Read bura-pabir Jikayeri 23 Bible Online

Jikayeri 23 - bura-pabir bible

Jikayeri 23

¹Antə Balaam pəla ala Balak, “Hənta ali bagaɗi murfa azi, ka gə ɗəmha ali gyal murfa ka gam murfa.”

²Antə Balak ku hara tsu apatə Balaam pəla alari. Antə Balak ka Balaam ku hamta saɗaka ata kəra kəlara bagaɗi gyal pal ka gam pal.

³Aghəla nda antə Balaam pəla aka Balak abbər, “Ndzəndzi azi adzə saɗaka mbamba ar ngə ni, arna I ata təra mwari anda. Nuhum MTHLAKU asi ka yeru kəɓa. Antə ma tsa ku si, kəlara su tə tsa ku ncanta ali, I ata si kəi pəla ala ga.” Antə tsa ku təra ka ləmta akwa bəbal laga ata kəra gar.

⁴Sakatə Hyel si ka kəɓa ka Balaam, antə Balaam pəla alari abbər, “I ku ɗəmhə bagaɗi murfa, tsuwa ata kəra kəlara bagaɗi pal I ku hamta saɗakar gyal pal ka gam pal.”

⁵Antə MTHLAKU hamta ndər ar naɓikur aka Balaam. Aghəla nda antə tsa pəla aka Balaam, “Ngka adzə Balak, ka gə pəla alari su tə I pəla ala ga.”

⁶Antə tsa ku ngka adzə Kuthli Balak, ka wutə ni athləthlata adzə saɗaka mbamba arni ni, ka shanga mji ol'olər Mowab adzə ni.

⁷Antə Balaam ku pəlaɓəla naɓikurər arni abbər, “I ahar Aram antə Kuthli Balak səntə ra, akwa garayeri ar raghəi antə kuthlir Mowab kəgatə ra. ‘Asər, ka gə shuwumta ali Yakub,’ ndə tsa ‘Asər, ka gə nggəl Israila!’

⁸Apa madi tə I ata mzhi shuwumta mdə tə Hyel aɗi shuwumta wa ri? Apa madi tə I ata mzhi nggəl mdə tə MTHLAKU aɗi nggəl wa ri?

⁹Jiri, ata jikwara garayeri antə I wutə ni, ata ɗəɗəgəlayeri antə nci thlaudzi akwa tsa. Tsa an dur na andzəndzi shini, dur na aɗi jikau kərni akwa nca mambila mji wa.

¹⁰Wan ata mzhi jikatə durər Yakub ri? Hangkurər ɗa apa bərbər ata di. Wan ata mzhi jikatə mjir Israila ri? Wala bwa pal akwa kuta nfwar ma, wan ta mzhari ri? Hara kəi sə mta apa mtər mji na ka jirkur, ka mtərna sə ndzi apa ar Yakub.”

¹¹Antə Balak pəla aka Balaam, “Ngəni man tə gə hara ali nə ri? I səntə nga ka gə shuwumta ali dawayeri arna, amma təng ga akwa vədza ala ɗa barka!”

¹²Antə Balaam pəla, “Ai laku aɗi tə kəi ngkər su damwa zum ta su tə MTHLAKU pəla ali wa.”

¹³Antə Kuthli Balak pəla aka Balaam abbər, “Sər mwa təra mwari akwa vəi damwa tə ga ata mzhi wutə ɗa. Mji na kudzəha daci antə ga ata wutə ɗa, amma ga aɗi ata mzhi wutə shanga ɗa wa. Antə ga ata shuwumta ɗa ali anda.”

¹⁴Antə tsa mwantə ni akwa mtakər Zofim ata kəra Gar Pisga. Anda antə tsa həntə bagaɗi murfa ka hamta saɗaka ka gyal pal ka gam pal ata kəra kəlara bagaɗi.

¹⁵Antə Balaam pəla aka Kuthli Balak, “Ndzəndzi tsu azi adzə saɗaka mbamba ar ngə ni, arna I ata təra ka yeru ra kəɓa ka MTHLAKU anda.”

¹⁶Antə MTHLAKU ku kəɓa ka Balaam, antə tsa ku hamta ndər ar naɓikur aka Balaam. Aghəla nda antə tsa pəla aka Balaam, “Ngka adzə Balak, ka gə pəla alari su tə I pəla ala ga.”

¹⁷Antə Balaam ku ngka adzə Balak, ka wutə ni athləthlata adzə saɗaka mbamba arni ni, ka shanga mji ol'olər Mowab adzə ni. Antə Kuthli Balak pəla alari, “Man su tə MTHLAKU ku pəla ri?”

¹⁸Antə Balaam ku hara naɓikur arni abbər, “Thlatə Balak, ka gə nggatə ra, psi thləma ga ali, ɓzər Zippor.

¹⁹Hyel aɗi mdə wa, tə abbər nuhum tsa athlandəra wa! Tsuwa tsa aɗi ɓzər mdə wa, tə abbər nuhum tsa apali su tə tsa ɗəmhə wa. Tsa ku ɗar hara alkawal kula tsa nghyaɓəla ya? Tsa ku ɗar pəla su laga kula tsa haratə ya?

²⁰Nggədza, mdə ku tsawa ali kəi vədzə barka. Tsa ku kurtə ka vədzə barka, I amzhi paliyari wa.

²¹Mda aɗi wutə sur damitə mda adzə Yakub wa, tsuwa mda aɗi wutə Israila ka bwani wa. MTHLAKU na Hyelər ɗa an adzə ɗa, da akwa psəmnya abbər tsa an kuthlir ɗa.

²²Hyel na fwaɓəla ɗa akwa Masar ni, ndzi ala ɗa apa təmbəla kufur

²³Thləkula aɗi na ata səm Yakub wa, tsuwa hakdzi aɗi na ata hara su aka Israila wa. Ata kəra Yakub ka Israila, mda ata pəla, ‘Wul giri jili su tə Hyel hara nggwa!’

²⁴Nggədza mjir Israila ndzi apa mwala tsəngi. Thlatər ɗa ka mwar ɗa apa ar sala tsəngi! Tsa aɗi ata pəpəi wa, tar ma tsa ku ɓɗəmnya su tə tsa ngkəi, tar ma tsa ku samnya mamshir kum mtaku tə tsa tsi.”

²⁵Antə Balak pəla aka Balaam, “Ma ga aɗi ata shuwumta ɗa wa, to, ga aɗiya ghər vədzə barka ala ɗa wala raka wa.”

²⁶Amma Balaam shinau aka Kuthli Balak abbər, “I aɗi pəla ala gə wa ya? Ai shanga su tə MTHLAKU ku pəla, an su tə I ata pəlari.”

²⁷Aghəla nda antə Balak pəla aka Balaam, “Sər kəi mwantə nga akwa vəi damwa. Nuhum vəi ngənda akəs kəra Hyel ka tsa kələngkər ka gə shuwumta ɗa ali anda.”

²⁸Antə Balak mwantə Balaam ata kəra Gar Peyor na awul mtakər wuyaku.

²⁹Antə Balaam pəla aka Balak, “Hənta ali bagaɗi murfa azi, ka gə ɗəmha ali gyal murfa ka gam murfa.”

³⁰Antə Balak ku hara tsu apatə Balaam pəla alari. Antə tsa ku hamta saɗaka gyal pal ka gam ata kəra kəlara bagaɗi.