Read bura-pabir Jikayeri 9 Bible Online

Jikayeri 9 - bura-pabir bible

Jikayeri 9

¹Antə MTHLAKU gari ka Musa akwa Mtakər Sinai, akwa thliya na ntangkəma ar məva na suɗkur, aghəla səɓəlar ɗa akwa tsəɗi Masar. Tsa pəla ka Musa pəla aka mjir Israila abbər,

²“Tar ka giri ɓəlatə sakar Kucali ar Fəlɓəla Kəi akwa sakari.

³Akwa vir na kumnya nfwarkur ar thliya ngəni, sakatə pci haɗa təri, antə ka giri hara kucali ni, apatə tsawa pəla, tsuwa akwa laku tə mda ana hara akwa hwatu.”

⁴Antə Musa ku pəla aka mjir Israila ka da ɓəlatə vir kucali ar Fəlɓəla Kəi ni.

⁵Antə da ku ɓəlatə Vir Fəlɓəla Kəi ni akwa sakatə pci haɗa təri ar vir na kumnya nfwarkur ar thliya na ntangkəma, akwa Mtakər Sinai. Da ku hara shanga su kalkal apatə MTHLAKU ku tsawa aka Musa.

⁶Amma vir nda mji laga aɗi natə da aɗi mzhi hara kucali ni wa, kamnyar da ku tsəkwar mshi ka diɓərantədzi. Antə da mwari adzə Musa ka Haruna ka pəla,

⁷“Yeru ku ndzi dlimbur kamnyar yeru ku tsəkwar mshi, amma kamnyar mi tə yeru amzhi hamta saɗaka aka MTHLAKU ata kəma duku kəga mambila mjir Israila akwa sakari wa ri?”

⁸Antə Musa pəla ala ɗa, “Səkə giri raka, kəi nggaɓəla su tə MTHLAKU ata pəlari ata kəra giri.”

⁹Antə MTHLAKU ku pəla aka Musa

¹⁰ka tsa pəla aka mjir Israila abbər, “Kəlara mda akwa nca giri, wala akwa nyarmbwar giri, na ku diɓərantədzi atar tsəkwar mshi, wala ma tsa an lənggu ciju, tsu tsa ata mzhi hara kucali ar Fəlɓəla Kəi ni aka MTHLAKU.

¹¹Amma da ata sə harari akwa vir na kumnya nfwarkur ar thliya na suɗkur, sakatə pci ku təri. Da ata hara kucalər ɗa ka buradi na kula yist ka thlaliyayeri na ɗəɗahu.

¹²Da aɗiya zhar susəma ka tsa pi har ka vir kura alari wa, ka tsuwa mda aɗiya ɓəlwa ɗethlər ɓzər gam ni wa. Ka da nu tsawayeri ar Fəlɓəla Kəi apatə mdə thlamta.

¹³Amma kəlara mdə na aɗi dlimbur wa, tsuwa tsa aɗi lənggu na ciju wa, amma wala apani tsa aɗi hara kucalər Fəlɓəla Kəi wa, mda ata kədləmta ni kazhar mjirni, kamnyar tsa aɗi hamta saɗaka aka MTHLAKU akwa sakatə mdə thlamta wa. Antə tar ka mdə ngəni ɗar bwani kamnyar bikərni.

¹⁴Kəlara mətəpi na akwa nca giri na ata bara ɓəla Vir Fəlɓəla Kəi ni, ata ndzi dwali ka tsa hara tsu apatə tsawa ku thlamta, ka laku tə mda ana hara akwa hwatu. Tsawu ni an jili duku kamnyar kəlara mda, wala an mətəpi na akwa nca giri, wala mdər di.”

¹⁵Vir tə mdə nci Tentər vəngkər səli, antə dlamba ku səghəi ka hartə kəra Tent ni, watau Tentər Seɗar Alkawal ni. Baɗitə tahaku har tə vir kura dlamba ni ndzi apa u'u.

¹⁶Tədəku tsa ana ndzi apani. Dlamba ni ana hartə kəra Tent ni təpci, ka ndzi apa u'u aviri.

¹⁷Kəlara sakatə dlamba ni ku haptədzi kazhar Tent ni, mjir Israila ata thlatə kazhar vəi fəliyir ɗa ni. Tsuwa kəlara vəi tə dlamba ni ku thləthlata, anda antə mjir Israila ata fəli.

¹⁸Atar tsawur MTHLAKU antə mjir Israila ana thlatə kazhar vəi fəliyir ɗa, tsuwa atar tsawur MTHLAKU antə da ana nci vəi fəliyir ɗa. Akwa shanga sakatə dlamba ni athləthlata ata kəra tent ni, mjir Israila ata ndzəndzi tsu anda akwa vəi fəli ni.

¹⁹Wala ma dlamba ni an ata fəi ata kəra Tent ni, mjir Israila ata nu tsawur MTHLAKU, da aɗi ata thlatə kazhar vəi fəli ni ka təra wa.

²⁰Saka laga dlamba ni ana hara virayeri yiɗauwa daci ata kəra tent ni, tsuwa mjir Israila ata ləkəma ka ndzəndzi akwa vəi fəli ni ka tsawur MTHLAKU. Apani tsuwa ka tsawur MTHLAKU antə da ata thlatə kazhar vəi fəli ni ka da baɗitə mwa.

²¹Saka laga dlamba ni ana thləthlatə baɗitə ka tahaku har ɗəɗəpa daci. Antə ma tsa ku haptədzi ɗəɗəpa, təkəma da ata thlatə kazhar vəi fəli ni. Kəlara sakatə dlamba ni ku thlata, wala ɗəɗəpa, wala aviri, mji ni ata thlatə ka baɗitə mwa.

²²Wala ma dlamba ni an ata hara vir suɗa, wala thliya pal, wala məva pal, ma ku ndzi abbər dlamba ni tsu ata kəra Tent ni, mji ni ata ləkəma ka ndzəndzi akwa vəi fəli ni, da aɗi ata thlatə wa. Amma ma sakatə tsa ku haptədzi, təkəma da ata thlatə ka baɗitə mwa.

²³Ka tsawur MTHLAKU antə da ata fəli, tsuwa ka tsawur MTHLAKU antə da ana thlatə ka da baɗitə mwa. Da akwa ɓəla tsawur MTHLAKU kalkal apatə tsa tsawa aka Musa.