Read bura-pabir Jikayeri 4 Bible Online

Jikayeri 4 - bura-pabir bible

Jikayeri 4

²“Ka giri jikatə mjir nyarmbwar Kohath zum ka mambila mjir Lawi, atar kutakəi ka nyarmbwar kəkayeri ar ɗa

³Ka giri jikatə mji shili natə məva ɗa ku hara makkumari har ka mwanta aka ntəfkumari, watau shanga mji na ata mzhi ləkwa kəthlər ar Tentər vəngkər səli.

⁴Kəthlər tə mjir nyarmbwar Kohath ata harari akwa Tentər Kəɓa ni an wul kəra shanga suayeri na ɓɗakkarkara ta shang.”

⁵“Ma sakatə giri akwa ɗəmhədzi kamnyar thlatə kazhar vəi fəliyir giri, ka Haruna kəga maɗashilərni ləkwa Tent ni, ka da mpəli lapəliyir Vəi na Ɓɗakkarkara ni, ka da hartə kəra Akwati Alkawal ni kəgari.

⁶Aghəla nda tsuwa ka da pungkər kəsəm na ɓɗaku, ka psharəngkər zhaɓi na lipəla, kambəla da hau zwalayeri ar kəl akwati ni.”

⁷“Aghəla nda, Haruna ka maɗashilərni ni ata pshartə zhaɓi na lipəla ni ata kəra tebər ar vəi Buradi natə Mdə ku Hamta aka Hyel ni. Tsuwa da ata putə parantiyayeri, ka tasayeri ar mba tulari ɗuza, ka tasayeri na ol'ola, ka samtalayeri kamnyar hamta saɗakar sur sa. Tsuwa Buradi natə Mdə ku Hamta aka Hyel ni ata ndzi tsu ata kəra tebər ni tədəku.

⁸Da ata hartə kəra suayeri ngəni shang ka zhaɓi na mamza, ka jaktə hartə kərari ka kəsəm na ɓɗaku, ka hau zwalayeri ar kəl tebər ni.”

⁹“Da ata səntə zhaɓi na lipəla ka da hartə zwalər kəsi pitəlayeri ni, ka məksayerari, parantiyayerari, ka shanga su tə mda ana pu mal zaitun akwa.

¹⁰Da ata pərta zwalər kəsi pitəlayeri ka shanga kariyayerari akwa kəsəm na ɓɗaku, ka da putə ɗa ata udzəmər kəlari.”

¹¹“Da ata hartə kəra bagaɗi tə mdə nam ka dinar ni ka zhaɓi na lipəla, ka da jaktə hartə kərari ka kəsəm na ɓɗaku, ka hau zwalayeri ar kəl bagaɗi ni.

¹²Da ata fatə shanga tasayeri tə mda ana kəthlər kəgari akwa Vəi na Ɓɗakkarkara, ka da pərtə ɗa akwa zhaɓi na lipəla, ka hartə kəra ɗa ka kəsəm na ɓɗaku, ka putə ɗa ata udzəmər kəlari.

¹³Da ata fwaɓəla pənju na ata bagaɗi ni, ka da hartə bagaɗi ni ka zhaɓi na ka kalar yar ndləngi həng'ha.

¹⁴Antə da ata puta ata zhaɓi ni shanga kari tə mda ana kəthlər kəgari ata bagaɗi ni, watau tasayeri ar hakthlir u'u, ka cagwaliyayeri na ka kuleng, ka tebər famta su na ka kuleng, ka tasayeri na ol'ola, watau shanga kari bagaɗi ni. Aghəla nda da ata hartə kərari ka kəsəm na ɓɗaku, ka hau zwalayeri ar kəl bagaɗi ni.

¹⁵Ma sakatə giri akwa ɗəmhədzər thlatə kazhar vəi fəliyir giri, sakatə Haruna kəga maɗashilərni ku kuri hartə Vəi na Ɓɗakkarkara ka shanga suayeri na akwa, antə ka mjir nyarmbwar Kohath si ka da fata. Amma da aɗiya tsəkwar su na ɓɗakkarkar wa ta da asə mta. Nayeri ni an su na akwa Tentər Kəɓa ni natə maɗashilər Kohath ata dingngga kəlari.”

¹⁶“Antə Eleyazar na ɓzər Haruna na prist an ata wul malər pitəlayeri, ka tulari ɗuza na kiskisu, ka mthlir saɗaka na tədəku, ka mal ar hamta mda aka Hyel, ka shanga suayeri damwa na akwa Tent tə mdə ku hamta ɗa aka Hyel.”

¹⁷Antə MTHLAKU pəla aka Musa ka Haruna abbər,

¹⁸“Giri aɗiya hir ka mjir nyarmbwar Kohath kurəmtadzi akwa nca mjir Lawi wa.

¹⁹Nggədza su tə ka giri hara kamnyar ta da asə mta ma sakatə da ku si adzə kari tə mdə ku namtə ni ɓɗakkarkara. Ka Haruna kəga maɗa'ni ləkwa Tent ni ata kəma duku kəga mjir Kohath ni, ka da hamta aka kəlara mda akwa nca ɗa kəthlər ka kari tə tsa ata kətari.

²⁰Amma ma mjir Kohath ku ləkwa Tent ni, ka wutə dza suayeri tə mdə pwi na ɓɗakkarkara wala akwa məcikər nca, to, da ata mta.”

²¹Antə MTHLAKU pəla aka Musa abbər,

²²“Ka gə jikatə mji shili na akwa nyarmbwar Gershon, atar kutakəyir ɗa ka kəkayeri arɗa.

²³Ga ata rəbutə thləma shanga mji shili na ka məva ɗa makkumari har ka mwantə ntəfkumari, watau mji na ata mzhi hara kəthlər akwa Tentər Kəɓa.

²⁴Ngəni an kəthlər ar mjir nyarmbwar Gershon, da ata hara kəthlər ka fa kari.

²⁵Da an ata kəl lapəliyir Tent ni, ka Tentər Kəɓa ni, ka sur hartə kərari, ka kəsəm na ɓɗaku ar hartə kərari na aɓəlaɓəla, ka lapəliyir nyarmbwar ləkwa Tent ni,

²⁶ka lapəliyayeri ar kalaktə bəbalər Tent ni, ka lapəliyir nyarfur ləkwa bəbal na kalaktə Tent ni ka bagaɗi ni, ka suwayerari, ka shanga kari kəthlər arɗa. Antə mjir nyarmbwar Gershon ata hara kəlara su na kalkal tə mda amzhi haratari ka da.

²⁷Shanga kəthlərayeri natə mjir nyarmbwar Gershon ata harari ata ndzi akira Haruna kəga maɗashilərni, watau shanga su tə da ata harari wala kətari. Antə ka giri hamta ala ɗa kəthlər tə waskəi ata harari.

²⁸Nayeri ni an kəthlər natə mjir nyarmbwar Gershon ata harari akwa Tentər Kəɓa. Antə Ithlamar na ɓzər Haruna na prist an ata wul ɗa akwa hara kəthlərayeri ni.”

²⁹Antə MTHLAKU pəla aka Musa abbər, “Ka gə jikatə mjir nyarmbwar Merari atar kutakəyir ɗa ka kəkayeri arɗa.

³⁰Ga ata rəbutə thləma shanga mji shili na ka məva ɗa makkumari har ka mwantə ntəfkumari, watau mji na ata mzhi hara kəthlər akwa Tentər Kəɓa ni.

³¹Ngəni an kəthlər ar kəl su tə mdə thlamta ala ɗa ka da dingngga harari akwa Tent ni. Da an ata kəl udzəmayeri ar Tent, ka zwalayerari, ka udzəmayeri ar kadləngkər, ka zhimbwalayerari, ka sur kəsi səla ɗa,

³²ka zhimbwalayeri ar kalaktə bəbalər Tent ni, ka sur kəsi səla ɗa, ka makukwayerari, ka suwayerari, ka shanga su na ku tsəkwar ɗa. Antə ga ata ncaɓəla aka kəlara mda kəthlər tə waskəi ata harari ka su tə waskəi ata kəlari.

³³Ngəni an kəthlər natə mjir nyarmbwar Merari ata harari akwa Tentər Kəɓa ni. Antə Ithlamar na ɓzər Haruna na prist an ata wul ɗa akwa hara kəthlərayeri ni.”

³⁴Antə Musa, ka Haruna, ka mji na ol'olər Israila, ku jikatə mjir nyarmbwar Kohath atar kutakəyir ɗa ka kəkayeri arɗa.

³⁵Mdə jikatə shanga mji shili natə məva ɗa makkumari har ka mwanta aka ntəfkumari, watau shanga mji shili na ata mzhi ləkwa kəthlər Tentər Kəɓa ni.

³⁶Antə hangkurər ɗa akwa nyarmbwar ɗa an mji dəpu suɗa ka aru murfa ka ntəfkumari.

³⁷Ngəni an hangkur ar kutakəyir mjir Kohath, watau shanga mji na ku mzhi hara kəthlər akwa Tentər Kəɓa ni. Antə Musa ka Haruna ku jikatə ɗa kalkal apatə MTHLAKU ku tsawa.

³⁸Mdə ku jikatə mjir nyarmbwar Gershon, atar kutakəyir ɗa ka kəkayeri arɗa.

³⁹Mdə ku jikatə mji shili na ka məva ɗa makkumari har ka mwanta aka ntəfkumari, watau shanga mji shili na ku mzhi ləkwa kəthlər akwa Tentər Kəɓa ni.

⁴⁰Antə hangkur ar mjir nyarmbwar Gershon an mji dəpu suɗa ka aru ngkwa ka makkumari.

⁴¹Ngəni an hangkur mjir nyarmbwar Gershon, watau shanga mji shili na ku mzhi kəthlər akwa Tentər Kəɓa. Antə Musa ka Haruna ku jikatə ɗa kalkal apatə MTHLAKU ku tsawa.

⁴²Antə mdə ku jikatə mjir nyarmbwar Merari atar kutakəyir ɗa ka kəkayeri arɗa.

⁴³Mdə ku jikatə shanga mji shili na ka məva ɗa makkumari har ka mwanta aka ntəfkumari, watau shanga mji shili na ku mzhi hara kəthlər akwa Tentər kəɓa ni.

⁴⁴Antə hangkur ar mjir nyarmbwar Merari an mji dəpu makər ka aru suɗa.

⁴⁵Ngəni an hangkur ar mjir nyarmbwar Merari. Antə Musa ka Haruna ku jikatə ɗa kalkal apatə MTHLAKU ku tsawa aka Musa.

⁴⁶Antə Musa, ka Haruna, ka mji na ol'olər Israila, ku jikatə shanga maɗashilər mjir Lawi, atar kutakəyir ɗa ka kəkayeri arɗa.

⁴⁷Mdə ku jikatə shanga mji shili na ka məva ɗa makkumari har ka mwanta aka ntəfkumari, watau shanga mji shili na ku mzhi hara kəthlər, ka kəl Tentər Kəɓa.

⁴⁸Antə hangkur mjir nyarmbwar Lawi ni an mji dəpu ncisu ka aru ntəfu ka nciskumari.

⁴⁹Antə mdə ku ndəkəi kəthlərayeri ni aka kəlara mda ata bəbal, tə waskəi ka kəthlər tə tsa ata harari, kalkal apatə MTHLAKU ku tsawa aka Musa. Apani antə mdə ku kuri jikatə ɗa kalkal apatə MTHLAKU ku tsawa aka Musa.