Read bura-pabir Nahum 3 Bible Online

Nahum 3 - bura-pabir bible

Nahum 3

¹Sha ku wutə nga, Nineva, bərni tsi mji, bərni na nghyinghyari ka thlandər, ka gənayeri hang tə mdə famnya.

²Ngga gir kuraka kwandeng, ka kuraka tayayeri na akwa kənggəra, kuraka səla takwayeri na akwa pu galapu, ka kuraka wagənayeri na akwa kənggəra.

³Ɗəffa mjir fəl taku ku mbwi, katsakarayeri ka mwasayeri akwa mbəlmbəla! Mdə ku tsaptə mshiyayeri tyaləm tyaləm, dlamar mshi tə mda amzhi jikatari wa, har mji akwa ndla ata kəra mshiyayeri ni!

⁴Su ngəni hara shang, kamnyar ɗimikur karwakur tə Nineva hara, kamnyar tsa dakwi ka mnyari msəra, tsuwa tsa ana ndəkər hangkala mji ka məspar. Antə tsa ku ɓəli tsəɗiyayeri atar karwakurər ni, ka ndəkərwa mji akwa mafakur atar kuzəku.

⁵MTHLAKU na ka Duna ta Shang akwa pəla, “I ku nggəlar nga, Nineva! I ata haptə zhaɓər ɗuwar ashira ga, ka tsəɗiyayeri wutə durakur nga, ka gə ndzi sur səli aka shanga duniya.

⁶I ata pungkər ala gə diɗi, kəi rutəmta nga, kəi namtə nga ka ra ndzi sur kumshi.

⁷Shanga mji na ku wutə nga da ata ngka ka bwahili ka pəla, ‘Kərja, Nineva ku hili! Wan ata kətadzə nə ri? Wan ata shiktə nə ri?’ ”

⁸Nineva, gə tamatə gə təramta bərni Thlebes na ata mnya Thlyagha Nayil ya? Wala tsa ma tsa kalakkalakari ka yimi, manda andər mbuli ni, thlyagha an katanggar ni.

⁹Ithliyopiya ka Masar an dunawakurərni, tsa ka duna swaiswai. Put ka Libiya andər dlar ni.

¹⁰Wala apani mdə ku fatə mjir Thlebes, ka mwantə ɗa akwa tsəɗi damwa. Mdə ku pupukthləmta kəra maɗa'ni ata pelar mnya laku na akwa kəlara kuɗəma. Mdə ku mbwamta mji ol'olər di ni ka can, ka ndəkəmta ɗa aka sojayeri na fatə ɗa ni.

¹¹Nineva, wala gə ma ga ata sə hara su kələng kələngnga apa mdər wika. Ga ata sə hwi ra ɗuwardzi ta dawayeri ar nga.

¹²Shanga katanggayeri ar nga ata ndzi apa nfur kamnda, natə yarni ng'həi ntangkəma. Ma mdə ku kənggərtə nfu ni yarni ata pughəidzi akwa mnya mdər kwasari.

¹³Wul laku tə sojayeri ar nga akwa, apa mwanki an akwa nca giri. Nyarfur tsəɗiyir nga ku ndzi bwang aka dawayeri ar nga. U'u ku mbamta udzəm dzəka nyarfur nga.

¹⁴Ɗəmtsə yimi hang ka ra pwi, kamnyar mjir dləra ata sə kalaktə diyir nga, Hərtə həi kara tsamta bulak, ka gə dunautə katanggar ngə ni kəgari!

¹⁵Amma ata kəra ɗəmhədzi ngəni shang, u'u ata mbamta nga. Katsakar ata thlamta nga, ka ɓɗəmnya ngə ngyatu apa hawa. Ga ku ləkəma ka yatədzi, ka ndzi dlama dlama apa ntsəkwa!

¹⁶Ga ku jakə hangkur mjir fəli ar nga, tə da ku hara hangta sasəlka na ata kutahyel. Amma da ndzi apa ntsəkwayeri, na ana pəbələmta ɓəɓəka ɗa ka fəl ka təra.

¹⁷Mjir sək kəra ga an hang apa dəkcikci, mji ol'olər nga an hang apa hawa na ana daɓtədzi akwa thlir kadaka akwa sakar vəi mtathlaku. Amma ma pci ku səɓəla da ana fəl ka təra mda aɗi na asəndə vəi tə da mwari akwa wa!

¹⁸Gə na kuthlir Assiriya, gwamnayeri na akira ga ku mtəgəi, mji ol'olər tsəɗiyir nga ku mtəgəi! Mambila mjir nga ku titiləmtadzi ata garayeri, kula mdər tsaptə ɗa ata kəma duku.

¹⁹Laku aɗi tə mbəlkər nga ata kur wa, dəkəidzər ngə ni ku hara mwavər kamta. Shanga mji na ku nggata asar na wutə nga, akwa ɓungkir tsi kamnyar kucali. Kamnyar wan kula ku ɗar bwani akəla gə ri? Parang ga akwa kəmanggarkur!