Read bura-pabir Jikayeri 5 Bible Online

Jikayeri 5 - bura-pabir bible

Jikayeri 5

¹MTHLAKU ku pəla aka Musa abbər,

²“Ka gə tsawa aka mjir Israila ka da kədləɓəla jili shili ka mwanki kazhar vəi fəli ni, ka da kədləɓəla kəlara mdə na ka shilkər kəsəm dza wala lu na ata hwi, wala mdə na ku diɓərtədzi atar tsəkwar mshi.

³Giri ata kədləɓəla shili ka mwanki ka da mwari ata hildi, ta da asə diɓərantə vəi fəliyir ɗa, vəi tə I ana ndzəndzi akwa nca ɗa.”

⁴Antə mjir Israila ku kədləɓəla ɗa kazhar vəi ni, ka mwantə ɗa ata hildi, tsu apatə MTHLAKU ku tsawa aka Musa.

⁵Antə MTHLAKU pəla aka Musa

⁶ka tsa pəla aka mjir Israila tsawayeri ngəni, “Ma mdə sal wala mdə mwala laga ku ɓzamtə su aka nvwa ni, ka ndzi kula jirkur aka MTHLAKU, to, mdari ku ndzi ka biku.

⁷Antə tar ka tsa pəlaɓəla biku tə tsa hara ni, ka ntəmta shanga su tə tsa ɓzamtə ni, har ka jakəngkər duku ata kəra ntəfu ar su tə tsa ata ntəmtari ni, ka hamta aka mdə natə tsa ɓzamta alari su ni.

⁸Amma ma mdə tə tsa ɓzamta alari su ni ku mti, tsuwa tsa aɗi ka yangkurari na kudzəha tə mda amzhi ntəmta alari su ni wa, to su ni ata ndzi aka MTHLAKU, antə ka tsa hamta aka prist. Tsuwa tsa ata paktari ka gam natə mda ata hara saɗakar kələmta watsəɓər biku kəgari.

⁹Tsuwa shanga sur hamta na ɓɗakkarkara tə mjir Israila ana sənta aka prist ata ndzi ar prist ni.

¹⁰Tsuwa shanga sur hamta na ɓɗakkarkara tə mdə laga hamta ata ndzi ar prist ni.”

¹¹Antə MTHLAKU pəla aka Musa

¹²ka tsa pəla aka mjir Israila abbər, “Ma mwala na ku pəramta ka ndzi kula jirkur aka salngkiɗa.

¹³Ma mdə sal laga ku pi ka tsa, tsuwa salngkiɗa ni aɗi səndə su ata kər wa, tsuwa mda aɗi nggaɓəla abbər tsa ku hara dlimburkur wa, tsuwa mda aɗi na mzhi hamta seɗa ata kərari wa, təng tə mda aɗi na ngkəi ni akwa harari wa, to ka mdə səntə ni akəma prist.

¹⁴Tsuwa ma salngkiɗa baɗitə dzama abbər mwalankiɗa aɗi akwa ndzi ka jirkur alari wa, tə tsa ləkwa səlkər mwalankiɗa na hara dlimburkur ni, tsuwa nuhum tsa aɗi hara dlimburkur jiri wa,

¹⁵to ka sal ni səntə mwalankiɗa akəma prist. Tsuwa ka sal ni səntə su tə mda ata turari akəla mwala ni, watau tasa pal ar mpur barli. Tsa aɗiya pungkər mal wala sur shiwura na msəra aka mpu ni wa, kamnyar tsa an sur hamta kamnyar səlka, sur hamta ar ɗangtə kamnyar ndəkərtə hangkala mda ka tsa pəlaɓəla su tə tsa ɓzamta.”

¹⁶“Antə prist ata səntə mwala ni ka tsa thləthlata akəma MTHLAKU.

¹⁷Antə prist ata pu yimi na ɓɗakkarkara akwa hahəi, ka tsa kətsə bərbər ar kuta Tent ni, ka tsa pu akwa yimi ni, ka tsa ndzi ɗəɗahu.

¹⁸Antə prist ata sharəmta shishir kəra mwala ni, ka tsa pu mpur saɗaka ar ɗangta, natə tsa an mpur mthli na kamnyar səlka ni akwa tsiyari japjapu. Antə prist ni ata kətə hahəi na ka yimi na ɗəɗahu ar shuwumta mdə ni akwa tsiyari.

¹⁹Aghəla nda prist ni ata vu mwala ni ka tsa kahyel. Tsa ata pəla aka mwala ni, ‘Ma mdə sal aɗi na pi ka gə wa, tsuwa ma ga aɗi pəramta ka diɓərtə kər nga atar ndzi kula jirkur akwa ngyikar salngkiri wa, to, yimi ɗəɗahu ngəni na ana shuwumta mdə ni aɗiya hara ala gə su wa.

²⁰Amma ma ga ku pəramta, ka diɓərtə kər nga ata hir tə mdə sal damwa zum ku pi ka ga akwa ngyikar salngkiri,

²¹to, ka MTHLAKU vu ka mjir nga shuwumta nga ka da nggəlar nga. Ka tsa vu ka vəi yar nga shiwumnyadzi ka kuta gə fikantədzi.

²²Ka yimi ngəni na ana vu ka mdə shiwumnyadzi ni ləkwa kuta ga, ka tsa fikantə kuta ga, ka vəi yar nga shiwumnyadzi.’ ” “Antə mwala ni ata shinau ka pəla, ‘Amin, amin. Ma I ku hara su apani, ka tsa ndzi apa su tə gə pəla ni.’ ”

²³“Antə prist ni ata rəbutə ndərayeri ar shuwumta mdə ni ata kakaɗu, ka tsa kəcəghəi su tə tsa rəbutə ni ka yimi na ɗəɗahu ni.

²⁴Tsa ata vu mwala ni ka tsa samnya yimi na ɗəɗahu ar shuwumta mdə ni. Antə yimi ni ata ləkwa kutari ka tsa kətə kutari, ma tsa ku ɓzamtə su jiri.

²⁵Tsuwa prist ni ata dlu sur hamta ar mpu na kamnyar səlka akwa tsiya mwala ni, ka mwanta ata bagaɗi, ka hapta akəma MTHLAKU.

²⁶Antə prist ni ata kətsə mpur saɗaka ni kuta tsiyari pal, ka tsa mbamta ata bagaɗi ni kamnyar ka tsa ndzi sur ɗangta. Aghəla nda antə tsa ata vu mwala ni ka tsa sa yimi ni.

²⁷Aghəla tə tsa ku sa yimi ni, ma tsa an ku ɓzamtə su ka ndzi kula jirkur aka salngkiɗa, yimi ngəni na ana hara ka mdə ndzi shushuwari ni, ata ləkwa kutari ka ɗar bwani alari ka duna. Yimi ni ata fikantə kutari, tsuwa vəi yarni ata shiwumnyadzi, antə mwala ni ata ndzi su hilhila akwa nca mjirni.

²⁸Amma ma mwala ni aɗi diɓərtə kərni wa, tə tsa aɗi hara dlimburkur laga wa, tsa ata ndzi msərmsərari, tsuwa tsa ata mzhi kətə hur ka yatsə maɗankyar.”

²⁹“Ngəni an su tə ka mdə hara ata kəra səlka, ma sakatə mdə mwala laga ku pəramta ka diɓərtə kərni akwa ngyikar salngkiɗa,

³⁰wala akwa sakatə mdə sal akwa səlkər mwalankiɗa tə tsa dzama abbər mwalankiɗa akwa ləka aɓəla. Antə mwala ni ata thləthlata akəma MTHLAKU, ka prist hara alari shanga su tə tsawa pəla ka mdə hara ni.

³¹Sal ni ata ndzi msərmsərari akwa watsəɓər biku, amma ar mwala ni, ma tsa ku hara biku, watsəɓər biku ni ata ndzi ata kərari.”