baal, watau vəi vəngkər səli ar Baal na ata kəra gar. Anda tsa ata mzhi wutə bwadukwa mjir Israila.