Read bura-pabir Habakkuk 1 Bible Online

Habakkuk 1 - bura-pabir bible

Habakkuk 1

¹Ngəni an ndər natə naɓi Habakkuk dluwa akəla MTHLAKU.

²MTHLAKU, ka yiɗau antə I ata ləkəma ka tuwa dlara akəla ga, kambəla gə nggatə ra ri? I akwa tuwa kamnyar thlentər hangkal na aɗi, amma ga aɗi akwa hir mbantə yeru wa.

³Kamnyar mə tə gə zhar ra kəi wul ɗimikur, ka bwani ngəni ri? Kamnyar mə tə gə zhar ka asar, ka thlentər hangkal, ka mpa, ka beɗi, thlata akwa kəlara bwa ri?

⁴Kamnyar mji aɗi akwa nu tsawa wa, antə jirkur aɗi akwa mwa wa. Kəmanggarayeri an kalaktə mji na pwa, antə jirkur akwa mwa mbalmbalari.

⁵Antə MTHLAKU pəla aka mji, “Wul giri mjir tsəɗiyayeri na kalaktə giri, giri ata wutə su na ata ndatə giri ka duna. Kamnyar I ata hara su akwa sakar giri, natə wala ma mdə pəla ala giri, giri aɗi ata mbərsatari wa.

⁶Antə apani I ata thlentə mjir Babila, mji na mwavər ka ɓəɓatu akwa ɓzamtə su, mji na ana mwa ka dlarhə duniya ka dlutsə bərniyayeri akəla mji.

⁷Da sur thlivəra antə da ata thlivərantə mda, da ka kəra ɗa an mthlakər kərɗa, tsuwa da andər hamta olkur aka kərɗa.

⁸Takwayeri arɗa ana hwi ta tənvwa, da mwavər ta mwaɓəlmi na ka mi. Mjir fəl takwayeri arɗa ana thlatə ciju, ka si ka takwayeri ni akwa pu galapu, da ana si apatə duku ana səghəi ka ufti ka kəl susəmər ni.”

⁹“Su na səntə ɗa shang an ka da mpa, antə kəlara mdə na ku wutə ɗa akwa si ana yakata. Da ana tsaptə mafayeri hang apa wuyaku.

¹⁰Da ana rutə kuthlyayeri ka kumshi kwakunayeri. Da ana kumshi kəlara di na akwa katangga, kamnyar da ana tsaptə həi ka ndləta, ka ngkəi di ni.

¹¹Da ana təramta ka ufti apa shambar ka ləkəma, mjir biku, natə duna antə da mbərsa kəgari.”

¹²MTHLAKU, ga an ba saka madi. Hyelərna na Ɓɗakkarkara, yeru aɗi ata mtə wa. MTHLAKU, ga ku pwi mjir Babila ka da ndzi mjir hara ala yeru shariya. Gə na gagəmar ɗuwardzər yeru, an vu ka da ndzi mjir ɗi yeru.

¹³Gə natə nca ga an ɓɗakkarkar ta wul ɗimikur, ga aɗi ana hir wul su na ɗimi wa. Kamnyar mə tə gə dləɓ səri akwa wul mji na kula jiri, har ka da kurəmta mji na ɓɗakta da ri?

¹⁴Kamnyar mə tə gə namtə mda apa kəlfar manda, apa cam na dəməsməs kula mdər pwar ɗa ri?

¹⁵Mjir Babila ana ngkəi ɗa shang ka angilku, ka ndəkərɓəla ɗa akwa banggama, ka hara kucali ka msərakur ata kəra ɗa.

¹⁶Kamnyar ngəni da ana hamta saɗaka aka banggamar ɗa, ka mba tulari ɗuza ala ɗa. Kamnyar atar banggama antə da akwa nggatə msəra, tə da akwa səm susəmayeri na msəra msəra.

¹⁷Antə ka da ləkəma ka puɓəla su na akwa məmpa ni, ka kurəmta mji kula kətadzə ba saka madi ya?