Read bura-pabir Jikayeri 34 Bible Online

Jikayeri 34 - bura-pabir bible

Jikayeri 34

¹Antə MTHLAKU pəla aka Musa abbər

²ka Musa hamta tsawayeri ngəni aka mjir Israila, “Nggədza laku tə kəla tsəɗiyir giri ata sə ndzi akwa ma sakatə giri ku ləkwa tsəɗi Kanana, tsəɗi na ata ndzi ar giri swakti. Kəla tsəɗiyir giri ata ndzi apani.

³Təbwar anəm kəla tsəɗiyir giri ata thlata abwar Mtakər Zin, ka təra ka kəla Edom. Kəl ni ata baɗitə təbwar raghəi ata datər mnya Manda Una təbwar anəm.

⁴Kəl ni ata shinardzi ka təramta təbwar anəm atar lakur ndləɓəla ahar Akrabbim, ka ra tsaɓəla ahar Zin. Kəla tsəɗi ni təbwar anəm an Kadesh Barneya, ka tsa mwar ka Hazar Addar, ka təramta ka mwari ahar Azmon.

⁵Ma kəla tsəɗi ni thlata akwa Azmon tsuwa, tsa ata shinardzi ka mwari akwa mular na ata kəla Masar, ka ra tsikərari akwa Manda Meditereniya.

⁶“Manda Meditereniya an ata ndzi kəla giri təbwar ramta. Tsa an ata ndzi kəla giri atəbwar ramta.

⁷“Kəla giri na təbwar yala ata baɗita ata Manda Meditereniya ka təra tur ka mwanta adzə Gar Hor.

⁸Tsuwa baɗita adzə Gar Hor kəl ni ata mwa ka mwari akwa vəi pəra ka ləkwa tsəɗi Hamath. Tsa ata təra ka kəla Zedad,

⁹ka təra har ka mwari akwa Zifron, ka ra tsikərari adzə Hazar Enan. Ngəni an kəla giri na təbwar yala.

¹⁰“Kəla giri na təbwar raghəi tsuwa ata baɗita adzə Hazar Enan har ka ləmta adzə Shefam.

¹¹Kəl ni ata thlata adzə Shefam ka ləghəi adzə Ribla təbwar raghəi ka Ayin, har ka ləghəi ata mnya Manda Galili təbwar raghəi.

¹²Ma kəl ni thlata anda tsuwa tsa ata ləghəi adzə Thlyagha Jodan, ka ra tsikərari adzə Manda Una. Ngəni ata ndzi tsəɗiyir giri ka kəlari na kalaktə ni.”

¹³Antə Musa tsawa aka mjir Israila abbər, “Ngəni an tsəɗi tə giri ata ndəkəuwari ka tsa ndzi ar giri atar ndzəh kuriya, kamnyar ngəni an tsəɗi tə MTHLAKU ku tsawa abbər ka mdə hamta aka nyarmbwayeri na əmdla ka retar nyarmbwar Manasse.

¹⁴Kamnyar tə nyarmbwar Ruben, ka nyarmbwar Gad, ka retar nyarmbwar Manasse ku kurtə dlu bwar kifər ɗa atar nyarmbwar kəkayeri arɗa.

¹⁵Nyarmbwayeri ngəni suɗa ka retar nyarmbwar Manasse ni, ku kurtə ka dlu bwar ɗa aɓəla bwanda Thlyagha Jodan, atəbwar raghəi ka Yariko, təbwar səɓəlar pci.”

¹⁶Antə MTHLAKU pəla aka Musa abbər,

¹⁷“Nayeri ni an thləma mji na ata dlara akwa ndəkɓəla tsəɗi ni ala giri. Da an Eleyazar na prist, ka Joshuwa na ɓzər Nun.

¹⁸Tsuwa ga ata kətə mdə pal akwa kəlara nyarmbwa ka da dlar nga akwa ndəkɓəla tsəɗi ni.

¹⁹Nggədza thləma mji tə ga ata kəɓəlari akwa nyarmbwayeri ni. Akwa nyarmbwar Yahuda, Kaleb na ɓzər Yefunne.

²⁰Akwa nyarmbwar Simeyon, Shemuwel na ɓzər Ammihud.

²¹Akwa nyarmbwar Benjamin, Elidad na ɓzər Kislon.

²²Akwa nyarmbwar Dan, Bukki na ɓzər Yogli.

²³Akwa nyarmbwar Manasse na ɓzər Yusuf, Hanniyel na ɓzər Efod.

²⁴Akwa nyarmbwar Ifrayim, Kemuwel na ɓzər Shiftan.

²⁵Akwa nyarmbwar Zebulun, Elizafan na ɓzər Parnak.

²⁶Akwa nyarmbwar Issakar, Paltiyel na ɓzər Azzan.

²⁷Akwa nyarmbwar Asher, Ahihud na ɓzər Shelomi.

²⁸Akwa nyarmbwar Naftali, Pedahel na ɓzər Ammihud.”

²⁹Nayeri ni an mji tə MTHLAKU ku tsawa ala ɗa abbər ka da ndəkɓəla kifər tsəɗi Kanana aka mjir Israila.