Read bura-pabir Jikayeri 27 Bible Online

Jikayeri 27 - bura-pabir bible

Jikayeri 27

¹Zelofehad an ɓzər Hefer, na ɓzər Gileyad, na ɓzər Makir, na ɓzər Manasse, na ɓzər Yusuf. Antə Zelofehad ka maɗankwi ntəfu tə tsa yaɓəla. Thləma ɗa an Mala, ka Nuhu, ka Hogla, ka Milka, ka Tirza. Vir laga təng maɗa' Zelofehad na ntəfu ni səɓəla ka mwari akwa nyarmbwar Tentər Kəɓa kamnyar bara sauri.

²Antə da mwari ka thləthlata akəma Musa ka Eleyazar na prist, ka mji ol'ola, ka shanga mji na tsaptədzi anyarmbwar Tent ni. Antə da pəla,

³“Baba yeru ku mti akwa mtaku. Amma tsa aɗi akwa nca mjir Kora na paktə mnya ata kəra MTHLAKU ni wa. Arni tsa mtə kamnyar su damwa zum tə tsa ɓzamta. Tsuwa tsa aɗi ka ɓzər sal wa.

⁴Kamnyar mi tə mda ata zhar ka thləma baba' yeru sha akwa nca yangkurayerari na mjir Israila ri? Abbər təng kamnyar tə tsa aɗi ka ɓzər sal wa ya? Yeru akwa kiɗa abbər ma ahara ka gə na ala yeru kifər baba' yeru tsu apa mambila maɗama'ni.”

⁵Antə Musa ku mwantə tuwar ɗa ni aka MTHLAKU.

⁶Antə MTHLAKU pəla aka Musa,

⁷“Gari natə maɗa' Zelofehad pəla ni tsa gari na kalkal. Antə jiri ga ata hamta ala ɗa kifər baba' ɗa tsu apatə ga ku hara aka mambila maɗama'ni. Tsuwa ka gə wuta abbər kifər baba' ɗa ku ləkwa tsiya ɗa.

⁸Tsuwa ka gə gari aka mjir Israila abbər, ‘Ma mdə ku mti, tsuwa tsa aɗi ka ɓzər sal wa, ka mdə nar kifərni ni aka ngkwarni.

⁹Ma tsa aɗi ka ɓzərngkwa tsu wa, ka mdə nar kifərni ni aka maɗama'ni na shili.

¹⁰Tsuwa ma tsa aɗi ka maɗama'ni na shili wa, to, ka mdə nar kifərni ni aka maɗada baba'ni.

¹¹Tsuwa ma mdə ni aɗi ka maɗada baba'ni wa, to, ka mdə nar aka yangkurari na kudzəha. Antə ngəni ata ndzi tsawa ka sur hara aka mjir Israila, apatə I na MTHLAKU ku tsawa ala ga.’ ”

¹²Antə MTHLAKU pəla aka Musa, “Lətə kəra Gar Abarim, ka gə wutə tsəɗi natə I hamta aka mjir Israila.

¹³Aghəla tə ga ku wutə ni, ga ata mta, ka gə ra wutə kəkayeri ar nga, tsu apatə ɓzərma' ngə Haruna ku hara,

¹⁴kamnyar tə japwa giri ku hara kər ɓəɓalkur aka tsawurna akwa Mtakər Zin. Sakatə shanga mji hara nggungguni ali akwa Meriba, giri aɗi ncanta ala ɗa abbər giri ku mbərsa ka duni na ɓɗakkarkar ni wa.” Nayeri ni an yimayeri ar Meriba na akwa Kadesh akwa Mtakər Zin.

¹⁵Antə Musa pəla aka MTHLAKU,

¹⁶“Ma akəs kəra ga MTHLAKU, gə na Hyel na hamta mpika aka shanga su tə gə namta akwa duniya, ka gə carɓəla mdə na ata ndzi ata kəra dlamar mji ngəni ni.

¹⁷Ka gə na ɗa mdə na ata mzhi pwar ɗa akwa mpa, ta dlamar mjir ngə ngəni asə ndzi apa təmayeri na kula mdər ɓəla.”

¹⁸Antə MTHLAKU pəla aka Musa abbər, “Kətə Joshuwa na ɓzər Nun, mdə na ka mambəl akwa dzari, ka gə pungkər tsiya ga alari kamnyar nar olkur.

¹⁹Ka gə vu ni ka tsa thləthlata akəma Eleyazar na prist, ka akəma shanga mji ngəni, ka gə hamta alari kəthlər ata nca ɗa.

²⁰Ka gə hamta alari bwadukwa dunar nga kamnyar ka shanga mjir Israila mzhi kələngkər alari.

²¹Antə kəlara sakatə wujir ar bara səndə su na akwa ɗəffi ku thlata, tsa ata vəkər ka Eleyazar na prist, kamnyar ka tsa səndə su na akwa ɗəffi, atar kəthlər ka Urim ka Thlummim. Atar apani antə Joshuwa ka shanga mjir Israila ata səndə su na ku kəskəra MTHLAKU ata kəra wujirayeri arɗa.”

²²Antə Musa ku hara kalkal apatə MTHLAKU ku tsawa alari. Tsa kətə Joshuwa ka vu tə tsa thləthlata akəma Eleyazar na prist, ka akəma shanga mjir Israila.

²³Antə tsa pungkər tsiyari alari kamnyar nar olkur, ka vu ni akwa kəthlər tsu apatə MTHLAKU ku tsawa alari.