Read bura-pabir Jikayeri 24 Bible Online

Jikayeri 24 - bura-pabir bible

Jikayeri 24

¹Sakatə Balaam nggaɓəla abbər ata ndzi kalkal aka MTHLAKU ka tsa vədzə barka aka mjir Israila, antə tsa aɗi jaktə ra ndzəl su apa na hwatu kəra wa, amma tsa ana thlentə kəmari tsək ka mtaku daci.

²Sakatə Balaam haptə ncari təng tsa wutə mjir Israila ku pwidzi ata nyarmbwa ata nyarmbwa. Antə Mambələr Hyel ku si ata kərari.

³Antə Balaam ku hara naɓikur ka pəla, “Labar naɓikur ar Balaam na ɓzər Beyor, naɓikur ar mdə na ka ncar wutə su,

⁴naɓikur ar mdə na ana nggatə ndərər Hyel, mdər wutə su akəla Na ka Duna ta Shang mdər dlu ndər akəla Hyel, mda tə mdə ku kəlar ncari.

⁵Kəmar ɓɗakkur tentayeri ar nga aɗi wa, Yakub kəmar vəi ndzəndziyir giri aɗi wa, mjir Israila!

⁶Da tsutswar tsutswar apa kuɓər nfur jara apa fakayeri na ata mnya thlyagha, apa nfur alowayeri natə MTHLAKU ncimta, apa nfur seda na ata mnya yimayeri.

⁷Da ata wutə yimərhyel na ata mzhi ɗa ka da thləka akwa vəi na ka yimi hang.” “Kuthlir ɗa ata təramta Agag ka olkur mda ata haptə səliyir kuthlikur arni.

⁸Hyel na fwaɓəla ɗa akwa Masar, dunari ndzi ala ɗa apa təmbəla kufur. Yakub ata səməmnya tsəɗiyayeri na dawarni, ka ɓəgələmta ɗethlayeri arɗa, ka ntsəntsəvtə ɗa ka afayeri arni.

⁹Apa sala tsəngi, antə Israila pəpəi ka ndərardzi apa mwala tsəngi, wan ata bara mparni ja? Israila, kəlara mdə na ku vədza barka ala ga, mda ata vədzə barka alari, tsuwa kəlara mdə na ku shuwumta nga mda ata shuwumta ni.”

¹⁰Antə ɗəffa Balak ɓzi ka duna adzə Balaam, tə tsa ɓumta tsiyari ka pəla, “Kwafa! I kəga nga abbər ka gə shuwumta ali dawayeri arna, amma təng gə ra vədzə ala ɗa barka har ka makər!

¹¹Kulini mwa kara təra ləha! Shang I pəla I ata na gə watsəɓa na pwa, amma MTHLAKU ku ngkata ala gə watsəɓa ni.”

¹²Antə Balaam pəla aka Kuthli Balak abbər, “Shang I aɗi ka pəla aka mjirthlentər ngə wa ya?

¹³I pəla abbər, ‘Wala ma kuthli an ata hamta ali kəyirni, ka shanga adzərfa, ka dinar na akwa, I aɗi ata mzhi hara su damwa zum ta su tə MTHLAKU pəla wa, abbər kəi hara su na ɓɗaku wala su na ɗimi ka kəri wa. Tar su tə MTHLAKU pəla ali, antə I ata pəlari.’

¹⁴Kulini, I ata ngka adzə mjirna, amma asər kəi pəla ala gə su tə mjir Israila ngəni ata sə harari aka mjir nga vir laga.”

¹⁵Antə Balaam ngkər labar naɓikur ngəni abbər, “Naɓikur tə Balaam na ɓzər Beyor hara, naɓikur ar mdə na ka ncar mzhi wutə su,

¹⁶naɓikur ar mdə na ana nggatə ndərər Hyel, mdə na dlu səndərni akəla mdə na ka səli ta shang, mdər wutə su akəla Na ka Duna ta Shang mdər dlu ndər akəla Hyel, mda tə mdə ku kəlar ncari.”

¹⁷“I ana wutə ni, amma aɗi kulini wa, I akwa wul ni, amma aɗi kudzəhə wa. Sasəlka ata sə səɓəla akwa nyarmbwar Yakub, zwal kuthlikur ata sə səɓəla akwa Israila. Tsa ata sə pukthləmta murkəma mjir Mowab Ka jijaɓumta kugwar kəra maɗashilər Seth

¹⁸Mda ata səm Edom akwa mpa, mda ata səm tsəɗi Seyir, sakatə Israila ata ncanta ala ɗa duna.

¹⁹Akwa nyarmbwar Yakub antə kuthlikur ata sə səɓəla, ka kurəmta mji na mbil ka mpika ahar Ir.”

²⁰Antə Balaam wul mjir Amalek, ka ngkər naɓikur ngəni abbər, “Amalek an di na ka duna akwa nca tsəɗiyayeri, amma tsikərari ata sə ndzi mta.”

²¹Antə Balaam ku wul mjir Keni, ka ngkər naɓikur ngəni abbər, “Vəi ndzəndziyir giri ku ncidzi gyang, kəyayeri ar giri ɗuwarɗuwari akwa nca pela.

²²Amma wala apani mjir nyarmbwar Kayinu ata kurəmtadzi, sakatə mjir Assiriya ku fatə giri apa mafayeri.”

²³Antə Balaam ngkər naɓikur ngəni abbər, “Sha ku wutə mji! Wan ata mbili ka mpika ri ma Hyel pəla tsa ata hara su ngəni?

²⁴Sharayeri ar yimi ata sə thlata ahar Kittim ka si, da ata sə hara bwani aka Assiriya ka Eber, da ka kərɗa ma mda ata sə shamta ɗa.”

²⁵Aghəla nda antə Balaam thlatə ka ngka akwa diyirni, antə Kuthli Balak tsuwa ku təra ka bwarni.