Read bura-pabir Nahum 1 Bible Online

Nahum 1 - bura-pabir bible

Nahum 1

¹Ngəni an labar na ata kəra Nineva. Ngəni an kakaɗər wulsu natə naɓi Nahum na mdər Elkosh wuta.

²MTHLAKU an Hyel na ana bara hirkurər mda swakti, MTHLAKU ana ntə dawa, tsuwa ɗəffari bwarbwar. MTHLAKU ana ntə dawa ata kəra dawayeri arni, ka pumta ɗəffə bwarbwarkurərni ata kəra ɗa.

³Ɗəffa MTHLAKU aɗi ana ɓzə taktar wa, amma tsa ka kuthlikur na ol ka duna, antə tsa aɗi ana zhar mdər biku kula ɗi wa. Tsa ana mwa akwa kəwal ka dlamba, tsuwa tsa ana thlentə bərbər ka səlari apa dlambayeri,

⁴Tsa ana mpa aka manda har ka tsa ula! Tsa ana vu ka thlyaghayeri ula, har ka vəi ɓəla na akwa Bashan tətəɓwa, ka Gar Karmel məma ka ndzi gulvəra, ka pukdlayeri ar Lebanon məma.

⁵Garayeri ana kənggərantədzi akəmari, ɗəɗəgəlayeri ana juwamtadzi. Duniya ana kədza akəmari, duniya ka shanga mji na akwa.

⁶Wan ta mbil ka mpikə ma ɗəffari ku mbu ri? Wan ta nggitə ɗəffə bwarbwarkurərni ri? Tsa ana puɓəla ɗəffə bwarbwarkurərni apa u'u, gagəmayeri ana ndəkəmtadzi akəmari.

⁷MTHLAKU ana hara ɓɗakkur tsa ana ɓəlatə mjirni akwa sakar bwani. Tsa ana ɓəlatə mji na ana ɗuwardzi adzə ni.

⁸Apa su tə pərtu ana hara antə tsa ata shamta dawayeri arni karkar ka mwantə ɗa akwa kuthlər mta.

⁹Man su tə giri akwa ɗəmhari ata kəra MTHLAKU ri? Tsa ata shamta giri, Mdər mzhi kampiku ka tsa ka suɗa aɗi wa.

¹⁰Dawayeri arni, ndzi apa mtəhəra thlurthlura apa mjir sa su na ku wika, antə mda ata mbamta ɗa tuktukku apa kusar ul'ula.

¹¹Akwa nca giri na mjir Nineva kəmanggar laga aɗi na ku ɗəmhə ɗimikur ata kəra MTHLAKU?

¹²Nggədza su tə MTHLAKU pəla aka mjirni Israila: “Wala tə mjir Assiriya ka duna tsuwa da hang, mda ata kurəmta ɗa ka shamta ɗa karkar. Mjirna, I ku hara tə giri ku ɗar bwani, amma I aɗi ata na giri bwani kəra wa.

¹³I ata ndəkəmta giri ka bwaniyir mjir Assiriya, kəi nthləmta məsəsal na mbwahə giri.”

¹⁴Nineva, MTHLAKU akwa pəla, “Mda aɗi ata jaktə nggatə thləma gə kəra wa. I ata mbamta shanga haptayeri, na akwa mbwar haptər giri, haptu marmara ka haptu tə mdə fatəmta. I akwa ɗəmha ala giri kula kəi harəmta giri, kamnyar aɗi kalkal ka giri ndzi ka mpikə wa.

¹⁵Mjir Yahuda, wul giri ata kəra garayeri ni! Ndaga mdə laga akwa si ka labar na msəra, tsa akwa psəmnya labar ar msərakur. Ləkəma giri ka vir kucali ar giri ka giri ɓathla, ka giri nghyaɓəla alkawal tə giri kəta alari. Mji na ɗimi aɗi ata jaktə dlər giri kəra wa, kamnyar mdə ku kurəmta ɗa shang.”