Read bura-pabir Mika 5 Bible Online

Mika 5 - bura-pabir bible

Mika 5

¹Kulini, tsaptə sojayeri ar nga, Urushalima, kamnyar dawayeri ku kalaktə nga ka mpa. Ka zwal antə da ata tsa kuthlir Israila, da ata tsa ni ata pukəmari.

²Hyel akwa pəla, “Amma gə na Bethlelehem Efrathla, ga an raka akwa nca nyarmbwayeri na akwa Yahuda, amma wala apani akwa ga antə mdə laga, ata səɓəla na ata ndzi kuthlir Israila, natə kəkarni an waci ra waci, akwa zamanayeri na təramta waci.”

³Apani Hyel ata nggəlar mjirni Israila har tar ma sakatə mwala na akwa kutərya ku ya. Antə bwadukwa maɗama'ni ata sə ngka adzə mjir ɗa akwa Israila.

⁴Apatə mdər ɓəla ana wul təmarni, antə tsa ata sə pwar mjirni ka wulwul ɗa, MTHLAKU na Hyel ka kərari surni an ata na alari duna ka kuthlikur ar harari. Antə mjirni ata sə ndzəndzi lapiya, kamnyar ba mama mji ata sə səndə olkurərni,

⁵kamnyar tsa ata səntə msərakur. Ma sakatə mjir Assiriya ku səkwa tsəɗiyir mburu ka mpa, ka ɓəgələmta katanggar mburu. Antə mburu ata putə mji ol'ol murfa ata kəra mburu, ka kwakunayeri ncisu ka da dlu ɗa ka mpa.

⁶Ka katsakar antə mji ol'ol nayeri ni, ata dlərəmta Assiriya ka hara kuthlikur ata kərari ka dlərəmta tsəɗiyir Nimrod ka katsakar ntsuntsa. Apani antə da ata msərantə mburu akwa tsiya mjir Assiriya, ma sakatə da ku si akwa tsəɗiyir mburu ka mpa, wala fəlvəi ata kəla mburu.

⁷Antə mjir Israila na ku mbil ka mpika ka na ku titiləmtadzi akwa tsəɗiyayeri, ata sə ndzi apa kəlangkə tə MTHLAKU ana hamta, apa kwandza ata kəra kusar na akwa kəla, na aɗi ana səkə mdə wa, wala vəkər ka mdə laga wa.

⁸Mjir Israila na mbiləmta akwa tsəɗiyayeri akwa nca mji zumzum hang, ata sə ndzi ka duna apa tsəngi akwa nca mwaɓi na akwa kuɓər nfwa, apa tsəngi na mwavər akwa nca ciɓər təma, natə ma tsa ku ləkwa nca ɗa, tsa ata pwa ata kəra ɗa, ka kukwahəmta ɗa, tsuwa mdər mzhi mbuli ɗa aɗi wa.

⁹Apani antə mjir Israila ata sə nggyari dawayeri arɗa, ka shamta shanga dawayeri arɗa.

¹⁰MTHLAKU akwa pəla, “Vir nda I ata tsəgəi shanga takur mpa ar giri, kəi ɓəgələmta wagənayeri ar giri.

¹¹I ata shamta bərniyayeri na akwa tsəɗiyir giri, kəi huzamta katanggayeri ar giri.

¹²I ata shamta ɗeaghakur ar giri, antə giri aɗi ata jaktə wutə mjir hakdzi wa.

¹³I ata shamta haptayeri ar giri ka shanggamayeri na akwa nca giri. Antə giri aɗi ata zuzuri akəma ɗa kəra wa, akəma suayeri tə giri nam ka tsiya giri kəra wa.

¹⁴I ata ntsumta haptər Ashera akwa nca giri, kəi huzamta bərniyayeri ar giri.

¹⁵Antə kamnyar ɗəffi na ɓzə ka duna, I ata ntəmta ɗimikur ata kəra shanga mjir tsəɗiyayeri kamnyar da aɗi kələngkər ali wa.”