Read bura-pabir Nahum 2 Bible Online

Nahum 2 - bura-pabir bible

Nahum 2

¹Nineva, mdə laga akwa si na ata dlər nga ka titiləmta nga. Pwi sojayeri na ata səkə katanggar nga! Wul kəra laku! Mbwidzi ɓɗaku! Tsaptə shanga sojayeri ar nga!

²Kamnyar MTHLAKU akwa jaktə haptə səliyir Yahuda ka Israila ata kəma duku, wala tə dawayeri ku famnya kariyir ɗa, ka ɓəgələmta tsiya nfwayeri ar anap.

³Nineva, partauwur sojayeri ar dawar nga mamza, tsuwa ləptər sojayeri arɗa pitu mamza. Wagənayeri ar takur ɗa akwa mbəlmbəla apa kyanggyara u'u, akwa sakatə da ku tsaptədzər ləkwa mpa, ka mda akwa kənggər mwasayeri ata kəra ɗa.

⁴Takwayeri ar wagən akwa pu hwi akwa lakur kutadi, da akwa pu hwi mwari ka ngka akwa bəbalayeri ar kutadi. Da akwa hamta parakəu apa zafu, ka təramta ka hwi ka ufti apa wurka.

⁵Mdə ku kəga sojayeri na ol'ola ka da si, amma da akwa ndləndla akwa lakur si. Da akwa si ka huva adzə katangga ni, ka ncigəi suayeri na ata ngkamta ala ɗa asar.

⁶Mdə ku mburəmta lakur yimi na kalaktə di, antə kəi kuthlikur ku nghyi ka thlivəra.

⁷Mdə ku dzari zhaɓər mwala' kuthli, ka təra ka tsa, maɗangkwi kutambwar ni akwa jaɓ tuwa, apa bukəl, ka tsa kərathla ɗa kamnyar ɗəffə ɓzəɓza.

⁸Apatə yimi ana ɓələmta dam ka hwiɓəla, antə mjir Nineva ku hwi ləɓəla ka təra! Mda akwa pəla, “Thləthlatə giri! Thləthlata!” Amma mda aɗi wala duku na haghəl kəma wa.

⁹Fa giri adzərfa! Fa giri dinar! Bərni ni nghyinghyari ka gəna su na ɓɗakɓɗaku tə mda amzhi kuriyari wa.

¹⁰Hayang! Nineva ku hil ka ndzi kula mji! Hyala ɗa akwa nthlə ɗa, ɓunja ɗa akwa kədza, duna ɗa ku kuri, kəma ɗa ku ndzi hərhərari.

¹¹Kulini man wutə bərni Nineva ri? Waci tsa an tsəɗi na ka Duna ta Shang tsəɗi na ana dlər mji kula thlivəra, vəi tə mji na ka duna ka mji na kula duna ana ndzəndzi ata kəma duku kula thlivər su.

¹²Nineva, waci ga an tsəngi na ka duna, na ku kukwahəmta dawayeri ar nga aka maɗa' nga, ka ndwaləmta wulya ɗa aka mama' tsəngiyayeri ni. Ga ku nghyantə kur nga ka mshiyir dawar nga, ka nghyantə kur pelayeri ar nga ka kumər ɗa.

¹³MTHLAKU na ka Duna ta Shang akwa pəla, “I ku nggəlar nga! I ata mbamta wagənayeri ar takur nga. Sojayeri ar nga ata kurəmtadzi akwa mpa, ga aɗi ata jaktə kurəmta mji akwa mpa kəra wa. Tsuwa mda aɗi ata jaktə nggatə kuraka mjir thlenta ar nga kəra wa.”