Read bura-pabir Jikayeri 6 Bible Online

Jikayeri 6 - bura-pabir bible

Jikayeri 6

¹Antə MTHLAKU pəla aka Musa

²ka tsa pəla aka mjir Israila abbər, “Kəlara mdə sal wala mdə mwala na ata bara ka tsa kətə alkawal na zum, alkawal ar hamta kərni aka MTHLAKU, watau ka tsa ndzi mdər Naziyir,

³to tar ka tsa ndəkəmta kərni ka sa yimər anap, ka shanga sur sa na mwavər. Tsa aɗiya sa kəlara yimər anap na mumwasu wa, wala yimər anap na ata wikantə mdə wa. Tsuwa tsa aɗiya səm yar anap wa, wala ɓɗə yar anap na miraku wala na ul'ulari wa.

⁴Akwa shanga ndzəndziyir mpikari ar mdər Naziyir, tsa aɗi ata səm kəlara su na thlata adzə nfur anap wa, wala munyari, wala hilari wa.”

⁵“Akwa shanga virayeri ar alkawalərni, reza aɗi ata tsəkwar shishir kərari wa. Tsa ata zhar shishir kərari ka tsa kəla har ka vədza aka vir tə tsa ku kuri nghyaɓəla alkawalərni, kamnyar tsa ku kurtə hamta kərni aka MTHLAKU.

⁶Akwa shanga virayeri ngəni tə tsa ku hamta kərni aka MTHLAKU ni, tsa aɗiya mwari adzə mshi wa,

⁷wala ma baba'ni, wala mama'ni, wala ɓzərma'ni, wala ngkwarma'ni an mta, ta tsa andzi dlimbur. Kamnyar shishir kərari ni an seɗar hamta kərni aka Hyel.

⁸Akwa shanga virayeri tə tsa kətə alkawal abbər tsa ata hamta kərni aka MTHLAKU ni, tsa ata ndzi kəcəkəcari akəma MTHLAKU.”

⁹“Ma mdə laga ku mta adzə ni kula səndərni, to shishir kərari ni ata ndzi dlimbur. Antə tar ka tsa shimta kərari akwa vir na murfəkur na ar kəcimtadzi.

¹⁰Antə akwa vir na nciskur tsa ata səntə bukəl suɗa wala maɗa' katapar suɗa aka prist anyarmbwar Tentər Kəɓa.

¹¹Antə prist ni ata hamta ɗika na pal kamnyar saɗakar biku ka na palari kamnyar saɗaka mbamba. Apani antə mda ata hara saɗakar kələmta watsəɓər biku kamnyar ni, kamnyar tsa ku diɓərantədzi ka mshi. Vir nda antə tsa ata jaktə hamta kərni aka Hyel.

¹²Antə tsa ata jaktə hamta kərni aka MTHLAKU kamnyar virayeri ar alkawal tə tsa kətə nda. Antə tsa ata səntə ɓzər gam na ka məvari pal kamnyar hara saɗakar kəcimta biku. Antə virayeri tə tsa hara sakanda ni aɗi ata ndzi akwa jika wa, kamnyar hamta kərni na ndaga ku diɓərtədzi.”

¹³“Nggədza tsawu natə kalkal ka mdər Naziyir hara aghəla tə tsa ku kuri nghyaɓəla alkawalərni. Mda ata səntə ni anyarmbwar Tentər Kəɓa,

¹⁴ka tsa hamta cautərni aka MTHLAKU. Tsa ata hamta ɓzər gam na ka məvari pal na kula nangka kamnyar saɗaka mbamba, ka mbəkəl təma pal na kula nangka kamnyar saɗakar jakə mwardzi,

¹⁵ka thlambəl pal ar buradi na kula yist, ka kek tə mdə ɓwa ka mpu na liktikti tə mdə hərtə ka mal, ka biskitu na kula yist tə mdə fadza alari mal, ka sur hamta ar mpwa ka sur sa.”

¹⁶“Antə prist ata mwantə shanga cautayeri ngəni akəma MTHLAKU, ka tsa hamta apa saɗakar kəcimta biku, ka saɗaka mbamba ar mdə ni.

¹⁷Tsuwa tsa ata hamta gam aka MTHLAKU kamnyar saɗakar jakə mwardzi ka tsa paktə ka thlambəl na ka buradi na kula yist ni, ka saɗakar mpwa ka saɗakar sur sa.

¹⁸Antə mdə na hamta kərni ni ata shimta shishir kərari anyarmbwar Tentər Kəɓa, ka fatə shishi ni kara puwari akwa u'u na akira saɗakar jakə mwardzi ni.”

¹⁹“Aghəla tə mdə ni ku shimta kərari, antə prist ata kətə pathlaha gam pal tə mdə ɓwata, ka tsa paktə ka buradi kər pal, ka kek na kula yist kər pal, ka biskitu na kula yist akwa thlambəl ni kər pal, ka tsa pu ɗa akwa tsiya mdə na ku hamta kərni ni.

²⁰Antə prist ni ata hamta ɗa apa saɗakar hapta aka MTHLAKU, kamnyar mdə ku ɗəmhə bwa ngəni ɓɗakkarkara abbər tsa an nəɓwar prist. Antə mda ata hamta ɗa ata kəma duku ka kərathlu, ka kiɗa, apa saɗakar hapta. Aghəla nda mdə na kətə alkawalər hamta kərni ni aka MTHLAKU abbər tsa ata ndzi mdər Naziyir ni, ata mzhi sa yimər anap.”

²¹“Ngəni an tsawu natə mdə ɗəmha aka kəlara mdə na ku kətə alkawal ar hamta kərni aka Hyel abbər tsa ata ndzi mdər Naziyir. Ma tsa ata bara ka tsa hamta su təramta su tə mdə thlamta, ka tsa hara kalkalər dunari. Apani antə tar ka tsa nghyaɓəla alkawal tə tsa kətə ni apatə mdə ku thlamta.”

²²Antə MTHLAKU pəla aka Musa

²³abbər ka tsa pəla aka Haruna ka maɗashilərni, laku tə da ata vədzə barka aka mjir Israila. Ka da pəla,

²⁴Ka MTHLAKU vədzə barka ala giri ka tsa tsəlpi giri.

²⁵Ka MTHLAKU hara ka kəmari mbəla ata kəra giri, ka tsa hara ɓɗakkur ala giri.

²⁶Ka MTHLAKU wul giri ka ncar kətadzə ka tsa na ala giri msərakur.

²⁷“Apani antə Haruna ka maɗashilərni ata sə nci thləmi ata kəra mjir Israila, antə I ata vədzə barka ala ɗa.”