Read bura-pabir Jikayeri 8 Bible Online

Jikayeri 8 - bura-pabir bible

Jikayeri 8

¹Antə MTHLAKU pəla aka Musa

²ka tsa pəla aka Haruna tsawu ngəni, “Kəlara sakatə ga ata ɗəmhə pitəlayeri na murfə ni, ka gə pwi ɗa akwa laku tə da ata hamta parakəu aka vəi na akəma zwalər pitəlayeri ni.”

³Antə Haruna ku hara tsu apatə Musa pəla alari. Tsa pwi pitəlayeri ni akwa laku tə da ata hamta parakəu aka vəi na akəma zwalər pitəlayeri ni, kalkal apatə MTHLAKU tsawa aka Musa.

⁴Nggədza laku tə mdə ɓdlətə zwalər pitəlayeri akwa. Mdə ɓdlətə ni shang ka dinar, baɗita ata kirari har ka mwanta adzə pukdlayeri na ata tsiyayerari ni, tsu akwa laku tə MTHLAKU ngkərɓəla aka Musa.

⁵Antə MTHLAKU ku gari aka Musa ka pəla,

⁶“Fwaɓəla mjir Lawi akwa nca mambila mjir Israila, ka gə kəcimta ɗa, apatə tsawa ku thlamta.

⁷Nggədza laku tə ga ata nuwari kamnyar kəcimta ɗa. Ka gə pshingkər ala ɗa yimi na ana namtə mda ka tsa ndzi kəcəkəcari ni, ka gə vu ka da shimta shanga shishir dza ɗa, ka kəcimta ləptayeri arɗa, kamnyar ka da ndzi kəcəkəcari apatə tsawa ku thlamta.

⁸Aghəla nda ka da kətə ɓzər gyal ka mpur saɗaka na liktikti tə mdə hərtə ka mal. Ka da səntə dakwiyir gyal damwa tsuwa kamnyar saɗakar kəcimta biku.

⁹Ka gə səntə mjir Lawi ka da thləthlata abwakəma Tentər Kəɓa, ka gə tsaptə shanga mjir Israila tsuwa.

¹⁰Ma sakatə ga ku səntə mjir Lawi akəma MTHLAKU, ka mjir Israila pungkər tsiya ɗa ata kəra mjir Lawi.

¹¹Ka Haruna hamta mjir Lawi apa saɗakar hapta aka MTHLAKU, na thlata akəla mjir Israila, kamnyar ka da mzhi hara kəthlər aka MTHLAKU.”

¹²“Antə mjir Lawi ata pungkər tsiya ɗa ata kəra gyalayeri na suɗə ni. Aghəla nda ka gə hamta gyal pal kamnyar saɗakar kəcimta biku, ka na palari kamnyar saɗaka mbamba aka MTHLAKU, kamnyar saɗakar kələmta watsəɓər bikər mjir Lawi.

¹³Ga ata vu ka mjir Lawi thləthlata akəma Haruna ka akəma maɗashilərni, ka gə hamta ɗa apa saɗakar hapta aka MTHLAKU.

¹⁴Apani antə ga ata namtə mjir Lawi ka da ndzi zum ta mambila mjir Israila, antə mjir Lawi ni ata ndzi arna.

¹⁵Aghəla tə ga ku kuri namtə mjir Lawi ni tə da ndzi kəcəkəcari, ka hamta ɗa apa saɗakar hapta aka MTHLAKU, antə da ata mzhi ləmbwa ka hara kəthlər akwa Tentər Kəɓa,

¹⁶kamnyar mdə ku kurtə hamta ɗa ali shang ka da ndzi arna. I ku fatə ɗa akwa nca mambila mjir Israila ka da ndzi arna ata vəya maɗashili na baɗitə kəlar vəi yar mama' ɗa, watau maɗashili na yarakəma ar mjir Israila.

¹⁷Kəlara ɓzər sal na yarakəma akwa Israila, wala ar mda, wala ar mwaɓi, tsa arna. Sakatə I ku kurəmta shanga yarakəma na akwa Masar, I pwi ɗa kamnyar kəri,

¹⁸amma I ku fatə mjir Lawi ata vəya maɗashili na yarakəmar mjir Israila.

¹⁹Akwa shanga mjir Israila tsuwa I ku hamta Haruna kəga maɗashilərni cauta ar mjir Lawi, kamnyar ka da hara kəthlər aka mambila mjir Israila akwa Tentər Kəɓa. Antə da ata hamta saɗakar kələmta watsəɓər bikər mjir Israila, kamnyar ta asar asə təri ata kəra ɗa ma sakatə da ku si kudzəhə ka Vəi na Ɓɗakkarkara ni.”

²⁰Apani antə Musa, ka Haruna, ka shanga mjir Israila ku hamta mjir Lawi aka MTHLAKU akwa shanga lakwayeri tə MTHLAKU ku tsawa aka Musa. Apani antə mjir Israila ku hara ala ɗa.

²¹Antə mjir Lawi ku namtə kərɗa kəcəkəcari, ka kəcimta ləptayeri arɗa. Aghəla nda antə Haruna ku hamta ɗa apa saɗakar hapta akəma MTHLAKU. Tsuwa tsa ku hamta saɗakar kələmta watsəɓər biku kamnyar ka da ndzi kəcəkəcari.

²²Aghəla nda antə mjir Lawi ku baɗitə kəthlərər ɗa akwa Tentər Kəɓa, akira Haruna kəga maɗashilərni. Antə da ku hara kəthlər ata kəra mjir Lawi ni kalkal apatə MTHLAKU ku tsawa aka Musa.

²³Antə MTHLAKU ku gari aka Musa ka pəla,

²⁴“Ngəni an su tə ka mjir Lawi hara. Mjir Lawi na ku hara məva sərkumari ka ntəfu har ka ləmta, da ata baɗitə kəthlərər ɗa akwa Tentər Kəɓa.

²⁵Amma ma sakatə da ku mwantə məva ntəfkumari ka yar ɗa, da ata pwi kəthlərər ɗa na akwa Tentər Kəɓa ni, ka da ghərəmtaghəra.

²⁶Da ata mzhi dlar maɗa'ma'ɗa akwa hamta sauri ar kəthlərayeri na akwa Tentər Kəɓa ni, amma da aɗi ata vu tsiya ɗa akwa kəthlər ni wa. Apani antə ga ata hara ka kəthlər natə mdə hamta aka mjir Lawi.”