Read bura-pabir Jikayeri 30 Bible Online

Jikayeri 30 - bura-pabir bible

Jikayeri 30

¹Antə Musa pəla aka mji ol'ola ar nyarmbwayeri na akwa Israila abbər MTHLAKU ku hamta tsawayeri ngəni.

²“Ma mdə ku kətə alkawal aka MTHLAKU, wala ma tsa ku kahyel, wala mbwahə kərni akwa alkawal laga, abbər tsa ata hara su laga, to tsa aɗiya sharəmta su tə tsa pəla ni wa. Ku ndzi dwali ka tsa nghyaɓəla su tə mnyari pəla ni.”

³“Ma mdə mwala ku kətə alkawal, wala vu kərni akwa alkawal abbər tsa ata hara su laga aka MTHLAKU, sakatə tsa tsu ɓzərngkwa aviyar baba'ni,

⁴tsa ata nghyaɓəla shanga alkawalayeri tə tsa ku vu kərni akwa. Ma baba'ni ku nggatə kahyel ka alkawal tə tsa hara ni, amma tsa aɗi ndər ata kər wa, to alkawalərni tə tsa kətə ni ku ndzəndzi dam.

⁵Amma ma baba'ni ku nggata, ka nggəlar ta dlu alari tsu ata sakari, to alkawalərni ni aɗi ndzəndzi wa. Antə MTHLAKU ata yafitə ni təng tə baba'ni aɗi kələngkər wa.”

⁶“Tsuwa ma ɓzərngkwa laga ku kəl sal akwa sakatə alkawalərni aka MTHLAKU tsu ata kərari, wala alkawal laga tə tsa huvə vu kərni kula dzama,

⁷tsa ata nghyaɓəla alkawalərni wala su tə tsa vu kərni akwa ni. Ma salngkiɗa ku nggatə su ata kəra alkawal tə mwala ni hara ni, tsuwa tsa aɗi ndər ata kər tsu vir tə tsa nggatə ni wa, to alkawalərni ni ku ndzəndzi dam.

⁸Amma ma salngkiɗa ku nggata, ka nggəlar ta dlu alari tsu ata sakari, to, sal ni ata sharəmta alkawal ni wala su tə mwala ni vu kərni akwa ni. Antə MTHLAKU ata yafitə mwala ni.”

⁹“Amma kəlara alkawal natə mwala kughung wala mwala na ku ndəka ka sal ku kəta, alkawal ni ku ndzəndzi dam. Antə dwali ka tsa nghyaɓəla alkawal na ata kərari ni.”

¹⁰“Ma mwala na akwa mbwarni ku kətə alkawal, har ka kahyel abbər tsa ata hara su laga,

¹¹tsa ata nghyaɓəla su tə tsa vu kərni akwa ni. Ma salngkiɗa ku nggatə su ata kər, amma tsa aɗi ndər ata kər wa, wala ncanta abbər su ni aɗi kəskərari wa wa, to, alkawal ni ku ndzəndzi dam.

¹²Amma ma salngkiɗa ku nggəlar ndər ni tsu vir tə tsa nggatə ni, to, shanga alkawal tə mwala ni pəla ka mnyari ni aɗi ndzəndzi wa. Antə MTHLAKU ata yafitə ni kamnyar salngkiɗa ku sharəmta alkawal ni.

¹³Salngkiɗa ka duna natə tsa ata mzhi kələngkər wala sharəmta kəlara alkawal tə tsa hara, wala kəlara alkawal tə tsa vu kərni.

¹⁴Amma ma salngkiɗa aɗi ndər ata kəra alkawalərni ni akwa ndzəndziyir ɗa wa, to, ata ndzi abbər salngkiɗa ku kələngkər aka alkawalayeri tə mwalankiɗa hara ni, təng tə tsa ku nggata amma tsa aɗi ndər ata kər wa.

¹⁵Amma apatə tsa ku nggatə ni, antə tsa səka har vir damwa kambəla tsa sharəmta alkawal ni, to watsəɓər bikari ata ndzi ata wulya sal ni.”

¹⁶Nayeri ni an tsawayeri natə MTHLAKU ku hamta aka Musa akwa daɓwa sal ka mwalankiɗa, ka akwa daɓwa ngkwa ni ka baba'ni, sakatə tsa tsu ɓzərngkwa akwa kutakəyir baba'ni.