Read bura-pabir Mika 1 Bible Online

Mika 1 - bura-pabir bible

Mika 1

¹Akwa sakatə Kuthli Yothlam an ka kuthlikur ata kəra Yahuda, antə Mika na mdər Moresheth ngkər labar tə MTHLAKU pəla alari. Tsuwa Mika ku ləkəma ka hara naɓikur akwa zamanayeri ar Kuthli Ahaz, ka Kuthli Hezekiya na kuthlyayeri ar Yahuda. Hyel ncanta aka Mika suayeri zumzum ata kəra Samariya ka Urushalima.

²Psi gir thləma giri, shanga giri na mjir duniya, nggatə gir ndər ngəni, shanga giri na akwa duniya! MTHLAKU na ka Duna ta Shang, akwa səntə seɗa na ata ngkəi giri, MTHLAKU na akwa mbwar vəngkər səli arni na ɓɗakkarkara.

³Kamnyar nggədza MTHLAKU akwa səɓəla akwa vəi ndzəndziyirni, tsa ata səghəi ka tsa ntsəntsarəmta shanga bagaɗi ar haptayeri,

⁴Antə garayeri ata juwidzi akira səlari, apa ndivər ata mnya u'u, ka shirwadzi akwa mularayeri apa yimi na ana pughəidzi ata gar.

⁵Shanga su ngəni ata hara kamnyar bikər Yakub, da ata hara kamnyar bikər mjir Israila. Man bikə tə Yakub hara ri? Aɗi Samariya wa ya? Man bikər mjir Yahuda tsu ri? Aɗi Urushalima wa ya?

⁶Kamnyar ngəni I ata namtə Samariya ka tsa ndzi mzhiku tə mdə tsapta ata hildi, vəi ncimta nfwayeri ar anap. I ata pughəi pelayeri arni akwa mular, ka baɗitər səla mbwa ni ndzi ata bəbal.

⁷Mda ata pukthləmta shanga haptayeri arni, ka mbamta shanga gəna tə tsa tsapta akwa karwakur, antə shanga haptayeri arni ata ndzi su gapani. Kamnyar tsa wutə shanga suayeri ni akwa karwakur, antə tsa ata jaktə shamta suayeri ni tsu akwa karwakur.

⁸Antə Mika pəla, “Kamnyar ngəni I ata tuwa ka jikatuwa, I ata mwa dura kula ɓaɓi, I ata tuwa ka kuraku apa kilamtaku, ka hara kuraku apa nghyinghyi.

⁹Kamnyar mbəlka Samariya aɗi ata kur wa, tsuwa su ngəni an ata wutə Yahuda, har ma ku kurtə mzhitə nyarfur Urushalima, na bərniyir mjirna.”

¹⁰Giri aɗiya pəla aka dawayeri ar mburu na akwa Gath wa, shang ma giri aɗiya tuwa wala raka wa. Giri na akwa Beth Leyafrah, takəl girdzi akwa bərbər.

¹¹Giri na mjir Shafir, mwar giri dura ka səli akwa tsəɗi mafakur. Mji na ka ndzi akwa Zaanan, aɗiya suni səɓəla akwa bərniyir ɗa wa. Ma giri ku nggatə mjir Bethlezel akwa tuwa, ka giri sənda abbər giri aɗi ata wutə dlara akəla ɗa wa.

¹²Mjir Maroth akwa ɗar bwani ka duna, da akwa sək dlara swaiswai akəla mji, amma MTHLAKU ku thlenta asar akwa nyarfur Urushalima.

¹³Giri na ka ndzi akwa Lakish, mbwatə giri wagənər giri aka taku ka giri hwi, Kamnyar giri an thlipə ɗimikur mjir Israila, ka vu Urushalima akwa hara biku.

¹⁴Antə kulini giri na mjir Yahuda, ka giri hamta cautayeri ar ndəkəmtadzi aka mjir Moresheth Gath. Mjir Akzib ata ndzi mjir pwaktə mda kuthlyayeri ar Israila ka kərɗa ata nggaɓəlari.

¹⁵Giri na mjir Maresha, I ata thlentə mdə na ata ngkəi di giri. Antə kuthlir Israila ata ra ɗuwardzi akwa kur pela ar Adullam.

¹⁶Mjir Yahuda, shimta gir kəra giri, ka kəra giri ndzi hyalang, kamnyar tuwa maɗa' giri na hirhirari. Shimta gir kəra giri ka tsa ndzi hyalang, apa kəra kutəkcivi, kamnyar mda ata fatə maɗa' giri ka mwantə ɗa akwa tsəɗi damwa apa mafa.