Read bura-pabir Jikayeri 29 Bible Online

Jikayeri 29 - bura-pabir bible

Jikayeri 29

¹“Akwa vir na ntangkəma ar thliya na murfa, ka giri tsaptədzi ata kəma duku kamnyar vəngkər səli, antə giri aɗi ata hara kəthlər natə giri tsəli ka harari tədəku wa. Vir nda an vir tə giri ata mbur təmbəlayeri.

²Antə ka giri hamta saɗaka mbamba ka ɓzər gyal pal, ka gam pal, ka maɗa' gam murfa na ka məva pal pal, ka tsa ndzi saɗaka na ata hamta shiwur msəra aka MTHLAKU. Ka mwaɓiyayeri ni ndzi kula nangka.

³Mda ata hara saɗaka ni ka mpur mthli na liktikti tə mdə hərtə ka mal zaitun. Mda ata harari ka mpu tasa makər kamnyar kəlara ɓzər gyal, ka tasa suɗa kamnyar kəlara gam,

⁴ka tasa pal kamnyar kəlara ɓzər gam.

⁵Tsuwa giri ata hamta nciwa pal kamnyar saɗakar kəcimta biku, kamnyar kələmta watsəɓər bikər giri.

⁶Giri ata hamta saɗakayeri ngəni ata kəra saɗaka mbamba ka saɗakarni ar mthli ar thliya bilən, ka saɗaka mbamba ka saɗakarni ar mthli tə giri ana hamta tədək viri, ka saɗakayeri arɗa na ar sur sa. Giri ata hamta ɗa apatə mdə ku thlamta. Antə saɗaka tə mdə hamta ata u'u, ata hamta shiwur na msəra aka MTHLAKU.”

⁷“Akwa vir na kumkur ar thliya na murfəkur, giri ata tsaptədzi ata kəma duku kamnyar vəngkər səli, ka giri kəl asham. Tsuwa giri aɗi ata hara kəthlər wala raka wa.

⁸Amma ka giri hamta aka MTHLAKU saɗaka mbamba na ka shiwurari msəra, ka ɓzər gyal pal, ka gam pal, ka maɗa' gam murfa na ka məva pal pal. Tsuwa ka shanga mwaɓiyayeri ni ndzi kula nangka.

⁹Saɗakar ɗa na ar mpur mthli na liktikti tə mdə hərtə ka mal zaitun ni ata ndzi, mpu tasa makər kamnyar kəlara ɓzər gyal, ka tasa suɗa kamnyar kəlara gam,

¹⁰ka tasa pal kamnyar kəlara ɓzər gam.

¹¹Tsuwa giri ata hamta nciwa pal kamnyar saɗakar kəcimta biku, kamnyar kələmta watsəɓər bikər giri, ka saɗaka mbamba na ar tədək viri, ata kəma duku ka saɗakarni ar mthli, ka saɗakar ɗa na ar sur sa.”

¹²“Akwa vir na kumnya ntəfkur ar thliya na murfəkur, antə giri ata tsaptədzi ata kəma duku kamnyar vəngkər səli. Antə giri aɗi ata hara kəthlər tə giri tsəli ka harari tədək viri wa. Giri ata hara kucalər vəngkər səli aka MTHLAKU har vir murfa.

¹³Giri ata hamta saɗaka mbamba, saɗaka tə mdə hamta ata u'u, na ata shiwur msəra aka MTHLAKU, ka maɗa' gyal kumnya makər, ka gamayeri suɗa, ka maɗa' gam kumnya nfwar na ka məva pal pal. Shanga mwaɓiyayeri ni ka da ndzi kula nangka.

¹⁴Saɗakar ɗa na ar mpur mthli na liktikti tə mdə hərtə ka mal zaitun ni ata ndzi, mpu tasa makər kamnyar kəlara ɓzər gyal, ka tasa suɗa kamnyar kəlara gam,

¹⁵ka tasa pal kamnyar kəlara ɓzər gam.

¹⁶Tsuwa giri ata hamta nciwa pal kamnyar saɗakar kəcimta biku, ata kəra saɗaka mbamba tə giri akwa ləkəma ka hamtari tədək viri, ata kəma duku ka saɗakarni ar mthli ka na ar sur sa.”

¹⁷“Akwa vir na suɗkur ar kucali ni, ka giri hamta maɗa' gyal kumnya suɗa ka gam suɗa, ka maɗa' gam kumnya nfwar na ka məva pal pal. Tsuwa ka shanga mwaɓiyayeri ni ndzi kula nangka.

¹⁸Giri ata hamta gyalayeri, ka gamayeri, ka maɗa' gamayeri ni, ata kəma duku ka saɗakar mthli ka saɗakar sur sa ata kəra hangkur su tə mdə thlamta.

¹⁹Tsuwa giri ata hamta nciwa pal kamnyar saɗakar kəcimta biku, ata kəra saɗaka mbamba tə giri ana hamta tədək viri ata kəma duku ka saɗakarni ar mthli ka saɗakayeri arɗa na ar sur sa.”

²⁰“Akwa vir na makərkur ar kucali ni, giri ata hamta maɗa' gyal kumkantang, ka gam suɗa, ka maɗa' gam kumnya nfwar na ka məva pal pal, shanga ɗa kula nangka.

²¹Giri ata paktə hamta kəlara saɗakar maɗa' gyalayeri, ka gamayeri, ka maɗa' gamayeri ni ata kəma duku ka saɗakar mthli, ka saɗakayeri na ar sur sa, ata kəra hangkur su tə mdə thlamta.

²²Tsuwa giri ata hamta nciwa pal kamnyar saɗakar kəcimta biku, ata kəra saɗaka mbamba tə giri ana hamta tədək viri, ata kəma duku ka saɗakarni ar mthli ka na ar sur sa.”

²³“Akwa vir na nfwarkur ar kucali ni, giri ata hamta maɗa' gyal kuma, ka gam suɗa, ka maɗa' gam kumnya nfwar na ka məva pal pal, shanga ɗa kula nangka.

²⁴Giri ata paktə hamta maɗa' gyalayeri, ka gamayeri, ka maɗa' gamayeri ni ata kəma duku ka saɗakar mthli ka saɗakayeri na ar sur sa, ata kəra hangkur su tə mdə thlamta.

²⁵Tsuwa giri ata hamta nciwa pal kamnyar saɗakar kəcimta biku, ata kəra saɗaka mbamba tə giri ana hamta tədək viri, ata kəma duku ka saɗakarni ar mthli ka na ar sur sa.”

²⁶“Akwa vir na ntəfkur ar kucali ni, giri ata hamta maɗa' gyal əmdla, ka gam suɗa, ka maɗa' gam kumnya nfwar na ka məva pal pal, shanga ɗa kula nangka.

²⁷Giri ata paktə hamta maɗa' gyalayeri, ka gamayeri, ka maɗa' gamayeri ni ata kəma duku ka saɗakar mthli ka saɗakayeri na ar sur sa, ata kəra hangkur su tə mdə thlamta.

²⁸Tsuwa giri ata hamta nciwa pal kamnyar saɗakar kəcimta biku, ata kəra saɗaka mbamba tə giri ana hamta tədək viri, ata kəma duku ka saɗakarni ar mthli ka na ar sur sa.”

²⁹“Akwa vir na ngkwakur ar kucali ni, giri ata hamta maɗa' gyal ncisu, ka gam suɗa, ka maɗa' gam kumnya nfwar na ka məva pal pal, shanga ɗa kula nangka.

³⁰Giri ata paktə hamta maɗa' gyalayeri, ka gamayeri, ka maɗa' gamayeri ni ata kəma duku ka saɗakar mthli ka saɗakayeri na ar sur sa, ata kəra hangkur su tə mdə thlamta.

³¹Tsuwa giri ata hamta nciwa pal kamnyar saɗakar kəcimta biku, ata kəra saɗaka mbamba tə giri ana hamta tədək viri, ata kəma duku ka saɗakarni ar mthli ka na ar sur sa.”

³²“Akwa vir na murfəkur ar kucali ni, giri ata hamta maɗa' gyal murfa, ka gam suɗa, ka maɗa' gam kumnya nfwar na ka məva pal pal, shanga ɗa kula nangka.

³³Giri ata paktə hamta maɗa' gyalayeri, ka gamayeri, ka maɗa' gamayeri ni ata kəma duku ka saɗakar mthli ka saɗakayeri na ar sur sa, ata kəra hangkur su tə mdə thlamta.

³⁴Tsuwa giri ata hamta nciwa pal kamnyar saɗakar kəcimta biku, ata kəra saɗaka mbamba tə giri ana hamta tədək viri, ata kəma duku ka saɗakarni ar mthli ka na ar sur sa.”

³⁵“Akwa vir na nciskur ar kucali ni, giri ata tsaptədzi shang ata kəma duku kamnyar vəngkər səli, antə giri aɗi ata hara kəthlər tə giri tsəli ka harari tədəku wa.

³⁶Giri ata hamta saɗaka mbamba, saɗaka tə mdə hamta ata u'u, na ka shiwurari msəra aka MTHLAKU, ka ɓzər gyal pal, ka gam pal, ka maɗa' gam murfa na ka məva pal pal, shanga ɗa kula nangka.

³⁷Giri ata paktə hamta maɗa' gyalayeri, ka gamayeri, ka maɗa' gamayeri ni ata kəma duku ka saɗakar mthli ka saɗakayeri na ar sur sa, ata kəra hangkur su tə mdə thlamta.

³⁸Tsuwa giri ata hamta nciwa pal kamnyar saɗakar kəcimta biku, ata kəra saɗaka mbamba tə giri ana hamta tədək viri, ata kəma duku ka saɗakarni ar mthli ka na ar sur sa.”

³⁹“Nayeri ni an saɗakayeri tə giri ata hamta aka MTHLAKU akwa sakar kucalayeri ar giri tə mdə thlamta, ata kəra saɗakayeri ar giri na ar nghyaɓəla alkawalayeri, kəga suayeri tə giri ana hamta ar hirər ɗəffu, ka saɗaka mbamba, ka saɗakar mthli, ka saɗakar sur sa, kəga saɗakar jakə mwardzi.”

⁴⁰Antə Musa ku pəla aka mjir Israila shanga suayeri tə MTHLAKU tsawa alari.