Read bura-pabir Jikayeri 3 Bible Online

Jikayeri 3 - bura-pabir bible

Jikayeri 3

¹Nggədza labar ar kutakəyir Haruna ka Musa akwa sakatə MTHLAKU ku gari ka Musa ata Gar Sinai.

²Nayeri ni an thləma maɗashilər Haruna, Nadab natə tsa an yarakəma, ka Abihu, ka Eleyazar, ka Ithlamar.

³Tsuwa da an maɗashilər Haruna natə mdə bartə kəra ɗa ka hamta ala ɗa kari kəthlər ar pristkur.

⁴Amma ar Nadab ka Abihu da ku mti akəma MTHLAKU tsu akwa Mtakər Sinai, sakatə da kəthlər ka u'u na aɗi kalkal wa akwa hamta saɗaka aka MTHLAKU. Antə da ku mti kula maɗankyar. Antə tar Eleyazar ka Ithlamar an hara kəthlər pristkur ata kəma duku ka baba' ɗa Haruna.

⁵Antə MTHLAKU pəla aka Musa,

⁶“Səntə ali mjir nyarmbwar Lawi ka da thləthlata akəma Haruna na prist, ka gə namtə ɗa ka da ndzi mjir dlar Haruna akwa kəthlərərni na ar pristkur.

⁷Da ata hara kəthlər aka Haruna ka aka shanga mjir Israila akwa Tentər Kəɓa, akwa kəlara sakatə da akwa hara kəthlər ar mbwar Hyel.

⁸Mjir Lawi ni an ata wul lapiyakur shanga kariyayeri na akwa kuta Tentər Kəɓa ni. Tsuwa da ata hara kəthlər aka mjir Israila nvwa ɗa, kəlara sakatə da akwa hara kəthlər akwa Tent ni.

⁹Antə akwa nca mjir Israila ni, ga ata hamta mjir Lawi aka Haruna ka maɗa'ni. Da antə mda ata hamta ɗa swakti alari akwa nca mjir Israila

¹⁰Antə kara vu Haruna ka maɗashilərni ka da hara kəthlər ar pristkur da shiɗa, ma mdə damwa zum ku pəla tsa ata hadzə tsiyari, mda ata tsi ni.”

¹¹Antə MTHLAKU jaktə pəla aka Musa,

¹²“Nggədza I ku dlu mjir Lawi akwa nca mjir Israila ata vəya shanga maɗashili na yarakəma, na kəlar kuta mama' ɗa ntangkəma. Shanga mjir Lawi ata ndzi arna,

¹³kamnyar shanga yarakəma an arna. Sakatə I kurəmta shanga yarakəmar mjir Masar, I ku pwi aka kəri shanga yarakəmar Israila, wala na ar mda, wala na ar mwaɓi, da ata ndzi arna. I an MTHLAKU.”

¹⁴Antə MTHLAKU pəla aka Musa akwa Mtakər Sinai abbər,

¹⁵“Jikatə maɗashilər mjir Lawi kutakəi kutakəi, ka nyarmbwa nyarmbwa atar kəkayeri arɗa. Ka gə jikatə kəlara mdə sal, baɗitə ka ɓzər sal na ka thliyari pal har ka ləmta.”

¹⁶Antə Musa ku jikatə ɗa kalkal apatə MTHLAKU ku tsawa alari.

¹⁷Antə nayeri ni an thləma maɗashilər Lawi, Gershon, ka Kohath, ka Merari.

¹⁸Nayeri ni thləma maɗashilər Gershon kəga kutakəyayeri arɗa, Libni ka Shimeyi.

¹⁹Nayeri ni an thləma maɗashilər Kohath kəga kutakəyayeri arɗa, Amram, ka Izhar, ka Hebron, ka Uzziyel.

²⁰Nayeri ni an maɗashilər Merari kəga kutakəyayeri arɗa, Mahli ka Mushi. Nayeri ni an nyarmbwayeri ar mjir Lawi atar kəkayeri arɗa.

²¹Akwa nyarmbwar Gershon mdə ku wutə kutakəyir Libni ka kutakəyir Shimeyi. Da an kutakəyir Gershon.

²²Antə hangkur shanga mji shili baɗitə ka ɓzər sal na ka thliyari pal har ka ləmta, an mji dəpu murfa ka aru ntəfu.

²³Mjir nyarmbwar Gershon ata pwi tentayeri arɗa təbwar ramta ka Tentər vəngkər səli.

²⁴Eliyasaf na ɓzər Layel an olər mjir nyarmbwar Geshon.

²⁵Kəthlər ar maɗa' Gershon akwa Tentər Kəɓa ni an ka da wul lapiyakur Tent ni, ka sur hartari na avivi ka na aɓəlaɓəla, ka lapəliyir nyarmbwar ləkwa Tent ni,

²⁶ka lapəliyayeri na kalaktə bəbalər Tent ka bagaɗi saɗaka ni, ka lapəli ar nyarmbwar ləkwa bəbalər Tent ni, ka səwayeri. Maɗa' Gershon an ata wul shanga kəthlərayeri na ku tsəkwar suayeri apani.

²⁷Akwa nyarmbwar Kohath mdə ku wutə kutakəyayeri ar Amram, ka Izhar, ka Hebron, ka Uzziyel. Da an mjir kutakəyir Kohath.

²⁸Antə hangkur shanga mji shili baɗitə ka ɓzər sal na ka thliyari pal har ka ləmta, an mji dəpu ncisu ka aru makər. Antə da an ata wul lapiyakur Vəi na Ɓɗakkarkara ni.

²⁹Antə mjir kutakəyir nyarmbwar Kohath ata pwi tentayeri arɗa təbwar anəm ka Tentər vəngkər səli ni.

³⁰Tsuwa Elizafan na ɓzər Uzziyel an olər mjir nyarmbwar Kohath ni.

³¹Kəthlər ar maɗa' Kohath an ka da wul Akwati ni, ka tebər, ka zwalər kəsi pitəlayeri, ka bagaɗiyayeri, ka kari natə pristayeri ana kəthlər kəgari akwa Vəi na Ɓɗakkarkara, ka lapəli, ka shanga kəthlər na ku tsəkwar su nayeri ni.

³²Tsuwa mdə na olər shanga mji na ol'olər nyarmbwar mjir Lawi ni an Eleyazar na ɓzər Haruna na prist. Tsuwa tsa an ata wul shanga mji na akwa kəthlər akwa Vəi na Ɓɗakkarkara ni.

³³Akwa nca mjir nyarmbwar Merari mdə ku wutə kutakəyayeri ar Mahli ka Mushi. Da an kutakəyayeri ar mjir nyarmbwar Merari.

³⁴Antə hangkur mji shili arɗa baɗitə ka ɓzər sal na ka thliyari pal har ka ləmta an mji dəpu ngkwa ka aru suɗa.

³⁵Antə mjir nyarmbwar Merari ni ata pwi tentayeri arɗa təbwar yala ka Tentər vəngkər səli ni. Tsuwa Zuriyel na ɓzər Abihayil an olər shanga mjir nyarmbwar Merari.

³⁶Antə kəthlər tə mdə vu akwa tsiya maɗa' Merari an ka da wul udzəmayeri ar Tent ni, ka udzəmayeri ar kadləngkər, ka zhimbwalayeri, ka sur kəsi səla ɗa, ka mambila kari kəthlərayeri. Da an ka kəthlər ar wul shanga kəthlərayeri na ku tsəkwar su nayeri ni.

³⁷Tsuwa da an ata wul shanga zhimbwalayeri tə mdə kalaktə bəbalər Tent ni kəgari, ka sur kəsi səla ɗa, ka makukwayerari, ka suwayerari.

³⁸Antə Musa, ka Haruna ka maɗashilərni, da ata pwi tentayeri arɗa abwakəma Tentər vəngkər səli ni, təbwar raghəi ka Tent ni, təbwar səɓəlar pci. Da an ata kəthlər akwa Vəi na Ɓɗakkarkara, ka kəthlərayeri tə mda ata harari aka mjir Israila. Kəlara mdə damwa zum na ku hadzə tsiyari aka kəthlər ngəni, mda ata tsi ni.

³⁹Antə Musa ka Haruna ku jikatə shanga mjir Lawi apatə MTHLAKU ku tsawa ala ɗa. Antə hangkur shanga mjir Lawi apatə mdə jikatə ɗa ata nyarmbwa ata nyarmbwa, baɗitə ka ɓzər sal na ka thliyari pal har ka ləmta, an mji dəpu sərkumari ka suɗa.

⁴⁰Antə MTHLAKU pəla aka Musa, “Ka gə jikatə shanga maɗashilər mjir Israila na yarakəma, baɗitə ka ɓzər sal na ka thliyari pal har ka ləmta, ka gə rəbutə thləma ɗa.

⁴¹Ga ata dlu mjir Lawi ka gə hamta ɗa ali I na MTHLAKU, ka da ndzi arna ata vəya yarakəma mjir Israila. Tsuwa ga ata dlu yarakəmayeri ar mwaɓiyir mjir Lawi ata vəya shanga yarakəmar mwaɓiyir mjir Israila.”

⁴²Antə Musa ku jikatə shanga maɗashili na yarakəma ar mjir Israila kalkal apatə MTHLAKU ku tsawa alari.

⁴³Hangkur shanga maɗashili na yarakəma, apatə mdə ku rəbutə thləma ɗa, baɗitə ka ɓzər sal na ka thliyari pal har ka ləmta, an mji dəpu sərkumari ka suɗa, ka aru suɗa ka murfəkumari ka makər.

⁴⁴Antə MTHLAKU jaktə pəla aka Musa abbər,

⁴⁵“Ka gə dlu mjir Lawi ata vəya shanga maɗashili na yarakəma ar mjir Israila. Tsuwa ka gə dlu yarakəmar mwaɓiyir mjir Lawi ata vəya yarakəmar mwaɓiyir mjir Israila. Antə mjir Lawi ata ndzi arna. I an MTHLAKU.

⁴⁶Tsuwa təng tə yarakəmayeri na ar mjir Israila ku təramta na ar mjir Lawi ka aru suɗa ka murfəkumari ka makər, ata ndzi dwali ka gə pəli ngəni mbiləmta ni.

⁴⁷Antə kara dlu liyar adzərfa ntəfu ata kəra kəlara pal akwa nca ɗa, ata sur ngkər su tə mda ana kəthlər kəgari akwa Vəi na Ɓɗakkarkara ni, watau adzərfa natə kəgəɓkurari gram ntəfkumari ka ntəfu.

⁴⁸Ka gə hamta kwaba pəli mji na mbiləmta ata kəra yarakəmar mjir Israila ni aka Haruna ka maɗashilər ni.”

⁴⁹Antə Musa ku dlu kwabar pəli maɗashili na yarakəma ar mjir Israila na mbiləmta hang ata kəra mji tə mjir Lawi pəli ni.

⁵⁰Hangkur kwaba tə Musa dlu akəla maɗashili na yarakəmar mjir Israila na mbiləmta ata mnya mji tə mjir Lawi pəli ni an liyar adzərfa dəpu pal ka aru makər ka ngkwakumari ka ntəfu, ata sur ngkər su tə mda ana kəthlər kəgari akwa Vəi na Ɓɗakkarkara ni.

⁵¹Antə Musa ku hamta kwabar pəli maɗashili na yarakəmar mjir Israila ni aka Haruna ka maɗa'ni, kalkal apatə MTHLAKU ku tsawa aka Musa.