Read bura-pabir Jikayeri 25 Bible Online

Jikayeri 25 - bura-pabir bible

Jikayeri 25

¹Sakatə mjir Israila ku fəli akwa Shittim, antə shilər ɗa baɗitə pi ka mwankir mjir Mowab.

²Mwanki nayeri ni ana kəga mjir Israila akwa saɗakar haptayeri arɗa. Antə mjir Israila ana səm susəmər saɗakar ɗa ka vəngkər səli aka haptayeri arɗa.

³Apani antə mjir Israila hamta kərɗa akwa vəngkər səli aka haptu Baal ar Peyor, antə ɗəffa MTHLAKU ku ɓzi ka duna ata kəra ɗa.

⁴Antə MTHLAKU pəla aka Musa, “Fatə shanga mji na ol'olər mjir Israila na səntə su ngəni ni, ka gə kukwamta ɗa ata pci akəma MTHLAKU, kamnyar ka bwarbwarkur ɗəffa MTHLAKU ata kəra mjir Israila ni mtathla.”

⁵Antə Musa pəla aka alkaliyayeri ar Israila abbər, “Ka waskəi akwa nca giri tsəgəi mjirni na ku vəngkər səli aka haptu Baal ar Peyor.”

⁶Aɗi fəi wa təng mdər Israila laga si ka mwala Midiyan laga ka ləkwa tentərni ka tsa tsu ata nca Musa ka shanga mjir Israila na tsaptədzi, sakatə da akwa tuwa anyarfur Tentər Kəɓa.

⁷Sakatə Finehas na ɓzər Eleyazar, na kəkar Haruna na prist, wutə mdə ngəni, antə tsa thlata akwa nca mji na tsaptədzi ni, ka kətə mwasərni akwa tsiyari,

⁸ka nutə mdə ni ka mwala ni ba akwa tentərni ka ntsəvəmta ɗa japu. Antə mwasu ni təramta akwa dza mdər Israila ni har ka ləkwa dza mwala ni. Antə mdə ku thləthlatə ka shilku na mwavər na təri ata kəra mjir Israila ni.

⁹Amma wala apani shilkə ni ku kurtə tsəgəi mji dəpu sərkumari ka nfwar.

¹⁰Antə MTHLAKU pəla aka Musa abbər,

¹¹“Finehas na ɓzər Eleyazar, na ɓzər Haruna na prist, ku kələmta ɗəffə bwarbwarkur arna ata kəra mjir Israila, kamnyar tsa ku ncanta ata bəbal akwa nca ɗa abbər tsa hir ra ka duna ka ɗəffari duku. An su na hara tə I aɗi shamta mjir Israila shang kazhar kəra duniya sakatə ɗəffi ɓzə wa ni.

¹²Antə ka gə pəla alari, ‘I ata mbwi alkawal ar msərakur ka tsa.

¹³Antə alkawal ngəni ata ndzi alari kəga nyarmbwarni, alkawal ar ndzi prist na ba saka madi, kamnyar tsa ku səlkər hirkur Hyelərni, ka hara su tə mdə thlamta kamnyar kələmta watsəɓər bikər mjir Israila.’ ”

¹⁴Thləma mdər Israila natə mdə tsi ni ata kəma duku ka mwalar Midiyan nda an Zimri na ɓzər Salu, tsa an olər mjir nyarmbwar Simeyon.

¹⁵Tsuwa thləma mwala Midiyan natə mdə tsi ni an Kozbi, ngkwar Zur. Tsuwa Zur na baba'ni an kuthlir mjir nyarmbwa laga ahar Midiyan.

¹⁶Antə MTHLAKU pəla aka Musa abbər,

¹⁷“Mwar giri, ka giri pwa ata kəra mjir Midiyan ka mpa, ka giri kurəmta ɗa,

¹⁸kamnyar da ku sənta ala giri mpa atar kwasherikurər ɗa ka pwaktəmta giri. Da pwaktəmta giri akwa sur Peyor ka akwa wujir Kozbi na ngkwarma' mjir Midiyan. Tsuwa ngkwar mdə laga na olər ɗa, natə mdə tsi vir tə shilku na mwavər təri ahar Peyor ni.”