Read bura-pabir Habakkuk 2 Bible Online

Habakkuk 2 - bura-pabir bible

Habakkuk 2

¹I ata lətə kəra hən na nal, kəi thləthlata ata ka sək su tə MTHLAKU ata pəla ali, su tə tsa ata pəlari ata kəra tuwarna ni.

²Antə MTHLAKU shinau ali abbər, “Rəbuta ndər tə I ata hamta ala gə ni. Rəbutə ni ɓɗaku ata allo, ka mdə na ata karatari mzhi karatari kasəla.

³Rəbuta, kamnyar su ngəni aɗi ata hara təkəma wa, amma suari aɗi ata shamta saka wa, tsa aɗi ata ndzi thlandər tsu wa. Wala ma tsa an ata kətə saka, ar nga kara səka, kamnyar jiri suari ata hara, tsuwa tsa ata si ata sakari.

⁴Nggədza tsuwa, mji na ɗimi aɗi ata səm fa wa, amma mji na pwa ata ndzi ka mpika atar hamta jirər ɗa.”

⁵Jiri, gəna ana pwaktəmta mda, mdər gaya ana fəi ata kəra duniya wa. Kamnyar mbulamkurərni ndzi tsu apa kula, su aɗi ana mzhi ni wa tsu apa mta. An su na hara tə tsa ana tsaptə tsəɗiyayeri, ka tsaptə shanga mji aka kərari surni.

⁶Antə shanga mji ngəni ata sə sar ni, da ata sə rutə ni ka kumshi, ka pəla, “Sha ku wutə nga! Gə na ana tsaptə su na aɗi ar ngə wa, gə na ana hara gəna atar zambakur! Nawa antə ga ata sə zhar ɗimikur ngəni ri?”

⁷Mjir nu ngə təmbəl ata si kula səndər nga, da ata pungkərdzi ala gə har kara thlivəra. Antə da ata famnya shanga sur nga.

⁸Kamnyar tə ga ku famnya sur tsəɗiyayeri hang, antə kulini shanga mji na mbila ata famnya sur nga. Kamnyar ga ku hara asar aka bərniyayeri ka tsəɗiyayeri, ka duniya swakti, ka kurəmta mjir ɗa.

⁹Sha ku wutə nga! Gə na ana namtə mbwar nga ka gənar dlərpəkur. Ga ana latə mbwar nga amta ata gar, ata vəi tə asar amzhita ka ɓzamtə wa.

¹⁰Ga ku ɗəmhə su na vu kutakəyir nga akwa səli ka vu kər nga akwa asar atar kurəmta mjir tsəɗiyayeri hang.

¹¹Kamnyar pelar dza mbwa ni akwa tuwa, tsuwa udzəm ciɓ kəra mbwa akwa dlu kurakər tuwa ni.

¹²Sha ku wutə nga! Gə na ku nci bərniyir nga ka ɗimikur, ka həntə ni ka mamshir mji.

¹³Ga aɗi səndə su tə MTHLAKU na ka Duna ta Shang ɗəmhə wa ya, abbər ka shanga ghərər mji sə kura akwa u'u, ka ghərər tsəɗiyayeri tsuwa sə ndzi gapani?

¹⁴Kamnyar saka ata sə si tə duniya ata sə nghyi ka səndər səliyir MTHLAKU, apatə manda ana nghyi ka yimi.

¹⁵Sha ku wutə nga! Gə na ana vu ntəwulayeri ar nga akwa sa, ga ana puɓəla ala ɗa ɗəffə bwarbwarkurər nga akwa ɗewa, ka da sa ka wika, ka gə wul durakurər ɗa.

¹⁶Kulini ata vəya ka mdə hu nga, ga ata ləkwa səli, gə ka kəra ga an ata sari ka wika. Ɗewa na akwa tsi mazəma MTHLAKU ni ata ngka ata kəra ga, antə mdəkurər nga ata shina ka sur səli.

¹⁷Asar tə gə ngkərta aka Lebanon ni ata ngka ata kəra ga, ga ku kurəmta mwaɓi mtakəu, kulini mwaɓi ata thlivərantə nga. Ga ku kurəmta mji ka hara asar aka duniya, ga ku hara asar aka bərniyayeri ka kurəmta mji na akwa da.

¹⁸Man ampaniyir haptu ri? Tsa an su tə mdə ndzang an namta, liya na dludzər su, tsuwa olər thlandəra. Man ampaniyir mbərsa ka su natə tsa ka kərari an namtə ri? Kamnyar haptu aɗi ana mzhi mnya wa!

¹⁹Asar an wutə nga! Gə na ana pəla aka udzəm, “Thlat' ata heni!” Ka pəla aka pela na kula mpika, “Thlata!” Haptu ata mzhi ncanta ala gə su ya? Mdə ku fadza alari dinar ka adzərfa amma tsa aɗi ka mpikə wala raka wa.

²⁰Amma MTHLAKU akwa mbwarni na ɓɗakkarkara, antə ka shanga mjir duniya ndzi ɗiɗi akəmari.