Read bura-pabir Jikayeri 28 Bible Online

Jikayeri 28 - bura-pabir bible

Jikayeri 28

¹Antə MTHLAKU pəla aka Musa,

²ka tsa hamta tsawayeri ngəni aka mjir Israila abbər, “Ka giri wuta abbər giri ku hamta ali saɗakar susəma akwa sakatə mdə thlamta kalkal, susəmayeri tə mdə hamta ata u'u, na ata hamta shiwur na msəra ali.”

³“Nayeri ni an saɗakayeri tə mda ata hamtari ata u'u aka MTHLAKU, natə giri ata ləkəma ka hamtari tədək viri ba saka madi. Giri ata hamta maɗa' gam suɗa na ka məva pal pal, na kula nangka.

⁴Antə ka mdə hamta ɓzər gam na pal ɗəɗəpa, ka na palari ka mnya tahaku.

⁵Kəlara sakatə mda ata hamtari, ka tsa paktə ka saɗakar mpur mthli na liktikti tasa pal tə mdə hərtə ka mal zaitun na thləlthləlari ɓɗaku kwalɓa pal.

⁶Ngəni an saɗaka mbamba tə mda ana hara tədəku, natə mdə baɗitə hamtari akwa Gar Sinai kamnyar hamta shiwur na msəra, saɗaka tə mdə hamta ata u'u aka MTHLAKU.

⁷Mda ata paktə hamta saɗakar ɓzər gam na ntangkəma ni ka saɗakar sur sa na mwavər kwalɓa pal. Ka mdə ɗamta saɗakar sur sa ni aka MTHLAKU ata bagaɗi na akwa Vəi na Ɓɗakkarkara ni.

⁸Ɓzər gam na suɗkur ni tsuwa, ka mdə hamta ni ka mnya tahaku, ata kəma duku saɗakar sur sa, tsu apatə mdə hara ka saɗakar mpur mthli na liktikti ɗəɗəpa nda. Ka mdə hamta ni ata u'u kamnyar ka tsa hamta shiwur na msəra aka MTHLAKU.”

⁹“Ma Vir Ghərəmtaghəra ar Sati, ka mdə hamta maɗa' gam suɗa na ka məva pal pal na kula nangka, ka mpur mthli na liktikti tasa suɗa tə mdə hərtə ka mal zaitun, ka saɗakar sur sa.

¹⁰Ngəni an saɗaka mbamba natə mda ata hamtari tədəku Vir Ghərəmtaghəra ar Sati, ata kəra saɗaka mbamba ka saɗakar sur sa natə mda ana hamta tədək viri ni.”

¹¹“Akwa vir na ntangkəma ar kəlara thliya antə ka mdə hamta saɗaka mbamba aka MTHLAKU. Ka mdə hara saɗaka ni ka maɗa' gyal suɗa, ka gam pal, ka maɗa' gam murfa na ka məva pal pal, tsuwa na kula nangka.

¹²Mda ata hamta saɗaka mbamba ni ata kəma duku ka mpur mthli na liktikti tasa makər tə mdə hərtə ka mal zaitun. Tsuwa mda ata paktə hamta kəlara gyal pal ka mpur mthli na liktikti tasa makər. Tsuwa kəlara gam pal mda ata paktari ka mpur mthli na liktikti tasa suɗa.

¹³Mda ata paktə hamta kəlara ɓzər gam pal ka mpur mthli na liktikti tasa pal. Antə saɗaka mbamba tə mdə hamta ata u'u ata hamta shiwur na msəra aka MTHLAKU.

¹⁴Ar saɗakar sur sa arɗa, kəlara gyal pal mda ata paktari ka yimər anap kwalɓa suɗa, kəlara gam pal mda ata paktari ka yimər anap kwalɓa pal ka reta, tsuwa kəlara ɓzər gam pal mda ata paktari ka yimər anap kwalɓa pal. Ngəni an tsawa ka sur hara tə ka mdə nuwa akwa kəlara saɗaka mbamba tə mda ata harari akwa vir na ntangkur ar kəlara thliya na akwa məva.

¹⁵Tsuwa mda ata hamta nciwa pal aka MTHLAKU kamnyar saɗakar kəcimta biku, ata kəra saɗaka mbamba ka saɗakar sur sa tə mda ana hara tədəku ni.”

¹⁶“Mda ata sə hara saɗakar Kucalər Fəlɓəla Kəi aka MTHLAKU akwa vir na kumnya nfwarkur ar thliya na ntangkəma.

¹⁷Səɓəla ɗəpari akwa vir na kumnya ntəfkur ar thliya ni antə mda ata baɗitə hara Kucalər Buradi na kula yist ni. Da ata hara vir murfa akwa kwasə buradi na kula yist ni.

¹⁸Akwa vir na ntangkəma giri ata tsaptədzi kamnyar vəngkər səli, antə giri aɗiya hara kəthlər ar duna wa.

¹⁹Giri ata hamta saɗaka ata u'u aka MTHLAKU, saɗaka mbamba tə mda ata harari ka maɗa' gyal suɗa, ka maɗa' gam murfa na ka məva pal pal. Shanga mwaɓiyayeri ngəni ka da ndzi kula nangka.

²⁰Tsuwa kəlara ɓzər gyal tə mda ata hara saɗaka kəgari, mda ata paktari ka saɗakar mpur mthli na liktikti tasa makər, ka tasa suɗa kamnyar kəlara gam pal,

²¹ka tasa pal kamnyar kəlara ɓzər gam pal.

²²Giri ata hamta nciwa pal kamnyar saɗakar kəcimta biku, kamnyar kələmta watsəɓər bikər giri.

²³Giri ata hamta saɗakayeri ngəni ata kəra saɗaka mbamba natə mda ana hamta ɗəɗəp ɗəɗəpa ni.

²⁴Apani antə giri ata hamta susəmər saɗaka tə mdə hamta ata u'u tədək viri, har vir murfa, ka tsa ndzi saɗaka na ata hamta shiwur na msəra aka MTHLAKU. Giri ata hamta saɗakayeri ngəni ata kəra saɗaka mbamba, ka saɗakar sur sa tə mdə ana hamta tədəku.

²⁵Akwa vir na murfəkur ar kucali ni giri ata jaktə tsaptədzi kamnyar vəngkər səli, antə giri aɗi ata hara kəthlər tə giri tsəli ka harari tədəku wa.”

²⁶“Akwa vir na ntangkəma ar Kucalər Səvi Ka Sur Faku, watau vir tə giri ata hamta saɗakar mthli bilən aka MTHLAKU, shanga giri ata tsaptədzi ata kəma duku kamnyar vəngkər səli. Antə giri aɗi ata hara kəthlər ar duna tə giri tsəli ka harari tədək viri wa.

²⁷Giri ata hamta maɗa' gyal suɗa, ka gam pal, ka maɗa' gam murfa na ka məva pal pal, kamnyar hara saɗaka mbamba, na ata hamta shiwur na msəra aka MTHLAKU.

²⁸Mda ata hamta saɗakar mpur mthli na liktikti tə mdə hərtə ka mal zaitun apani, watau tasa makər kamnyar kəlara ɓzər gyal pal, ka tasa suɗa kamnyar kəlara gam pal,

²⁹ka tasa pal kamnyar kəlara ɓzər gam pal.

³⁰Tsuwa giri ata hamta nciwa pal kamnyar saɗakar kəcimta biku, kamnyar kələmta watsəɓər bikər giri.

³¹Ata kəra saɗaka mbamba tə giri ana hara tədək viri ata kəma duku ka saɗakar mthli ni, giri ata paktə hamta saɗaka ngəni ka saɗakar sur sa. Ka giri ɗangta abbər tar ka mwaɓiyayeri ni ndzi kula nangka.”