Read bura-pabir Jikayeri 31 Bible Online

Jikayeri 31 - bura-pabir bible

Jikayeri 31

²“Ka gə ntəmta aka mjir Israila ɗimikur tə mjir Midiyan hara ala ɗa ni. Aghəla tə ga ku kuri, antə ga ata mta, ka ra wutə kəkayeri ar nga.”

³Antə Musa ku pəla aka mji ni abbər, “Carɓəla gir mji laga akwa nca giri ka giri ɗəmhə ɗa kamnyar mpa, ka da ra pwa ata kəra mjir Midiyan ka mpa, apatə MTHLAKU akwa bara ntə ɗimikur ata kəra mjir Midiyan.

⁴Ka giri carɓəla mji dəpu pal akwa kəlara nyarmbwa na akwa Israila, ka giri thlentə ɗa akwa mpa ni.”

⁵Antə mdə ku carɓəla mji dəpu kumnya suɗa akwa nca mjir Israila na dlama dlama ni, watau mji dəpu pal akwa kəlara nyarmbwa.

⁶Antə Musa ku thlentə ɗa akwa mpa, ata kəma duku ka Finehas na ɓzər Eleyazar na prist na ata pwar ɗa akwa mpa ni. Antə da fatə kariyayeri na akwa Vəi na Ɓɗakkarkara, kəga təmbəlayeri ar kəga mji ka da səɓəla akwa mpa.

⁷Antə mjir Israila ni ku mwari ka dlərəmta mjir Midiyan ni akwa mpa, apatə MTHLAKU ku tsawa aka Musa, ka tsəgəi shanga mji shilər Midiyan,

⁸ka tsəgəi kuthlyayeri ntəfu na akwa Midiyan. Thləma kuthlyayeri ni an Evi, ka Rekem, ka Zur, ka Hur, ka Reba. Tsuwa mdə ku tsi Balaam na ɓzər Beyor ka katsakar.

⁹Antə mjir Israila ku ngkəgəi mwanki kəga maɗankyar ar mjir Midiyan, ka famnya thlar ɗa, ka təmar ɗa, ka shanga gənar ɗa,

¹⁰ka mbamta shanga kauyayeri ar mjir Midiyan kəga vəyayeri tə da fəli akwa.

¹¹Da fatə shanga mji, kəga mwaɓi, ka shanga suayeri tə da dlutsa akwa mpa ni.

¹²Antə da səntə mji tə da ngkəgəi akwa mpa ni, ka shanga suayeri tə da fata akwa mpa ni aka Musa ka Eleyazar na prist, ka mjir Israila na tsaptədzi akwa vəi fəliyir ɗa na akwa dərakər Mowab, ata mnya Thlyagha Jodan awul Yariko ni.

¹³Antə Musa, ka Eleyazar na prist, ka mji na ol'ola ata kəra mjir Israila, ku səɓəla kazhar vəi fəliyir ɗa kamnyar thlakəma mji na mwari akwa mpa ni.

¹⁴Amma ɗəffa Musa ku ɓzi ka duna adzə mji na ol'olər sojayeri ni, mji na pwar mji dəpu dəpu, ka mji na pwar mji aru aru, na ngka akwa mpa ni.

¹⁵Antə Musa yu ɗa abbər, “Kamnyar mi tə giri zhar shanga mwankir Mjir Midiyan ka mpikə ri?

¹⁶Giri asənda abbər mwanki nayeri ni an nu sauriyir Balaam, ka vu mjir Israila tə da səm mdəkur MTHLAKU akwa su na hara ahar Peyor ni, har tə shilku na mwavər ku pwa ata kəra mjir MTHLAKU ni.

¹⁷Antə kulini, ka giri tsəgəi shanga maɗashili ka kəlara mwala na ku ɗar səndə sal.

¹⁸Amma shanga maɗankwi na aɗi ɗar səndə sal wa, ka giri zhar ɗa ka mpika aka kəra giri.

¹⁹Kəlara mda akwa nca giri na ku tsi mda, wala tsəkwar mshi, tsa ata ndzi tsu aɓəla ata hildi mnyar vir murfa. Akwa vir na makərkur ka na murfəkur antə giri ata kəcimta kər giri kəga mafayeri tə giri ngkəgəi ni.

²⁰Giri ata kəcimta kəlara ləptu, ka kəlara su tə mdə nam ka kəsəm, ka kəlara su tə mdə nam ka shishir kwi, ka kəlara su tə mdə nam ka udzəm.”

²¹Aghəla nda antə Eleyazar na prist pəla aka sojayeri na mwari akwa mpa ni abbər, “Nayeri ni an tsawayeri natə MTHLAKU ku tsawa aka Musa.

²²Tar su apa dinar, ka adzərfa, ka əmza, ka liya mənggəl, ka kuza, ka dalma,

²³ka kəlara su tə u'u amzhi mbamtari wa, antə giri ata pu ɗa akwa u'u ka giri thləlɓəla ɗa, antə da ata ndzi kəcəkəcari. Amma wala apani tar ka mdə jaktə kəcimta ɗa akwa yimər kəca. Tsuwa kəlara su na anggitə u'u wa, ka mdə kəcimta ni akwa yimi daci.

²⁴Akwa vir na murfəkur, ka giri kəcimta ləptayeri ar giri, antə giri ata ndzi kəcəkəcari. Aghəla nda antə giri ata ngka akwa vəi fəliyir giri.”

²⁵Antə MTHLAKU pəla aka Musa,

²⁶“Ga, ka Eleyazar na prist, kəga mji na ol'ola akwa nyarmbwayeri ar mji ni, ka giri jikatə suayeri natə mdə dlutsa akwa mpa, kəga mji kəga mwaɓiyayeri shang.

²⁷Ka giri ndəkəi suayeri tə mdə fata akwa mpa ni ka bwa suɗa. Ka giri hamta bwa na pal aka sojayeri na mwari akwa mpa ni, ka hamta bwa na dukwari aka mambila mji.

²⁸Tsuwa akwa nca kariyayeri tə sojayeri dlutsa akwa mpa ni, ka gə kəɓəla bwa laga ka gə vəi aka MTHLAKU, ka tsa ndzi apa tsəma tə sojayeri ni hamta. Ga ata kəɓəla pal akwa nca kəlara pərsənayeri aru ntəfu, ka gə hara tsu apani aka thlayeri, ka kwarayeri, ka təmayeri, ka kwiyayeri.

²⁹Ka gə kətə retar su tə mdə tsaptə ni ka gə hamta aka Eleyazar na prist, ka tsa ndzi sur hamta na ola aka MTHLAKU.

³⁰Akwa kuta kari tə mdə dlutsa akwa mpa ni na ku ndzi kamnyar shanga mji, ka mdə kəɓəla su pal akwa kuta kəlara ntəfkumari, wala an mji, wala an thla, wala an kwara, wala an təma, wala an kwi, ka mdə hamta aka mjir Lawi na ata kəra Tentər vəngkər səli aka MTHLAKU ni.”

³¹Antə Musa ka Eleyazar na prist ku hara kalkal apatə MTHLAKU ku tsawa aka Musa.

³²Nggədza hangkur suayeri tə sojayeri dlutsa akwa mpa ni, təma dəpu aru ngkwa ka murfəkumari ka ntəfu,

³³ka thla dəpu murfəkumari ka suɗa,

³⁴ka kwara dəpu ngkwakumari ka ntang,

³⁵ka mwanki na aɗi ɗar səndə sal atar pi ka tsa wa, dəpu makkumari ka suɗa.

³⁶Tsuwa hangkur retar təmayeri tə mdə na aka sojayeri na mwari akwa mpa ni an dəpu aru makər ka makkumari ka murfa ka aru ntəfu.

³⁷Akwa kuta ngəni antə mdə fwaɓəla təma aru ngkwa ka murfəkumari ka ntəfu ka pwi aka MTHLAKU,

³⁸ka thla dəpu makkumari ka ngkwa natə mdə fwaɓəla murfəkumari ka suɗa aka MTHLAKU,

³⁹ka kwara dəpu makkumari ka aru ntəfu natə mdə fwaɓəla ngkwakumari ka ntang aka MTHLAKU,

⁴⁰ka maɗankwi dəpu kumnya ngkwa natə mdə fwaɓəla maɗankwi makkumari ka suɗa aka MTHLAKU.

⁴¹Antə Musa ku hamta aka Eleyazar na prist bwa na ar MTHLAKU ni tsu apatə MTHLAKU ku tsawa.

⁴²Bwa natə Musa fwaɓəla ka pwi aka mjir Israila ni, watau natə mdə fwaɓəla akwa bwar sojayeri na mwari akwa mpa ni

⁴³an təma dəpu aru makər ka makkumari ka murfa ka aru ntəfu,

⁴⁴ka thla dəpu makkumari ka ngkwa,

⁴⁵ka kwara dəpu makkumari ka aru ntəfu,

⁴⁶ka maɗankwi dəpu kumnya ngkwa.

⁴⁷Akwa kuta kari tə mdə dlutsa akwa mpa ka na aka mjir Israila ni, Musa ku kəɓəla pal akwa kuta kəlara su ntəfkumari, ka hamta aka mjir Lawi natə da an akwa wul Tentər vəngkər səli aka MTHLAKU ni. Apani antə tsa ku kəɓəla ɓzərngkwa pal akwa kuta kəlara maɗankwi ntəfkumari, ka mwaɓi pal akwa kuta kəlara mwaɓi ntəfkumari, ka hamta aka mjir Lawi, tsu apatə MTHLAKU ku tsawa aka Musa.

⁴⁸Antə mji na ol'ola ar sojayeri, watau sojayeri na ol'ola ata kəra mji dəpu dəpu, ka mji aru aru ku si adzə Musa,

⁴⁹ka pəla alari abbər, “Zanuwa, yeru na buɗayeri ar nga ku jikatə shanga sojayeri na mwari akira yeru akwa mpa ni, ka wuta abbər mda aɗi wala duku na ku sha wa.

⁵⁰Antə nggədza kulini yeru ku səntə sur hamtar yeru aka MTHLAKU, akwa nca suayeri tə waskəi ku wuta, watau suayeri tə mdə nam ka dinar, su apa ausar shahu, ka surtsi, ka lenduwar seɗa, ka sur thləm, ka gənar wulya, kamnyar pəli mpika yeru.”

⁵¹Antə Musa ka Eleyazar na prist ku dlu dinar ni, shanga ɗa an kari dəɓa tə mdə nam ka dinar.

⁵²Antə kəgəɓkur shanga dinar natə sojayeri na ol'ola ata kəra mji dəpu dəpu, ka na aru aru hamta aka MTHLAKU, an shekel dəpu kumnya ngkwa ka aru murfa ka ntəfkumari.

⁵³Antə kəlara soja ku fatə bwarni akwa suayeri tə da dlutsa akwa mpa ni.

⁵⁴Antə Musa ka Eleyazar na prist ku dlu dinar na akəla sojayeri na ol'ola ata kəra mji dəpu dəpu ka aru aru ni, ka mwanta akwa Tentər Kəɓa, kamnyar ka da ndzi sur ɗangtə aka MTHLAKU abbər mjir Israila ni arni.