Read bura-pabir Jikayeri 35 Bible Online

Jikayeri 35 - bura-pabir bible

Jikayeri 35

¹Təng sakatə mjir Israila tsu akwa bəbalər Mowab na aɓəla bwanda Thlyagha Jodan, na akwa wuldzi ka Yariko, antə MTHLAKU pəla aka Musa,

²“Pəla aka mjir Israila abbər ka da hamta kauyayeri laga aka mjir Lawi na ata ndzi arɗa ka da ndzəndzi akwa. Tsuwa ka da hamta ala ɗa vəyayeri na kalaktə kauyayeri ni ka da ndzi vəi ɓəla mwaɓiyayeri arɗa.

³Apani da ata wutə kauyayeri ar kəra ɗa tə ka da ndzəndzi akwa, ka vəyayeri tə da ata ɓəla thlar ɗa ka shanga mambila mwaɓiyayeri arɗa.

⁴Baukur vəi ɓəla na kalaktə kauyayeri tə mda ata na aka mjir Lawi ni, ata baɗita ata katanggar di ni, har ka mwari ciju apa dzarsəl dəpu pal ka aru ntəfu ka kalaktə di ni shang.

⁵Abwahila di ni ka mdə ngkərtə dzarsəl dəpu makər təbwar raghəi, ka dzarsəl dəpu makər təbwar anəm, ka dzarsəl dəpu makər təbwar ramta, ka dzarsəl dəpu makər təbwar yala, ka bərni ni ndzi ata ɗəffu. Nayeri ni shang ata ndzi vəi ɓəla mwaɓiyir mjir kuta di, antə di ni ata ndzi ata ɗəffu.”

⁶“Akwa kauyayeri tə mda ata hamta aka mjir Lawi ni, na ngkwari ata ndzi vəi hwi ra ɗuwardzi, natə kəlara mdə na ku tsi mda tsa ata mzhi hwi ka ra ɗuwardzi akwa. Ata kəra ngəni ka mdə jaktə hamta ala ɗa kauyayeri damwa nfwarkumari ka suɗa.

⁷Apani shanga kauyayeri tə mda ata na aka mjir Lawi ata ndzi kauyayeri nfwarkumari ka ncisu, ata kəma duku kəga vəyayeri ar ɓəla mwaɓiyir ɗa.

⁸Mjir Israila ata hamta kauyayeri ni aka mjir Lawi ni ata kəra hangkur mtaku tə kəlara nyarmbwa Israila wuta. Nyarmbwayeri na ol'ola ata hamta kauyayeri hang aka mjir Lawi, antə nyarmbwayeri na raka raka ata hamta kauyayeri raka.”

⁹Antə MTHLAKU pəla aka Musa

¹⁰ka tsa pəla aka mjir Israila abbər, “Ma sakatə giri ku fəlɓəla Thlyagha Jodan ata mwari akwa tsəɗi Kanana,

¹¹ka giri carɓəla aka kəra giri kauyayeri ar ɗuwardzi, natə mdə na ku kar ka tsi mda, tsa ata mzhi hwi ka mwari anda.

¹²Antə kauyayeri ata ndzi ala giri vəi ɗuwardzi akəla mdər bara ntə ɗimikur. Apani antə mda aɗi ata tsi mdə na ku tsi mda akəmata mda ahara alari shariya akəma mji wa.

¹³Giri ata carɓəla kauyayeri ngkwa.

¹⁴Giri ata carɓəla kauyayeri ar ɗuwardzi makər aɓəla bwanda Thlyagha Jodan, ka damwa makər tsuwa akwa tsəɗi Kanana.

¹⁵Diyayeri ngəni ngkwa ni ata ndzi vəi ɗuwardzi aka mjir Israila, ka aka mətəpiyayeri na ka ndzi akwa nca giri, ka tsuwa mətəpiyayeri na haɗa si, natə kəlara mdə na ku kar ka tsi mda, tsa ata mzhi hwi ka ra ɗuwardzi anda.”

¹⁶“Amma ma mdə na ku tsa mda ka su tə mdə nam ka liya, har tə mdə ni ku mti, mdə na tsa su ni ku ndzi mdər tsi mda, antə mda ata tsi ni tsuwa.

¹⁷Wala tsuwa ma mdə laga ku ndzəhə mda ka pela na ola har tə tsa mta, tsa na ndzəhə su ni ku ndzi mdər tsi mda. Antə mdər tsi mda, mda ata tsi ni.

¹⁸Ma mdə laga ku kətə zwal ka tsa mda kəgari har tə tsa mta, mdə na tsa su ni ku ndzi mdər tsi mda. Antə mdər tsi mda, mda ata tsi ni.

¹⁹Mdər ntəskur ata hila ɓzərma'ni ni an ata tsi mdər tsi mdə ni kəlara sakatə tsa ku wutə ni.”

²⁰“Tsu apani tsuwa ma mdə ku nggəlar nca mda har tə tsa ku tsi ni atar bukəmta ni ata di, wala ndzəhə ni ka su, wala atar thla ni akwa laku,

²¹wala tsa ni ka matəkum kamnyar dawakur na akwa daɓwa ɗa, har tə tsa ku mti, to mdə ngəni ku ndzi mdər tsi mda. Antə tsa ma mda ata tsi ni. Antə mdər ntəskur ata hila ɓzərma'ni an ata tsi ni kəlara sakatə tsa ku wutə ni.”

²²“Amma ma mdə laga ku tsi mdə natə dawakur aɗi akwa daɓwa ɗa wa, wala atar bukəmta ni ata di, wala atar ndzəhə su laga antə kar ka pwa alari,

²³wala atar ndzəhə pela laga kula tsa wutə ni, antə pela na ata mzhi tsi mdə ni kar ka pwa alari har ka tsi ni, amma dawakur aɗi akwa daɓwa ɗa wa, tsuwa tsa aɗi ɗəmha abbər ka tsa dəkəi ni wa,

²⁴to, mji ata tsaptədzi ka da thlamta shariya akwa daɓwa mdə na tsi mdə ni ka mdər bara ntəskur ata hila ɓzərma'ni ni. Da ata hara shariya ni akwa laku nayeri ni.

²⁵Mji na tsaptədzi ni ata mbuli mdə na tsi mdə ni akwa tsiya mdər bara ntəskur ni. Tsuwa da ata ngka ka mdər tsi mdə ni akwa di tə tsa hwi ra ɗuwardzi ni. Tsa ata ndzi tsu anda har tar ma sakatə prist natə mdə pungkər alari mal ni ku mti.

²⁶Amma ma mdə na ku tsi mdə ni ku ləɓəla kazhar kuta di tə tsa ɗuwardzi akwa ni,

²⁷antə mdər ntəskur ni ku wutə ni aɓəla kuta diyir ɗuwardzi ni, ka tsi ni, mda aɗi ata ɗi mdər ntəskur ni kamnyar bikər tsi mdə wa.

²⁸Kamnyar dwali ka mdə na tsi mdə nda ndzi tsu akwa kuta di ɗuwardzi ni, tar ma prist na ola nda ku mti. Amma aghəla mtər prist na ol ni, mdə na tsi mdə ni ata mzhi ngka avi akwa diyirni.”

²⁹“Antə suayeri ngəni ata ndzi tsawa ala giri, ka su tə giri ata ləkəma ka harari akwa shanga zamanayeri ar giri akwa kəlara vəi tə giri ata sə ndzi akwa.”

³⁰“Kəlara mdə na ku tsi mda, mda ata tsi ni atar seɗa natə mjir seɗa ku hamta. Amma mda aɗi ata tsi mda ata kəra seɗar mdə duku daci wa.

³¹Giri aɗiya dlu sur pəli mda kamnyar pəli mpika mdə na ku tsi mdə natə mdə ku kurtə thlamta alari shariyar mtə wa. Dwali ka mdə tsi mdər tsi mda.

³²Ma mdə laga ku hwi ka mwari akwa di ar ɗuwardzi ni, mda aɗiya kələngkər alari abbər ka tsa ntəmta su laga kamnyar ka mdə zhar ni ka tsa ngka avi akəmata prist na ola amtə wa.

³³Kamnyar ma giri ku hara apani, giri ata namtə tsəɗiyir giri ka tsa ndzi dlimbur. Tsuwa laku damwa aɗi tə mda amzhi kələmta bikər tsəɗi natə mdə ku pumta mamshi akwa wa, tar atar pumta mamshir mdə na pumta mamshir mdə ni.

³⁴Antə giri aɗiya namtə tsəɗiyir giri ka tsa ndzi dlimbur wa, tsəɗi natə I ka kəri andzəndzi akwa. Kamnyar tə I na MTHLAKU, I akwa ndzəndzi akwa nca mjir Israila.”