Read bura-pabir Habakkuk 3 Bible Online

Habakkuk 3 - bura-pabir bible

Habakkuk 3

¹Ngəni an adduwar naɓi Habakkuk natə ka mdə hara ka kurakər tuwar mshi.

²MTHLAKU, I ku nggatə labarər nga, antə su tə gə hara ni akwa thlivərantə ra, MTHLAKU. Jaktə hara su ndaga bu kulini akwa sakar yeru, hara ka mji səndə ni akwa zamanər yeru. Wala ma ɗəffa ga ku ɓzi kara kətadzə yeru.

³Hyel ku thlata ahar Teman ka si, Hyel na ɓɗakkarkara ku thlata akwa Gar Paran ka si. Kuthlikurər ni ku hartə vəi na amtazi, tsuwa shanga duniya akwa hu ni.

⁴Səliyir ni akwa hamta parakəu apa pci, parakəu akwa səɓəla akwa tsiyari apa wurka, vəi tə tsa ana ɗuwar dunari akwa.

⁵Tsa ana thlentə shilku ka tsa mwa akəma, ka tsawa aka shilkər mta ka tsa nu ghəlari.

⁶Ma tsa thləthlata, duniya ata kənggəra, ma tsa zhwal mjir duniya, da ata kədza. Tsa ana pukthləmta garayeri na aɗi təng waci, ka garayeri na aɗi təng waci sha akwa di səyam, garayeri ni an lakwayeri tə tsa ana nuwa waci.

⁷I ku wutə mjir Kushan akwa ɗar bwani, ka mjir Midiyan akwa kədza.

⁸MTHLAKU, ɗəffa gə ɓzə ni adzə thlyaghayeri ya? Ɗəffa gə ɓzə ni adzə zərkayeri ya? Nənga ɗəffa gə ɓzə ni adzə manda ri? An su na hara tə gə fəltə takwayeri ar nga, akwa wagən kamnyar ka gə səm ni ya?

⁹Ga ku kəɓəla laliyir nga ata bəbal, ka vu afa akwa dzər. Ga ku ndəkəmta daɓwa di ka thlyaghayeri.

¹⁰Sakatə garayeri wutə nga, da ku yakata, antə dlamba ku pughəi yimi ka handzəkəla. Mda akwa nggatə kərathla yimi ka duna, mpar yimi akwa thlatə ka ləmta ka duna.

¹¹Pci ka thliya ku thləthlatə tsəkəm akwa vəi ndzəndziyir ɗa, sakatə afayeri ar nga akwa təramta ka ufti apa wurka, sakatə mwasər nga na akwa mbəlmbəla akwa təramta.

¹²Ga ku mwa ka ɗəffu ka ntamta kuta duniya, ka ntsəntsarəmta mjir duniya kamnyar ɗəffa gə na ɓza.

¹³Ga ku ləɓəla kamnyar mbantə mjir nga, kamnyar mbantə mdə tə ga ku carɓəla. Ga ku jaɓumta kəra olər kəmanggarayeri, ka perəmta ni dura baɗita ata kiɗari har wulyari.

¹⁴Ka mwasayeri arni antə ga ku ntsəvəmta olər sojayeri arni, sakatə tsa si apa kəwal ka tsa titiləmta yeru, ka kucali apa mjir həl kurəmta mjir bwani.

¹⁵Ga ku ntsəntsartə manda ka takwayeri ar nga, ka thlentə yimayeri ka duna.

¹⁶Sakatə I nggatə su ngəni, antə I kədza, kəsəm mnyi ku kədza kamnyar thlivəra. Shanga dzi ku mti, ma I akwa mwa səli ata kədza. Amma I ata mbwi ɗəffi kəi səka, vir tə asar ata sə pwa ata kəra dawayeri, na ana dlər tsəɗiyir yeru ka mpa ni.

¹⁷Wala tə nfur Kamnda aɗi akwa pukdlə wa, tsuwa ya aɗi ata nfur anap wa, wala tə nfur zaitun aɗi akwa ya wa, tsuwa mthli aɗi ya akwa fakə wa, wala tə mwaɓi akwa kurəmtadzi kazhar ciɓa, tə thla aɗi mbil akwa ciɓə kəra wa,

¹⁸tsu I ata kucali kamnyar MTHLAKU, I ata kucali kamnyar Hyel an mdər mbantə ra.

¹⁹MTHLAKU na ka Duna ta Shang an duni. Tsa ana hara ka səli kəsi di apa jikəl, kəi fəlfəla ata gar apa kimar. Aka mdər pwar ha, ka mdə hangkir sur tsa na ka səwa.