Read bura-pabir Jikayeri 32 Bible Online

Jikayeri 32 - bura-pabir bible

Jikayeri 32

¹Mji na akwa nyarmbwar Ruben ka Gad an mji na ka mwaɓiyayeri dlama dlama. Antə da wuta abbər Yazer ka Gileyad an tsəɗiyayeri na ɓɗakɓɗaku kamnyar ɓəla mwaɓi.

²Antə da thlatə ka mwari adzə Musa ka Eleyazar na prist, ka mji ol'ola na akwa pwar mji ni, ka pəla,

³“Ataroth, ka Dibon, ka Yazer, ka Nimra, ka Heshbon, ka Eleyale, ka Sebam, ka Nebo, ka Beyon,

⁴watau tsəɗi natə MTHLAKU dlərəmta mjir ɗa akəma mjir Israila, an tsəɗi na ɓɗaku kamnyar ɓəla mwaɓi. Tsuwa yeru ka mwaɓiyayeri hang.

⁵Antə ma yeru an ata wutə mdəkur ata nca ga, ka gə dlar yeru ka tsəɗi ngəni ka tsa ndzi ar yeru. Usa ga aɗiya mwantə yeru aɓəla bwanda Thlyagha Jodan wa.”

⁶Antə Musa shinau aka mjir Ruben ka mjir Gad ni, ka pəla, “Watau giri akwa bara ka maɗama' giri ləkwa mpa, amma ar giri ka giri ndzəndzi azi ko?

⁷Kamnyar mi tə giri akwa hara shishiɓa aka mjir Israila ta da amwari aɓəla bwanda akwa tsəɗi tə MTHLAKU hamta ala ɗa nə ri?

⁸Tsu apani antə kəkayeri ar giri na akwa Kadesh Barneya hara sakatə I thlentə ɗa ka da ra wulɓəla tsəɗi ni.

⁹Kamnyar sakatə da mwari akwa Mular Eshkol ka wutə laku tə tsəɗi ni akwa, təng da nthləmta hyala mjir Israila ta da amwari akwa tsəɗi tə MTHLAKU hamta ala ɗa ni.

¹⁰Antə ɗəffa MTHLAKU ku ɓzi ka duna vir nda har tə tsa kətə alkawal abbər,

¹¹‘Jiri, mda aɗi akwa nca mji na səɓəla ahar Masar ni, na ku hara məva sərkumari har ka ləmta, na ata wutə tsəɗi natə I kətə alkawalər hamtari aka Ibrahim, ka Ishaku, ka Yakub ni wa, kamnyar da aɗi nu ra ka ɗəffa ɗa duku wa.

¹²Mda aɗi na ata mwari akwa tsəɗi ni wa tar Kaleb na ɓzər Yefunne na mdər Kenizzi, ka Joshuwa na ɓzər Nun, kamnyar təng da shiɗa an nu ra ka ɗəffu duku.’

¹³Apani antə ɗəffə bwarbwarkur ar MTHLAKU ku thlata ata kəra mjir Israila, antə tsa hara tə da kadla ka kadla akwa mtaku mnyar məva nfwarkumari, har tar sakatə zaman na hara ɗimikur ata nca MTHLAKU ni ku kuri karkar.

¹⁴Antə nggədza giri na mjir hara biku kəga da ni, giri ku thlatə ka halər kəkayeri ar giri akwa bara vərantə bwarbwarkur ɗəffa MTHLAKU ata kəra mjir Israila!

¹⁵Ma giri ku nggəlar ta nu ni, tsa ata jaktə zhar mji ni tsu akwa mtaku. Antə giri an ata ndəkərəngkər asar ata kəra ɗa ni shang.”

¹⁶Aghəla nda antə da si adzə Musa ka pəla alari, “Dlar yeru bu ka yeru həntə vəi pwi mwaɓiyir yeru, ka nthləi kauyayeri kamnyar mwankir yeru kəga maɗa' yeru.

¹⁷Mwankir yeru kəga maɗa' yeru ata ndzi akwa kauyayeri na ka katangga kamnyar ta mjir tsəɗi ni awutə ɗa ka damitə ɗa. Amma ar yeru, yeru ata fatə kari mpa ka yeru pwar mambila mjir Israila ni akwa mpa, har tar ma yeru ku mwantə ɗa akwa vəi tə da ata ndzəndzi akwa.

¹⁸Yeru aɗi ata ngka akwa kəyayeri ar yeru wa tar ma yeru ku wuta abbər shanga mjir Israila ku wutə bwayeri na ata ndzi kifər ɗa akwa tsəɗi ni.

¹⁹Kamnyar yeru aɗi ata paktədzi ata kəra kifa kəga mji na aɓəla bwanda ni wa, təng tə yeru ku kurtə wutə bwar yeru abwani təbwar raghəi ka Thlyagha Jodan ni.”

²⁰Antə Musa shinau ala ɗa abbər, “Jiri, ma abbər giri an ata hara su tə giri pəla akəma MTHLAKU ni, tə giri ata fatə kari mpa ka təra ləkwa mpa ni,

²¹tə ma shanga sojayeri ar giri ata ləɓəla bwanda Thlyagha Jodan apatə giri pəla akəma MTHLAKU, har tar ma MTHLAKU ku kədləmta dawayeri arni kazhar kəmari,

²²har ka vədza aka sakatə tsəɗi ni ata ngka akira MTHLAKU, to giri ata ngka akwa vəi ndzəndziyir giri. Apani antə giri ata msəra akwa kələr alkawal tə giri kəta akəma MTHLAKU ka mjir Israila ni. Antə ma giri ku hara apani, giri ata ndzi mthlakər tsəɗi ngəni tə MTHLAKU hamta ala giri ni.

²³Amma ma giri aɗi hara apani wa, giri ku hara biku aka MTHLAKU. Antə kula nuhum watsəɓər bikər giri ata ngkəi giri!

²⁴To, mwari giri ka giri latə bərniyayeri aka mwankir giri kəga maɗankyarər giri, ka giri latə vəi pwi mwaɓiyir giri, amma ka giri mbərsata abbər giri ku hara su tə giri kətə alkawalari.”

²⁵Antə mjir Gad ka mjir Ruben pəla aka Musa abbər, “Zanuwa, yeru ata harari kalkal apatə ga ku pəla.

²⁶Maɗankyarər yeru, kəga mwankir yeru, kəga təmar yeru, kəga thlar yeru, ata ndzi tsu azi akwa kauyayeri na akwa tsəɗi Gileyad.

²⁷Amma kəlara mdə na soja akwa nca yeru, tsa ata ləɓəla bwanda Thlyagha Jodan, ka tsa mpa kamnyar MTHLAKU, tsu apatə gə pəla.”

²⁸Antə Musa ku hamta tsawayeri ngəni aka Eleyazar na prist ka Joshuwa na ɓzər Nun ka mji ol'olər kutakəyayeri na akwa nyarmbwayeri ar mjir Israila.

²⁹Musa pəla ala ɗa, “Ma kəlara sojar mjir Gad ka mjir Ruben ata ləɓəla abwanda Jodan, ata kəma duku kəga giri ka mpa kamnyar MTHLAKU, har tar ma tsəɗi ni ku ngka akwa tsiya giri, to ka giri hamta ala ɗa tsəɗi na təbwar Gileyad ka tsa ndzi arɗa ka kəra ɗa.

³⁰Amma ma da aɗi ləɓəla bwanda ata kəma duku ka giri ka ləkwa mpa wa, ka giri na ɗa bwar kifər ɗa ata kəma duku kəga giri akwa tsəɗi Kanana.”

³¹Antə mjir Gad ka mjir Ruben shinau ka pəla, “Zanuwa yeru ata harari tsu apatə MTHLAKU ku tsawa.

³²Yeru ata ləɓəla bwanda ɗəmhəɗəmhari kamnyar mpa kamnyar MTHLAKU akwa tsəɗi Kanana, amma yeru ata dlu bwar kifər yeru tsu azi ata mnya Thlyagha Jodan ni təbwar raghəi.”

³³Antə Musa hamta aka mjir Gad ka mjir Ruben ka retar mjir Manasse na ɓzər Yusuf, tsəɗi Kuthli Sihon na kuthlir mjir Amor, ka tsəɗi Kuthli Og na kuthlir Bashan, kəga kauyayeri arɗa ka bwayeri na akira da.

³⁴Antə mjir Gad ku jaktə latə Dibon, ka Ataroth, ka Arower,

³⁵ka Atroth Shofan, ka Yazer, ka Yogbeha,

³⁶ka Beth Nimra, ka Beth Haran, ka da ndzi bərniyayeri na akwa katangga. Tsuwa da ku latə vəyayeri ar pwi mwaɓiyir ɗa.

³⁷Antə mjir Ruben ku jaktə latə Heshbon, ka Eleyale, ka Kiriyathlayim,

³⁸ka Nebo, ka Baal Meyon, ka Sibma. Tsuwa da pali thləma kauyayeri tə da səm akwa mpa ni ka jaktə hənɓəla ɗa.

³⁹Antə mjir nyarmbwar Makir na ɓzər Manasse ku təra mwari ahar Gileyad, ka səm ɗa akwa mpa, ka kədləmta mjir Amor na akwa tsəɗi nda.

⁴⁰Antə Musa ku hamta aka mjir nyarmbwar Makir na ɓzər Manasse Gileyad, antə da ndzəndzi akwa.

⁴¹Antə mjir Yayir na akwa nyarmbwar Manasse ku mwari akwa dləra ka səm kauyayeri akwa tsəɗi Gileyad, ka pali ala ɗa thləm, antə mda ana kəga ɗa “Diyayeri ar Yayir.”

⁴²Antə mdə laga ka thləmari Noba ku təra mwari ahar Kenath, ka dlərəmta Kenath ni ka kauyayeri na kalaktə ni, ka səməmnya ɗa, ka pali alari thləm, antə mda ana kəga ni “Noba” tsu akwa thləmari surni.